Landbúnaðar- og innviðanefnd

Gunnar Björn verkefnastjóri hjá Skagafjarðarveitum og Hjörvar Halldórsson sviðstjóri Veitu- og framkvæmdasviðs fóru yfir minnisblað um rekstraröryggi og vinnslugetu jarðhitakerfa í Varmahlíð og Hrolleifsdal.
Landbúnaðar- og innviðanefnd samþykkir samhljóða að fela Gunnari Birni og Hjörvari að vinna málið áfram og í framhaldinu þarf svo að taka ákvörðun um lögn frá Dælislaug að Hrolleifsdal og um kaup á nýrri dælu í VH-12 í Varmahlíð.

Lagður fram fjárhagsrammi Skv- Vatnsveitu málaflokkur 63_ fyrir rekstrarárið 2026.
Árni Egilsson skrifstofustjóri fór yfir ramma Vatnsveitu.
Landbúnaðar- og innviðanefnd samþykkir fjárhagsrammann samhljóða.

Lagður fram fjárhagsrammi Skv- Sjóveitu málaflokkur 65_ fyrir rekstrarárið 2026.
Árni Egilsson skrifstofustjóri fór yfir ramma sjóveitu.
Landbúnaðar- og innviðanefnd samþykkir fjárhagsrammann samhljóða.

Lagður fram fjárhagsrammi Skv- Hitaveitu málaflokkur 63_ fyrir rekstrarárið 2026.
Árni Egilsson skrifstofustjóri fór yfir ramma Vatnsveitu.
Landbúnaðar- og innviðanefnd samþykkir fjárhagsrammann samhljóða.

Á fundi Landbúnaðar- og innviðanefndar þann 12. júní sl. var rætt um fjarskiptasamband í Skagafirði og þá staðreynd að fjarskiptafyrirtækin hafa ákveðið að loka dreifikerfi GSM þ.e.a.s 2G og 3G þjónustu. Fyrir liggur skýrsla frá Fjarskiptastofu um þessa útfösun og helstu ástæður hennar en þar virðist vega þyngst sú staðreynd að þessi tvö dreifinet teljast orðin úrelt tæknilega séð ásamt því að rekstur þeirra sé fjarskiptafyrirtækjunum óhagkvæmur. Ekki hefur tekist að fá upplýsingar frá fjarskiptafyrirtækjunum um fjölda senda sem lokað verður en ljóst er af útbreiðslukortunum á heimasíðu Fjarskiptastofnunnar að þeir eru nokkrir í Skagafirði.
Landbúnaðar og innviðanefnd lýsir yfir miklum áhyggjum af þessari breytingu og þá sérstaklega að það eigi að loka 3G dreifikerfinu, en bæði samkvæmt fyrirliggjandi útbreiðslukortum og reynslu okkar í raunheimum að þá eru símar íbúa í Skagafirði mjög oft að nota það kerfi vegna þess að 4G og hvað þá 5G eru engan veginn að dekka þau svæði sem þau eru sögð dekka á umræddum útbreiðslukortum. Það þekkjum við vel af reynslunni og ef fylgst er með því kerfi sem viðkomandi símtæki notar á mismunandi stöðum má mjög oft sjá að einungis 3G net er í boði fyrir GSM síma.
Landbúnaðar- og innviðanefnd skorar á fjarskiptafyrirtækin öll að endurskoða þessa lokun og láta hana ekki taka gildi fyrr en tryggt er í það minnsta að 4G dreifikerfið nái sannarlega til þeirra svæða sem 3G er að dekka í dag en þau eru fjölmörg um allan Skagafjörð og þá sérstaklega á svæðum utan þéttbýlisstaðanna. Jafnframt óskum við eftir að Fjarskiptastofa svari formlega með hvaða hætti þeir ætli að tryggja að þjónusta við GSM símakerfið skerðist ekki frá núverandi stöðu um næstu áramót við þessa breytingu.

Lögð fram umsókn frá Stefaníu Ingu Sigurðardóttur um leyfi til búfjárhalds í þéttbýli.
Landbúnaðar- og innviðanefnd samþykkir umsóknina samhljóða.

Lögð fram umsókn frá Heimi Guðmundssyni um leyfi til búfjárhalds í þéttbýli.
Landbúnaðar- og innviðanefnd samþykkir samhljóða að fela landbúnaðarfulltrúa óska eftir frekari upplýsingum varðandi húsakost og bendir á að fjöldi hrossa á Nöfum má ekki vera nema 5.

Umhverfis-, orku- og loftslagsráðuneytið kynnir til samráðs mál nr. 147/2025, "Áform um frumvarp til laga um breytingu á lögum nr. 162/2002 um úrvinnslugjald".

Kynning á urðunartölum eftir upptökusvæðum fyrir fyrstu sex mánuði ársins. Sé eingöngu horft á tölur um urðun úr Skagafirði er ánægjulegt að sjá að blandaður úrgangur frá heimilum heldur áfram að dragast saman, en því miður eykst blandaður úrgangur frá fyrirtækjum til urðunar. Í heildina minnkar urðað magn úr Skagafirði lítillega sem er jákvætt.