Byggðarráð Skagafjarðar

Magnús Jónsson, formaður Drangeyjar - smábátafélags Skagafjarðar sat fundinn undir þessum lið í gegnum fjarfundarbúnað. Einnig mættu til fundarins Þorvaldur Steingrímsson og Steindór Árnason.

Magnús fór þess á leit við byggðarráð í tölvupósti dagsettum 19. janúar 2026 að koma inn á fund byggðarráðs til að ræða úthlutun byggðakvóta á yfirstandandi fiskveiðiári.

Málefni byggðakvóta rædd.

Fært í trúnaðarbók.

Ívar Pálsson lögmaður sat fundinn undir þessum lið í gegnum fjarfundarbúnað.

Víðimýri 10 var auglýst til sölu 6. nóvember sl. og fljótlega barst eitt tilboð í eignina. Áður en gengið var til kaupsamnings um eignina koma í ljós mistök af hálfu fasteignasala við undirbúning sölu íbúðarinnar sem leiddi til þess að ekki var hægt að ganga frá kaupsamningi.

Sveitarfélaginu ásamt Landmark fasteignasölu barst kröfubréf, dagsett 12. janúar 2026, frá Jónasi Erni Jónassyni lögmanni hjá Reykvískum lögmönnum fyrir hönd bjóðenda í íbúðina.

Ívar Pálsson fór yfir málið.

Byggðarráð samþykkir samhljóða að fela Ívari að vinna málið áfram.

Lagt fram álit siðanefndar Sambands íslenskra sveitarfélaga um meint brot á siðareglum kjörinna fulltrúa í Skagafirði. Í álitinu kemur fram að siðanefnd telur sig ekki hafa vald til að úrskurða um hvort brotið hafi verið gegn siðareglunum. Fram kemur jafnframt að siðanefnd fái ekki séð af gögnum málsins að umræddur fulltrúi hafi nýtt stöðu sína sem þáverandi formaður fræðslunefndar í þágu einkahagsmuna sinna eða fjölskyldu sinnar. Ákjósanlegra hefði þó verið að mati nefndarinnar ef aðrar leiðir hefðu verið farnar í umræddu máli.
Einnig lagðar fram athugasemdir sveitarstjóra Skagafjarðar við álit siðanefndar þar sem fram kemur mat hans að siðanefnd hafi farið út fyrir starfssvið sitt með því að fjalla um framgöngu hins kjörna fulltrúa utan starfa hans fyrir sveitarfélagið. Með því sé verið að gefa fordæmi fyrir mörg sveitarfélög. Brýnt sé að stjórn Sambandsins tryggi að starfsemi siðanefndar sé innan þeirra marka sem lög og reglur setja, og að réttarstaða kjörinna fulltrúa sé tryggð. Jafnframt gerði sveitarstjóri athugasemdir við málshraðareglur enda erindið upphaflega sent til siðanefndar 12. febrúar 2025.
Jafnframt lagður fram tölvupóstur frá yfirlögfræðingi Sambandsins, dags. 19. janúar 2026, þar sem fram kemur að álit siðanefndar frá 16. september 2025 sé endanlegt. Má þar nefna að þessi málsmeðferðatími er með öllu óeðlilegur og alvarlegt að Sambandið hafi ekki verið skýrt um það að álit frá 16. september væri endanlegt og ekki gefið svör um það fyrr en í seinni hluta janúar.
Einnig tölvupóstur dags. 21. janúar 2026, þar sem fram kemur bókun frá fundi stjórnar Sambands íslenskra sveitarfélaga í málinu frá því í desember, m.a. áhersla stjórnar á að almenn réttindi kjörinna fulltrúa séu höfð til hliðsjónar við vinnslu erinda þeim tengdum eins og kostur er.

Lögð fram fyrirspurn frá fulltrúa VG og óháðra, dags. 23. janúar 2025:

Sem kjörinn fulltrúi í sveitarstjórn Skagafjarðar óska ég eftir nánari upplýsingum um stöðu þess máls sem samþykkt var samhljóða á sveitarstjórnarfundi í febrúar 2025, þar sem meirihluti sveitarstjórnar lagði til að aflað yrði álits siðanefndar Sambands íslenskra sveitarfélaga á því hvort þáverandi formaður fræðslunefndar hefði brotið gegn siðareglum kjörinna fulltrúa í Skagafirði og hæfisreglum stjórnsýslulaga.

Undirrituð hefur nú fengið það svar frá lögfræðingi Sambands íslenskra sveitarfélaga að umrædd siðanefnd hafi þegar skilað áliti sínu vegna málsins til Sveitarfélagsins Skagafjarðar og því sé rétt sé að beina fyrirspurn um stöðu málsins til sveitarstjóra.

Með vísan til þess er hér með óskað eftir upplýsingum um eftirfarandi á byggðaráðsfundi:

Hvenær álit siðanefndar barst sveitarfélaginu?
Hvernig og hvar málið hefur verið tekið til umfjöllunar innan stjórnsýslu sveitarfélagsins?
Hvort og hvenær fyrirhugað er að kynna sveitarstjórn niðurstöðu siðanefndar og með hvaða hætti niðurstaðan verður gerð opinber?


Svör sveitarstjóra eru eftirfarandi:

Á 35. fundi sveitarstjórnar Skagafjarðar 12. febrúar 2025 var samhljóða samþykkt tillaga meirihluta sveitarstjórnar um að aflað yrði álits siðanefndar Sambands íslenskra sveitarfélaga á því hvort þáverandi formaður fræðslunefndar hafi brotið gegn siðareglum kjörinna fulltrúa í Skagafirði og hæfisreglum stjórnsýslulaga.
Álit siðanefndar Sambandsins barst sveitarfélaginu 16. september 2025. Sveitarstjóri sendi stjórn Sambands íslenskra sveitarfélaga athugasemdir við álitið 19. september 2025 og óskaði trúnaðar á því, enda slíkt eðlilegt á meðan athugasemdirnar væru teknar til efnislegrar meðferðar. Snéru þær athugasemdir að því að siðanefnd væri ekki að gefa álit sitt á störfum viðkomandi fulltrúa fyrir sveitarfélagið, svo sem siðareglur ná til, heldur hafi metið framgöngu hans utan starfa hans fyrir sveitarfélagið út frá öðrum mælikvörðum og gildum. Slíkt getur skapað fordæmi gagnvart störfum nefndamanna sveitarfélagsins utan sinna nefnda, sem og nefndamanna í sveitarstjórnum um land allt - á sama tíma og Samband íslenskra sveitarfélaga hefur unnið að því á núverandi kjörtímabili að bæta starfsumhverfi kjörinna fulltrúa. Upplýsti sveitarstjóri í kjölfarið oddvita framboðanna í Skagafirði, utan dagskrár á fundi byggðarráðs, um álitið og að hann hefði sent athugasemdir við það inn til stjórnar Sambandsins.
Við eftirgrennslan um stöðu málsins mánudaginn 19. janúar sl. fékk sveitarstjóri upplýsingar um lyktir málsins sem væru þær að niðurstaða siðanefndar Sambandsins frá 16. september væri endanleg. Óskaði sveitarstjóri í kjölfarið eftir að fá senda bókun stjórnar Sambandsins við meðferð málsins og fékk hana senda miðvikudaginn 21. janúar sl. Í henni kemur fram að á vettvangi Sambandsins sé starfsumhverfi kjörinna fulltrúa til umfjöllunar hverju sinni og því vilji stjórn vekja athygli á að almenn réttindi kjörinna fulltrúa séu höfð til hliðsjónar við vinnslu erinda þeim tengdum eins og kostur er.
Ljóst var þá að endanleg niðurstaða lægi fyrir og unnt væri að leggja þær niðurstöður fram á næsta byggðarráðsfundi Skagafjarðar, svo sem gert var. Óskaði sveitarstjóri einnig eftir að fá það erindi sem fór frá stjórn Sambandsins til Siðanefndar Sambandsins í kjölfar athugasemda sveitarstjóra Skagafjarðar varðandi mál kjörins fulltrúa, umbeðið lögfræðibréf sem sent var í kjölfarið, sem og svar siðanefndar til stjórnar Sambandsins. Þau gögn liggja nú fyrir og voru kynnt fyrr á dagskrá þessa fundar.

Lagður fram tölvupóstur frá Álfhildi Leifsdóttur, dagsettur 28. janúar 2026, svohljóðandi:
"Góðan dag

Ég óska eftir því að eftirfarandi erindi verði tekið fyrir á næsta fundi byggðaráðs, þrátt fyrir að það berist ekki innan þriggja sólarhringa fyrir boðaðan fund, í ljósi þeirra upplýsinga sem komu fram á íbúafundi í Fljótum í gær.

Vegna eignarhalds á félagsheimilinu Ketilás í Fljótum
Á fundi byggðaráðs þann 12. febrúar 2025 samþykkti byggðaráð eftirfarandi bókun:

"Byggðaráð samþykkir samhljóða að leita úrlausnar fyrir dómstólum á eignarhaldi félagsheimilanna Melsgils, Árgarðs, Ketiláss og Höfðaborgar. Eignarhald á öðrum félagsheimilum liggur fyrir. Byggðaráð felur Sunnu Björk Atladóttur að fara með málið fyrir hönd sveitarfélagsins."
Á fundi byggðaráðs þann 27. maí 2025 komu fulltrúar Kvenfélagsins Framtíðar í Fljótum á fundinn til að ræða eignarhald félagsins í Ketilási. Fulltrúar kvenfélagsins töldu sig geta sýnt fram á 17% eignarhlut félagsins í húsinu. Í minnisblaði um eignarhald sem lá fyrir á fundinum kom fram að eignarhluta Kvenfélagsins Framtíðar í Ketilási væri ekki getið, en jafnframt að félagið hefði sýnt áhuga á eignaraðild að húsinu á sínum tíma. Þar kom einnig fram eftirfarandi:

"Sveitarfélagið gæti farið í eignardómsmál og krafist þess að vera skráð 100% eigandi að húsinu."
Samtal á fundinum var gott og í framhaldi þess var eftirfarandi bókað:

"Byggðaráð samþykkir samhljóða að fela sveitarstjóra að vinna málið áfram í samvinnu við Kvenfélagið Framtíðina."
Það var skilningur undirritaðrar að með þessari samvinnu yrðu lögð fram þau gögn sem skýra eignarhluta hvors aðila um sig, og að í framhaldi yrði eignarhald skráð og þinglýst með eðlilegum og samkomulagsbundnum hætti.

Í stefnu sveitarfélagsins í eignardómsmáli Ketiláss er hins vegar kveðið á um allt aðra afstöðu. Þar segir meðal annars:

"Stefnandi krefst þess að honum verði dæmdur eignaréttur að fasteigninni Ketilás, Skagafirði, fasteignanúmer 214-4081, ásamt öllu sem þeirri fasteign fylgir og fylgja ber."
Og enn fremur:

"Stefnandi kveðst ekki vita betur en að hann sé sá eini sem geti talið til nokkurs réttar yfir fasteigninni. Allt frá sameiningu Skagafjarðar árið 1998 hefur stefnandi staðið straum af rekstrar- og viðhaldskostnaði fasteignarinnar. Liðin eru 27 ár frá því stefnandi tók við fasteigninni og hefur síðan þá staðið einn undir kostnaði við rekstur og viðhald hennar, þ.e. gjöldum, sköttum og öðrum skyldum. Þær framkvæmdir sem farið hefur verið í á þeim tíma hafa allar verið kostaðar af stefnanda. Stefnandi telur því að hann hafi haft fasteignina til umráða í fullan hefðartíma án þess að nokkur hafi gert tilkall til hennar. Einnig telur stefnandi líklegt að hann hafi eignast fasteignina fyrir hefð, enda hafi óslitið eignarhald staðið í rúm 27 ár, en skilyrði hefðar er 20 ára óslitið eignarhald á fasteign..."
Undirrituð getur ekki lagt þann skilning í umræður né þær bókanir sem samþykktar voru af byggðaráði að þar hafi falist samþykki fyrir því að sveitarfélaginu yrði dæmdur fullur eignarréttur að fasteigninni Ketilás. Þvert á móti var skýr skilningur undirritaðrar sá að málið yrði unnið áfram í samvinnu við Kvenfélagið Framtíðina með það að markmiði að skýra og staðfesta eignarhluta hvors aðila um sig á grundvelli fyrirliggjandi gagna. Því er ljóst að málið hefur ekki farið í þann farveg sem umræður á fundi byggðaráðs og samþykkt bókun gáfu tilefni til að ætla, heldur hefur verið tekin afstaða í stefnu sveitarfélagsins sem gengur mun lengra en samkomulagið fól í sér og er í ósamræmi við þann skilning sem undirritað hafði á framvindu málsins.

Í ljósi þess sem hér hefur verið rakið gera fulltrúar VG og óháð þá skýlausu kröfu að eignardómsmál á grundvelli hefðarréttar, þar sem krafist er fulls eignarhalds sveitarfélagsins, verði umsvifalaust fellt niður. Jafnframt er þess krafist að eignarhald Kvenfélagsins Framtíðar í Ketilási verði skýrt á grundvelli þeirra gagna sem fyrir liggja og að eignarhlutar verði skráðir og þinglýstir í samræmi við það, með eðlilegum og gagnsæjum hætti.

Álfhildur Leifsdóttir, VG og óháðum"

VG og óháð leggja fram eftirfarandi tillögu:
"Að eignardómsmál á grundvelli hefðarréttar, þar sem krafist er fulls eignarhalds sveitarfélagsins, verði umsvifalaust fellt niður. Jafnframt að eignarhald Kvenfélagsins Framtíðar í Ketilási verði skýrt á grundvelli þeirra gagna sem fyrir liggja og að eignarhlutar verði skráðir og þinglýstir í samræmi við það, með eðlilegum og gagnsæjum hætti."

Byggðarráð hafnar samhljóða framlagðri tillögu.

Fulltrúar Byggðalista, Framsóknarflokks og Sjálfstæðisflokks óska bókað:
"Ákvörðun um að fela lögmanni að leita úrlausnar fyrir dómstólum á eignarhaldi félagsheimilanna Melsgils, Árgarðs, Ketiláss og Höfðaborgar var samþykkt samhljóða í byggðarráði Skagafjarðar 12. febrúar 2025. Afgreiðsla málsins var jafnframt staðfest með öllum greiddum atkvæðum á fundi sveitarstjórnar Skagafjarðar 12. mars 2025.
Hjá embætti Sýslumannsins á Norðurlandi vestra er fasteignin Ketilás skráð sem misræmismál. Misræmismál er flokkur eigna þar sem eignarhaldið er óljóst og unnið að því hjá HMS að skýra eignarhaldið. Staðfesting frá HMS liggur fyrir um að Ketilás sé í flokki misræmismála. Engir þinglýstir eigendur eru skráðir að félagsheimilinu Ketilási.
Þegar farið er í slíka leið fyrir dómstólum til að fá eignarhald á hreint til þinglýsingar gerir sá sem telur sig eiga tilkall til eignarhalds kröfu í 100% eignarhald viðkomandi fasteignar. Það er einfaldlega vegna þess að ekki er hægt að þinglýsa kröfu í hluta fasteignar ef enginn gerir kröfu um eignarhluta á móti. Með auglýsingu, sem birtist bæði í Stjórnartíðindum og Sjónhorni, er hins vegar kallað eftir því að hver sem telur sig eiga eignarhlut í viðkomandi fasteign gefi sig fram og sanni rétt sinn fyrir eigninni. Af þeim sökum var þessari sömu aðferð beitt við fyrrgreind félagsheimili.
Stefnan var gefin út 7. mars 2025, þingfesting var 8. apríl 2025. Veittur var ítrekaður frestur fyrir kvenfélagið Framtíðina til að skila inn greinargerð með sínum kröfum.
Á óvart kemur að Kvenfélagið Framtíðin kemur með þá kröfu fyrir dómi að málinu verði vísað frá dómi í stað þess að gera kröfu um 17% eignarhlut eins og kvenfélagið telur sig eiga og geta staðið undir. Það er allra hagur að þeir sem telja sig eiga eignarhlut í félagsheimilinu Ketilási komi fram með slíka kröfu, að niðurstaða fáist í málið og eignarhlutum verði þinglýst."

Fulltrúi VG og óháðra óskar bókað:
"VG og óháð hafa ekki lagt þann skilning hvorki í umræður né þær bókanir sem samþykktar voru af byggðaráði að þar hafi falist samþykki fyrir því að farið yrði fram á fyrir dómstólum að sveitarfélaginu yrði dæmdur fullur eignarréttur að fasteigninni Ketilás á grundvelli hefðarréttar. Þvert á móti var skilningur undirritaðrar sá að málið skyldi unnið áfram í samvinnu við kvenfélagið Framtíðina með það að markmiði að skýra og staðfesta eignarhluta hvors aðila um sig á grundvelli fyrirliggjandi gagna og ljúka málinu með dómssátt í samræmi við það, þar sem að í bókun byggðarráðs frá 27. maí 2025 segir: “Byggðarráð samþykkir samhljóða að fela sveitarstjóra að vinna málið áfram í samvinnu við kvenfélagið Framtíðina.? Að gera í framhaldi af þessu samtali kröfu um fullt eignarhald á forsendum hefðarréttar þegar gögn um eignarhluta kvenfélagsins Framtíðar liggja fyrir sýnir því miður ekki mikla samvinnu af hálfu sveitarfélagsins."

Lagt fram bréf frá Eignarhaldsfélaginu Brunabótafélagi Íslands, dagsett 27. janúar 2026, sem sent var til aðildarsveitarfélaga EBÍ. Í bréfinu er vakin athygli á því að sveitarfélögum stendur til boða að sækja um framlög úr sjóðnum. Styrktarsjóður EBÍ var stofnaður árið 1996 og er tilgangur sjóðsins að styrkja með fjárframlögum sérstakar athuganir eða rannsóknir á ýmsum þróunarþáttum í atvinnulífi, samgöngum, fræðslu- og menningarmálum í aðildarsveitarfélögum EBÍ. Ekki er hægt að sækja um styrk vegna almennra rekstrarverkefna sveitarfélaga. Sveitarfélag getur að öllu jöfnu ekki fengið úthlutað styrk 2 ár í röð. Frestur til að sækja um styrk úr sjóðnum er til loka febrúar n.k.

Byggðarráð samþykkir samhljóða að fela sveitarstjóra að vinna málið áfram í samræmi við umræður á fundinum.

Vísað frá 41. fundi félagsmála- og tómstundanefndar, 22. janúar 2026, þannig bókað:
"Málið áður á dagskrá 39. fundar nefndarinnar 27. október sl. tekið upp aftur til þess að uppfæra gjaldskrá. Nefndin samþykkir samhljóða uppfærða gjaldskrá og vísar til byggðaráðs."

Byggðarráð samþykkir samhljóða uppfærða gjaldskrá íþróttamannvirkja 2026 og vísar til afgreiðslu sveitarstjórnar.

Lögð fram umsagnarbeiðni úr máli 2026-003019, dagsett 19. janúar 2026 frá embætti sýslumannsins á Norðurlandi vestra, þar sem óskað er umsagnar um umsókn Friðriks Rúnars Friðrikssonar, kt. 141156-5009, Laugarhvammi, 561 Varmahlíð um leyfi til reksturs Veitingaleyfi í Flokkur III-G Samkomusalir í Félagsheimilinu Árgarði, fastanúmer F214-1225, Steinstaðahverfi 561 Varmahlíð fyrir allt að 300 gesti.

Byggðarráð samþykkir samhljóða að gera ekki athugasemd við umsóknina.

Lögð fram umsagnarbeiðni úr máli 2026-005316, dagsett 23. janúar 2026 frá embætti sýslumannsins á Norðurlandi vestra, þar sem óskað er umsagnar um umsókn Stikla ehf., kt. 640512-0910, Vestursíðu 1E, 603 Akureyri um leyfi til reksturs Gististaðir í Flokkur II - C Minna gistiheimili í Húsey Country Guesthouse, Húsey 1, F250-6534, 561 Varmahlíð fyrir allt að 10 gesti.

Byggðarráð samþykkir samhljóða að gera ekki athugasemd við umsóknina.

Umhverfis-, orku- og loftslagsráðuneytið kynnir til samráðs mál nr. 3/2026, "Frumvarp til laga um breytingu á ýmsum lögum vegna einföldunar regluverks og aukinnar skilvirkni eftirlits með hollustuháttum og mengunarvörnum".

Umsagnarfrestur er til og með 17.02. 2026.

Byggðarráð Skagafjarðar mótmælir eindregið þeim áformum sem koma fram í framlagðu frumvarpi um að flytja allt eftirlit með hollustuháttum og mengunarvörnum frá heilbrigðiseftirlitum sveitarfélaga til Umhverfis- og orkustofnunar og að eftirlit með matvælum flytjist til Matvælastofnunar. Með frumvarpinu er lagt til að núverandi heilbrigðiseftirlit sveitarfélaga verði lagt niður og að rúmlega 70% af starfsemi þeirra, sem jafnframt eru tekjuberandi verkefnin, flytjist frá sveitarstjórnarstigi til ríkisins. Þessi breyting kollvarpar rekstrargrundvelli heilbrigðiseftirlitanna og skilur sveitarfélög eftir með verkefni sem eru þjónustuháð, tekjulítil og í mörgum tilvikum ófjármögnuð.

Ljóst er að breytingarnar munu hafa verulega neikvæð áhrif á landsbyggðina. Heilbrigðiseftirlit sveitarfélaga hafa áratuga reynslu af stöðugri og staðbundinni þjónustu sem byggir á þekkingu á aðstæðum, svæðum, áhættumatsháttum og atvinnulífi. Sú sérþekking sem er undirstaða hraðra viðbragða, tapast ef verkefnin eru færð í miðlægt kerfi ríkisstofnana. Þrátt fyrir fullyrðingar um að störfum verði fjölgað á landsbyggðinni er ekkert í frumvarpinu sem tryggir slíkt. Þvert á móti er hætt við að störf flytjist frá svæðinu og að sérfræðingar, sem búa í nærumhverfi sveitarfélaga, missi starf eða velji að starfa í stærri þéttbýliskjörnum þar sem stofnanirnar eru með meginstarfsemi sína.

Byggðarráð telur sérlega mikilvægt að á það sé bent að ekkert í athugasemdum Eftirlitsstofnunar EFTA (ESA) kallar á niðurlagningu staðbundinna stjórnvalda eða heilbrigðiseftirlita. Ábendingar ESA snúa fyrst og fremst að samræmingu, skýrari ábyrgð og sameiginlegum upplýsingakerfum, en öll þau markmið má uppfylla án þess að leggja niður heilbrigðiseftirlitin. Frumvarpið gengur því töluvert lengra en nauðsynlegt er og er hvorki útskýrt né rökstutt með fullnægjandi hætti hvers vegna meðalhófs sé ekki gætt og vægari og hagkvæmari úrræði, svo sem styrkt samræmingarhlutverk ríkisstofnana, innleiðing sameiginlegs upplýsingakerfis og skýrari verkaskipting séu ekki valin.

Eitt af áhyggjuefnum byggðarráðs er hætta á þjónusturofi við yfirfærslu verkefnanna. Frumvarpið gerir ráð fyrir að allar breytingar taki gildi 1. janúar 2027 og felur í sér að heilbrigðiseftirlit sveitarfélaga verði lögð niður á sama tíma og ríkið tekur við öllum verkefnum á tveimur stofnunum. Slík framkvæmd er áhættusöm. Fyrir liggur að fjöldi starfsmanna þarf að skipta um starfsvettvang, verklag og ábyrgð breytast, upplýsingakerfi þurfa að vera tilbúin og byrjað verður að vinna eftir verkferlum sem hafa ekki verið prófaðir í framkvæmd. Reynslan sýnir að jafn umfangsmiklar verkefnayfirfærslur taka að lágmarki nokkur ár í undirbúningi til að tryggja samfellda og trausta þjónustu. Hér er hins vegar gert ráð fyrir mjög skömmum aðlögunartíma og engum skýrum áætlunum um hvernig forðast eigi rof í eftirliti, leyfisveitingum eða bráðu viðbragði. Slíkt þjónusturof myndi bitna sérstaklega á rekstraraðilum sem þurfa leyfi eða endurnýjun leyfa, ferðaþjónustufyrirtækjum, matvælafyrirtækjum og smærri verslunum sem reiða sig á reglubundnar úttektir. Að auki bitnar þetta á sveitarfélögum sem missa aðgengi að skjótum ráðleggingum eða viðbrögðum vegna mengunaróhappa, atvika eða kvartanamála auk þess sem íbúar og atvinnulíf missa aðgang að skjótum og staðbundnum viðbrögðum fagfólks sem þekkir aðstæður.

Á sama tíma má leiða líkur að því að flóknar boðleiðir innan ríkiskerfisins, takmarkaður aðgangur að starfsmönnum í nærsamfélaginu og aukið álag á fáum starfsmönnum muni skapa tafir, óvissu og síendurtekinn tvíverknað næstu árin á eftir.

Fjárhagsleg áhrif á sveitarfélög eru einnig umfangsmikil, þótt frumvarpið geri lítið úr þeim. Sveitarfélög munu þurfa að standa undir biðlaunakostnaði, breytingakostnaði, kostnaði við ráðningar sérfræðinga í ný verkefni og yfirfærslu staðbundinna úrlausnarefna sem fylgja engar tekjur með. Það að tekjustofnar heilbrigðiseftirlita sem eru í þessum tilvikum stærstu verkefnin eru teknir af sveitarfélögum án þess að bæta sveitarfélögum tekjumissinn, hlýtur að teljast skýr tilfærsla fjárhagslegs álags frá ríki til sveitarfélaga.

Byggðarráð ítrekar að einfaldari, skilvirkari og ódýrari leið er fyrir hendi, það er að styrkja samræmingu, verklag og upplýsingakerfi innan núverandi kerfis, án þess að leggja heilbrigðiseftirlitin niður. Sú leið myndi tryggja betri gæði, meiri samfellu og jafnt aðgengi að þjónustu um allt land.

Með vísan til alls framangreinds tekur byggðarráð Skagafjarðar undir umsögn og sjónarmið SHÍ að öllu leyti, telur frumvarpið ómótað, lítt rökstutt og líklegt til að rýra þjónustu við íbúa og atvinnulíf um land allt, og skorar á ráðherra að draga áformin til baka og hefja í staðinn frekara samráð við sveitarfélög og SHÍ um úrbætur sem byggja á raunhæfum, hagkvæmum og sanngjörnum lausnum.