Fréttir

Svæðisfundur fyrir verkefnið Arctic Coast Way eða Norðurstandarleið var haldinn á Sauðárkróki miðvikudaginn 22. nóvember. Markmið fundarins var að draga fram það besta sem Skagafjörður hefur upp á að bjóða þegar kemur að gönguleiðum, ströndum, miðnætursólarstöðum og norðurljósastöðum. Þeir sem ekki gátu mætt á fundinn en vilja koma tillögum á framfæri geta gert það til og með 15. desember nk.

Nú er úti veður vont og á það við í Skagafirði þessa stundina og fer versnandi ef spár ganga eftir þegar líður á daginn. Sundlaugin og íþróttamiðstöðin í Varmahlíð loka kl 14 í dag og engir skólabílar gengu á svæði Varmahlíðarskóla í morgun og eru þeir nemendur sem mættu farnir heim. Árshátíð yngri nemenda skólans sem vera átti kl 16 í dag er frestað um viku.

Íbúafundur var haldinn í fundarsal sveitarfélagsins í Húsi frítímans í gær, 21. nóvember, um verkefnið verndarsvæði í byggð þar sem kynnt var tillaga að verndun gamla bæjarins á Sauðárkróki.

Sveitarstjórn hefur samþykkt nýja og endurskoðaða Stefnu og viðbragðsáætlun Sveitarfélagsins Skagafjarðar gegn einelti, ofbeldi, kynferðislegri og kynbundinni áreitni. Allt starfsfólk Sveitarfélagsins Skagafjarðar á rétt á að komið sé fram við það af virðingu og umhyggju. Sveitarfélagið Skagafjörður tekur skýra afstöðu gegn einelti, kynferðislegri áreitni, kynbundinni áreitni og ofbeldi.

Deildarstjóri vnnur að uppeldi og menntun barnanna. Ber ábyrgð á stjórnun, skipulagningu, framkvæmd og mati starfsins á deildinni, annast daglega verkstjórn á deildinni og ber ábyrgð á að miðla upplýsingum innan deildarinnar, milli deilda leikskólans og milli leikskólastjóra og deildarinnar, ber ábyrgð á og stýrir deildarfundum og skipuleggur undirbúningstíma starfsfólks deildarinnar, hefur umsjón með móttöku, þjálfun og leiðsögn nýrra starfsmanna deildarinnar.

Útgáfu áttunda bindis Byggðasögu Skagafjarðar verður fagnað laugardaginn 18. nóvember kl 14 í Gistihúsinu Gimbur á Reykjarhóli á Bökkum í Fljótum. Í þessu bindi er fjallað um hinn gamla Fellshrepp og Haganeshrepp og Hjalti Pálsson fer með ritstjórn eins og í fyrri bindum.

Sveitarfélagið Skagafjörður mun birta jóla- og áramótadagskrá í Sjónhorninu í desember líkt og síðustu ár. Þeir sem hafa áhuga á að koma viðburði á aðventu, jólum eða um áramót á framfæri í dagskránni eru beðnir um að senda inn upplýsingar um það fyrir mánudaginn 20. nóvember nk.

Fjórði þáttur Atvinnupúlsins í Skagafirði var sýndur á sjónvarpsstöðinni N4 í gærkvöldi. Í þættinum var rætt við Tryggva Þór Haraldsson, forstjóra Rarik og Erlu Björk Örnólfsdóttur, rektor Háskólans á Hólum. Auk þess var farið í heimsókn til Mjólkursamlags KS, héraðsfréttablaðsins Feykis og Kjötafurðastöðvar KS.

Dagur íslenskrar tungu er í dag 16. nóvember, fæðingardagur rómantíska skáldsins Jónasar Hallgrímssonar en hann fæddist árið 1807 og því eru 210 ár frá fæðingardegi hans í dag. Í tilefni dagsins verður dagskrá í Löngumýri þar sem Skagfirski kammerkórinn, kór eldri borgara og nemendur 7. bekkjar Varmahlíðarskóla verða með dagskrá helgaða skáldinu Halldóri Kiljan Laxness og íslenskunemar í FNV ætla að þreyta sund í sundlaug Sauðárkróks til heiðurs sundáhuga Jónasar.