Fjarskiptasamband í Skagafirði

Lögð fram fyrirspurn frá Sólborgu Sigurrósu Borgarsdóttur, fulltrúa sjálfstæðismanna í landbúnaðar- og innviðanefnd, svohljóðandi:
"Fjarskiptamál í Skagafirði

Nú stendur til að fella niður senda 2g og 3g á landinu.
https://www.ruv.is/frettir/innlent/2025-05-27-ymis-taeki-haetta-ad-virka-thegar-slokkt-verdur-a-2g-og-3g-444810
Hver er staðan á fjarskiptamálum í Skagafirði?
Liggur fyrir hve stórt svæði bæði í byggð og upp á hálendi sem er án samband eða í mjög slæmu sambandi?
Er til framtíðarskipulag á uppsetningu senda á þessu svæði?
Er sendum haldið réttilega við til að tryggja öryggi íbúa og gesta á svæðinu?
Hvaða yfirsýn höfum við um stöðuna?"

Landbúnaðar- og innviðanefnd lýsir áhyggjum af hugsanlegum neikvæðum áhrifum þess að öllum 2G og 3G sendum í Skagafirði verði lokað frá og með næstu áramótum. Landbúnaðar- og innviðanefnd samþykkir samhljóða að að fela sviðstjóra Veitu- og framkvæmdasviðs að afla upplýsinga frá Fjarskiptastofu um fjölda senda í Skagafirði sem lagðir verða af og hugsanleg áhrif þess á fjarskipti í Skagafirði.

Á fundi Landbúnaðar- og innviðanefndar þann 12. júní sl. var rætt um fjarskiptasamband í Skagafirði og þá staðreynd að fjarskiptafyrirtækin hafa ákveðið að loka dreifikerfi GSM þ.e.a.s 2G og 3G þjónustu. Fyrir liggur skýrsla frá Fjarskiptastofu um þessa útfösun og helstu ástæður hennar en þar virðist vega þyngst sú staðreynd að þessi tvö dreifinet teljast orðin úrelt tæknilega séð ásamt því að rekstur þeirra sé fjarskiptafyrirtækjunum óhagkvæmur. Ekki hefur tekist að fá upplýsingar frá fjarskiptafyrirtækjunum um fjölda senda sem lokað verður en ljóst er af útbreiðslukortunum á heimasíðu Fjarskiptastofnunnar að þeir eru nokkrir í Skagafirði.
Landbúnaðar og innviðanefnd lýsir yfir miklum áhyggjum af þessari breytingu og þá sérstaklega að það eigi að loka 3G dreifikerfinu, en bæði samkvæmt fyrirliggjandi útbreiðslukortum og reynslu okkar í raunheimum að þá eru símar íbúa í Skagafirði mjög oft að nota það kerfi vegna þess að 4G og hvað þá 5G eru engan veginn að dekka þau svæði sem þau eru sögð dekka á umræddum útbreiðslukortum. Það þekkjum við vel af reynslunni og ef fylgst er með því kerfi sem viðkomandi símtæki notar á mismunandi stöðum má mjög oft sjá að einungis 3G net er í boði fyrir GSM síma.
Landbúnaðar- og innviðanefnd skorar á fjarskiptafyrirtækin öll að endurskoða þessa lokun og láta hana ekki taka gildi fyrr en tryggt er í það minnsta að 4G dreifikerfið nái sannarlega til þeirra svæða sem 3G er að dekka í dag en þau eru fjölmörg um allan Skagafjörð og þá sérstaklega á svæðum utan þéttbýlisstaðanna. Jafnframt óskum við eftir að Fjarskiptastofa svari formlega með hvaða hætti þeir ætli að tryggja að þjónusta við GSM símakerfið skerðist ekki frá núverandi stöðu um næstu áramót við þessa breytingu.

Á fundum Landbúnaðar- og innviðanefndar þann 12. júní sl. og 19. ágúst lýsti nefndin áhyggjum sínum af fyrirhugaðri lokun á 2G og 3G dreifikerfa farsíma um næstu áramót og þá sérstaklega að lokun þeirra skerði þjónustu við GSM símanotendur í Skagafirði, og reyndar á landinu öllu.
Nefndinni hafa nú borist svör um viðhorf þriggja fjarskiptafyrirtækja, Símans, Nova og Sýnar. Um svörin má almenn segja að símafyrirtækin hafa ekki alveg sömu áhyggjur og nefndin um neikvæð áhrif breytinganna og segja að 4G og 5G kerfin verði efld á móti. Í svarinu frá Símanum kemur fram að bæta eigi afköst núverandi 4G senda ásamt því að setja eigi upp nýja 5G senda í Varmahlíð, Hólum, Hegranesi og Sauðárkróki á næstu 12-18 mánuðum. Frá Nova komu þær upplýsingar að núverandi þjónustusvæðið myndi ekki minnka en þeir eru nú þegar byrjaðir að fækka 3G sendum sem þeir segja að muni í raun hafa jákvæð áhrif á nýtingu og dreifingu 4G kerfisins, þar sem símar eru ekki flakka á milli 3G og 4G kerfanna. Sýn sendi okkur svör sem innihéldu meðal annars þær upplýsingar að 4G kerfið myndi eflast við lokun sendanna, bæði vegna tækniatriða en eins vegna þess að þeir ætla að fjölga sendum og verður t.d. nýr 4G sendir settur upp á Laufásum í ár ásamt því að á næstu tveimur árum verður annar búnaður endurnýjaður eða uppfærður ásamt því að fyrir liggur 5 ára áætlun um fjölgun 5G senda, sem hefst á næsta ári í Skagafirði. Jafnframt kom fram í svari Sýnar að dekkun á 4G er í dag meiri í heildina en 2G og 3G voru samanlagt þegar mest var hjá þeim.
Landbúnaðar- og innviðanefnd þakkar svörin og vonar að þær aðgerðir sem símafyrirtækin ætli að ráðast í tryggi öruggt farsímasamband um allan fjörð. Engu að síður er mjög mikilvægt að íbúar sem upplifa skerta farsímaþjónustu í tengslum við þessa breytingu eða almennt slæmt símasamband í dag sendi tölvupóst á fjarskiptastofa@fjarskiptastofa.is með eftirfarandi upplýsingum:

- Nafn tilkynnanda, símanúmer og/eða tölvupóstfang
- Staðsetning þar sem skerðingin átti sér stað
- Hvernig er sambandið núna? (Ekkert / Næst ekki innanhúss / Léleg gæði)
- Hvernig var sambandið áður?
- Hvenær varð breytingin?
- Hjá hvaða fyrirtæki er farsímaþjónustan keypt?
- Hvaða tegund símtækis er notuð?
- Er búið að hafa samband við fjarskiptafyrirtækið?

Landbúnaðar- og innviðanefnd mun halda áfram að fylgjast með þróun þessara mála og leita þegar nær dregur áramótum upplýsinga frá Fjarskiptastofu um fjölda ábendinga úr Skagafirði og þá reyna að fylgja því eftir að úrbætur verði gerðar.