Byggðarráð Skagafjarðar

Lagt var fram erindi frá Helga Bragasyni sérfræðingi hjá FSRE dagsett 3. ágúst sl. Í erindinu óskar Helgi fyrir hönd Ríkiseigna sem umráðandi fasteignarinnar að Suðurbraut 15, Hofsósi (F2143729) og í umboði Fjármála- og efnahagsráðuneytisins eftir samþykki byggðarráðs, sem meðeiganda að 15% eignahlut, fyrir því að setja eignina í söluferli.

Byggðarráð samþykkir samhljóða að eignin verði sett í söluferli.

Deildarstjóri þróunar, miðlun og menningar óskar eftir heimild til að loka eftirtöldum gatnamótum á meðan gleðiganga vegna hinsegin hátíðar á sér stað, 15. ágúst n.k.:

Gatnamót Skagfirðingabrautar/Faxatorgs.
Gatnamót Skagfirðingabrautar/Skólastígs.
Gatnamót Skagfirðingabrautar/Suðurgötu/Hliðarstígs.
Gatnamót Aðalgötu/Bjarkarstígs.
Gatnamót Aðalgötu/Sævarstígs.

Gengið verður frá Faxatorgi niður á Kirkjutorg.

Lokunin stendur yfir frá kl. 13:00 - 15:00.

Tryggt verður að aðgengi sjúkrabíla og löggæsluaðila verði gott þrátt fyrir lokanir.


Byggðarráð samþykkir samhljóða umbeðnar lokanir gatnamóta vegna gleðigöngu Hinsegin hátíðar 15. ágúst 2026.

Lagt fram erindi frá Drangey, smábátafélagi Skagafjarðar, þar sem óskað er eftir því að sveitarfélagið beiti sér fyrir breytingu á reglum um byggðakvóta þannig að landaður strandveiðiafli á yfirstandandi fiskveiðiári verði talinn mótframlag við byggðakvóta án vinnsluskyldu. Í erindinu er vísað til svars innviðaráðuneytisins þar sem fram kemur að slík breyting geti aðeins komið til skoðunar á grundvelli rökstuddrar tillögu frá sveitarstjórn.

Byggðarráð telur ekki forsendur til að leggja til breytingar á þeim skilyrðum um vinnsluskyldu sem áður hafa verið samþykkt fyrir byggðakvóta í Skagafirði. Byggðarráð ítrekar vilja sinn til að standa við þær ákvarðanir sem þegar hafa verið teknar um að aflinn verði unninn innan sveitarfélagsins. Jafnframt liggur fyrir að vinnsla hjá Fisk Seafood er áætluð að hefjast að nýju 11. ágúst nk. og fiskveiðiárinu lýkur 31. ágúst 2026. Af þeim sökum telur byggðarráð ekki tilefni til að hafa frekari aðkomu að málinu að svo stöddu.

Byggðarráð samþykkir samhljóða að hafna erindinu.

Sigríður Hjaltadóttir kom sem gestur inn á fundinn í gegnum fjarfundarbúnað og kynnti áhrifin sem yfirvofandi breytinga munu hafa á sveitarfélögin og þau verkefni sem eftir sitja hjá sveitarfélögunum. Byggðarráð þakkar Sigríði kærlega fyrir komuna.

Byggðarráð Skagafjarðar tekur undir þau sjónarmið og áhyggjur sem fram koma í sameiginlegri grein landshlutasamtaka sveitarfélaga um framtíð heilbrigðiseftirlitsins sem send hefur verið viðkomandi ráðuneytum. Þar er bent á að þrátt fyrir að Alþingi hafi samþykkt umfangsmiklar breytingar á fyrirkomulagi heilbrigðis-, matvæla- og mengunarvarnaeftirlits liggi enn ekki fyrir svör við fjölmörgum grundvallarspurningum um framkvæmd breytinganna.
Byggðarráð telur sérstaklega mikilvægt að ríkið skýri án tafar hvernig staðið verður að yfirfærslu verkefna, gagna, leyfa, málaskráa og annarra stjórnsýslugagna, hver beri kostnað af þeirri yfirfærslu og hvernig tryggt verði að ábyrgð og rekjanleiki mála haldist órofinn. Jafnframt þarf að liggja fyrir hvernig farið verður með starfsfólk heilbrigðiseftirlitanna, starfsmannaréttindi, lífeyrisskuldbindingar, samninga, húsnæði, búnað og aðrar eignir sem sveitarfélög hafa byggt upp á undanförnum áratugum.
Byggðarráð leggur einnig áherslu á að skýrt verði hvaða verkefni verða áfram á ábyrgð sveitarfélaga, hvaða fjármögnun fylgir þeim verkefnum og hvaða úrræði sveitarfélög hafa til að sinna þeim. Þá er nauðsynlegt að tryggja að breytingarnar leiði ekki til lakara aðgengis að þjónustu, minni staðþekkingar eða verri viðbragðsgetu á landsbyggðinni.
Byggðarráð Skagafjarðar skorar því á ríkisstjórn og viðkomandi ráðherra að leggja fram skýra og tímasetta framkvæmdaáætlun um innleiðingu laganna og svara þeim álitaefnum sem landshlutasamtök sveitarfélaga hafa ítrekað kallað eftir að verði skýrð áður en breytingarnar taka gildi.

Lagt fram til umsagnar drög að stefnu stjórnvalda um uppbyggingu flutningskerfis raforku. Stefnunni er ætlað að vera leiðbeinandi og skilgreina þau markmið sem flutningsfyrirtækinu er ætlað að vinna að.

Byggðarráð Skagafjarðar fagnar því að fram séu komin drög að stefnu stjórnvalda um uppbyggingu flutningskerfis raforku og leggur áherslu á að uppbyggingin tryggi jafnt aðgengi landsmanna að öruggri og áreiðanlegri raforku og styðji við atvinnuþróun og orkuskipti um land allt.
Byggðarráð tekur undir það mat stjórnvalda að brýnt sé að bæta stöðu raforkumála á Vestfjörðum og Norðausturlandi. Ráðið bendir hins vegar á að Norðurland vestra býr einnig við verulegar takmarkanir í flutningskerfi raforku sem hamla atvinnuuppbyggingu, orkuskiptum og nýsköpun. Það er því mikilvægt að stefnan taki einnig mið af þörfum svæðisins og að uppbygging flutningskerfisins leiði til raunverulegrar aukningar á afhendingaröryggi og flutningsgetu á Norðurlandi vestra.
Aðgengi að raforku er ein af grundvallarforsendum byggðaþróunar. Norðurland vestra hefur um árabil ekki haldið í við landsmeðaltal í íbúaþróun og því er það sameiginlegt verkefni stjórnvalda og heimamanna að skapa skilyrði fyrir aukna atvinnuuppbyggingu og fjölgun íbúa. Traustir raforkuinnviðir eru þar lykilatriði og forsenda þess að svæðið geti nýtt þau tækifæri sem felast í atvinnuþróun, orkuskiptum og aukinni verðmætasköpun.
Byggðarráð hefur áður bent á að meginflutningslínur raforku til Skagafjarðar séu fulllestaðar og að flutningsgeta til svæðisins sé takmarkandi þáttur fyrir frekari uppbyggingu. Jafnframt er Rangárvallalína elsti hluti byggðalínunnar á Íslandi. Byggðarráð fagnar því þeirri uppbyggingu sem fyrirhuguð er á meginflutningskerfinu en telur jafnframt nauðsynlegt að ráðist verði í endurnýjun Sauðárkrókslínu 1 hið fyrsta og að flutningsgeta til Sauðárkróks og Norðurlands vestra verði aukin þannig að raforkuinnviðir standi ekki í vegi fyrir frekari uppbyggingu atvinnulífs og samfélags í landshlutanum.

Lagt fram til umsagnar áform dómsmálaráðuneytisins um skipulagsbreytingar lögreglunnar, mál nr. S-138/2026 sem kynnt er í samráðsgátt stjórnvalda. Um er að ræða áform um fækkun lögregluembætta úr níu í fjögur til fimm með það að markmiði að auka skilvirkni og efla löggæslu.

Byggðarráð tekur undir fyrri bókun stjórnar Samtaka sveitarfélaga á Norðurlandi vestra (SSNV) um málið og ítrekar mikilvægi þess að allar breytingar á skipulagi lögregluþjónustu taki mið af sérstöðu landsbyggðarinnar, miklum vegalengdum og þeirri þjónustu sem íbúar og sveitarfélög reiða sig á í daglegu lífi.

Byggðarráð lýsir áhyggjum af því að fyrirhugaðar breytingar geti leitt til minni nærveru stjórnenda, veikara tengslanets við sveitarfélög og skertrar þjónustu þegar fram líða stundir, þrátt fyrir yfirlýst markmið um hið gagnstæða. Ráðið telur mikilvægt að ekki verði dregið úr starfsemi lögreglunnar á Norðurlandi vestra, að lögreglustöðvar í landshlutanum verði áfram reknar af fullum krafti og að staðbundin þekking, reynsla og sérhæfing sem byggð hefur verið upp innan embættisins glatist ekki.

Byggðarráð áskilur sér rétt til að skila umsögn um málið þegar frumvarp eða nánari tillögur liggja fyrir og lýsir sig reiðubúið til frekara samráðs við dómsmálaráðuneytið um framtíðarskipan lögregluþjónustu á Norðurlandi vestra.

Innviðaráðuneytið kynnir til samráðs mál nr. 105/2026, "Forsamráð um efnistök grænbókar um fjarskipti og netöryggi".

Lagt fram til kynningar.

Byggðarráð Skagafjarðar fagnar framlagðri Hvítbók um byggðamál og þeim metnaðarfullu markmiðum sem þar eru sett fram um að jafna aðgengi að þjónustu, atvinnu og tækifærum óháð búsetu. Sérstaklega er jákvætt að í hvítbókinni er lögð áhersla á öfluga byggðakjarna, bætt aðgengi að þjónustu, samgönguinnviði, menntun og atvinnuuppbyggingu um land allt.
Byggðarráð telur þó mikilvægt að í áframhaldandi stefnumótun verði horft með skýrari hætti til stöðu landshluta í heild en ekki eingöngu einstakra brothættra byggðarlaga. Þótt mikilvægt sé að styðja við byggðir sem glíma við langvarandi fólksfækkun og veikleika þarf jafnframt að huga að því hvernig styrkja megi heila landshluta og þá byggðakjarna sem hafa burði til að veita þjónustu, skapa störf og efla þróun á stærri svæðum. Reynslan sýnir að efling sterkra kjarna getur haft jákvæð áhrif sem dreifast út til nærliggjandi byggða og aukið lífsgæði í landshlutanum öllum.
Í Norðurlandi vestra hefur íbúaþróun um langt skeið verið lakari en landsmeðaltal og því er brýnt að byggðastefna stjórnvalda taki mið af þeim áskorunum sem slíkur landshluti stendur frammi fyrir. Byggðarráð telur að markviss uppbygging innviða, atvinnulífs og þjónustu á svæðinu sé forsenda þess að snúa þeirri þróun við.
Byggðarráð leggur sérstaka áherslu á mikilvægi almenningssamgangna í dreifðum byggðum. Að mati ráðsins eru öflugar almenningssamgöngur einn mikilvægasti lykillinn að því að jafna lífskjör og tækifæri fólks óháð búsetu. Þetta á ekki síst við um aðgengi barna og ungmenna að íþrótta- og tómstundastarfi, menningu og annarri þjónustu. Börn sem búa á smærri stöðum njóta ekki sömu tækifæra og jafnaldrar þeirra á stærri þéttbýlisstöðum nema tryggðar séu reglulegar og aðgengilegar samgöngur. Byggðarráð telur að fjárfesting ríkisins í þessum málaflokki hafi hingað til verið langt undir því sem þörf er á og hvetur stjórnvöld til að gera þar verulegt átak.
Byggðarráð tekur jafnframt undir þau sjónarmið sem fram hafa komið um mikilvægi dreifðrar orkuvinnslu, orkuöryggis, orkuskipta og hringrásarhagkerfis. Ráðið telur rétt að við áframhaldandi vinnu verði sérstaklega horft til þeirra tækifæra sem felast í staðbundinni raforkuframleiðslu, orkugeymslum og nýjum lausnum sem geta styrkt byggðir og atvinnulíf um land allt. Hvítbókin leggur ríka áherslu á orkuöryggi, dreifðari orkuvinnslu og græna atvinnuuppbyggingu og tekur byggðarráð undir þá stefnu.
Byggðarráð telur einnig að nýta megi ákvæði laga um Menntasjóð námsmanna með markvissari hætti til að jafna raunverulegt aðgengi að háskólanámi. Þótt formlegt aðgengi að námi sé hið sama fyrir alla er kostnaðarstaða námsmanna mjög ólík eftir búsetu. Ungt fólk á höfuðborgarsvæðinu getur í mörgum tilvikum búið í foreldrahúsum meðan á námi stendur og lokið námi án verulegrar skuldsetningar, en nemendur af landsbyggðinni þurfa oft að standa straum af húsnæði, fæði, samgöngum og öðrum framfærslukostnaði vegna náms sem ekki er í boði í heimabyggð eða í fjarnámi. Byggðarráð telur eðlilegt að Menntasjóður námsmanna verði nýttur með virkari hætti til að mæta þessum aðstöðumun og jafna þannig tækifæri ungs fólks til náms óháð búsetu.
Byggðarráð fagnar sérstaklega aðgerð um umferðarminni tengivegi þar sem lagt er til að hönnunarforsendur og staðlar við uppbyggingu vegakerfisins verði endurskoðaðir með það að markmiði að flýta lagningu bundins slitlags á umferðarminni leiðum með einfaldari og hagkvæmari hætti. Byggðarráð telur mikilvægt að horft sé með raunhæfum hætti til kostnaðar og ábata þeirra framkvæmda sem ráðist er í, enda er víða á landsbyggðinni löng bið eftir nauðsynlegum samgöngubótum. Ef unnt er að hraða uppbyggingu tengivega án þess að skerða öryggi er það mikilvægt framfaraskref fyrir íbúa og atvinnulíf landsbyggðarinnar.
Að lokum fagnar byggðarráð þeirri stefnumörkun sem fram kemur í Hvítbók um byggðamál og telur að þar séu mörg mikilvæg skref stigin í átt að öflugri og sjálfbærari byggðum um land allt. Byggðarráð leggur þó ríka áherslu á að markmið áætlunarinnar nái aðeins fram að ganga ef þeim fylgir raunverulegt og nægilegt fjármagn. Jafna þarf stöðu fólks óháð búsetu með fjárfestingu í þeim innviðum sem skipta mestu máli fyrir daglegt líf fólks, svo sem almenningssamgöngum, menntun, heilbrigðisþjónustu, fjarskiptum og samgöngumannvirkjum.
Að mati byggðarráðs er lykillinn að árangursríkri byggðastefnu ekki einungis að styðja við einstök brothætt samfélög heldur jafnframt að efla landshlutana í heild og styrkja þá byggðakjarna sem veita þjónustu, skapa störf og draga þrótt til nærliggjandi svæða. Með markvissri stefnu og raunhæfum fjármunum er unnt að skapa jafnvægi í búsetuskilyrðum og tryggja að fólk um allt land njóti sambærilegra tækifæra til menntunar, atvinnu, þjónustu og þátttöku í samfélaginu, óháð því hvar það kýs að búa.

Lögð fram til kynningar lokaskýrsla um hreinsunar- og úrbótaaðgerðir vegna jarðvegsmengunar á Hofsósi sem unnin var af Verkís og dagsett er í júní 2026. Í skýrslunni kemur fram að hreinsunar- og mótvægisaðgerðir sem ráðist var í vegna mengunarinnar hafi borið fullnægjandi árangur og að mælingar sýni að styrkur mengunarefna í jarðvegslofti og innilofti sé innan viðmiðunarmarka. Eftirfylgnivöktun staðfestir jafnframt að mengun hafi ekki tekið sig upp að nýju eftir að hreinsunarbúnaður var tekinn úr notkun.

Byggðarráð fagnar því að þessum mikilvæga áfanga sé náð og að unnin hafi verið heildstæð samantekt á framkvæmd aðgerða, vöktun og árangri þeirra.

Jafnframt lýsir byggðarráð yfir áhyggjum af stöðu og framtíðarþróun þeirra eigna sem urðu fyrir áhrifum mengunarinnar og mikilvægi þess að skýra næstu skref. Byggðarráð felur sveitarstjóra að taka saman yfirlit um stöðu þeirra eigna sem urðu fyrir áhrifum mengunarinnar og eiga í framhaldi af því samtal við Festi, móðurfélag N1, um áform félagsins með húseignir þess á Hofsósi, þar á meðal fyrrum bensínafgreiðslu við Skólagötu, með það að markmiði að leita farsællar niðurstöðu um framtíð svæðisins.

Kauptilboð hefur borist í eignina Háholt, fasteignanúmer F2241037.

Byggðarráð samþykkir samhljóða að hafna tilboðinu og felur Fasteignasölu Sauðárkróks að svara tilboðinu.

Kauptilboð hefur borist í eignina Háholt, fasteignanúmer F2241037.

Byggðarráð samþykkir samhljóða að svara tilboðinu með gagntilboði og felur Fasteignasölu Sauðárkróks að svara tilboðinu.