Félagsmála- og tómstundanefnd

Lagður fram tölvupóstur foreldra, iðkenda 8. flokks stúlkna í körfubolta Tindastóls /Skallagríms þar sem sótt er um styrk í afreksíþróttasjóð ungmenna í Skagafirði vegna þátttöku flokksins á fjölliðamóti í Svíþjóð n.k. vor. Með vísan í reglur um afreksíþróttasjóð ungmenna í Skagafirði er erindinu hafnað, þar sem sjóðnum er ætlað að styrkja ungmenni til þátttöku í landsliðsverkefnum. Nefndin óskar iðkendum góðs gengis á mótinu.

Málið áður á dagskrá 39. fundar nefndarinnar 27. október sl. tekið upp aftur til þess að uppfæra gjaldskrá. Nefndin samþykkir samhljóða uppfærða gjaldskrá og vísar til byggðaráðs.

Lagt fram minnisblað frá leiðtoga frístunda- og íþróttamála um aðsóknartölur sundlauga í Skagafirði árið 2025. Aðsóknin var með miklum ágætum og voru til að mynda sett tvö aðsóknarmet, annars vegar sóttu tæplega 106.000 gestir allar þrjár laugarnar heim og hins vegar voru gestir í Sundlaug Sauðárkróks rétt rúmlega 57.000 talsins. Alls sóttu rúmlega 25.000 gestir laugina á Hofsósi og í Varmahlíð voru gestir laugarinnar um 23.800 talsins árið 2025.

Lagður fram tölvupóstur frá fulltrúa árgangs ´71 á Suðárkróki sem halda Króksblót 7. febrúar n.k. óskað er eftir lækkun leigugjalds á íþróttahúsinu á Sauðárkróki. Nefndin hafnar samhljóða erindinu á forsendum 4. gr. reglna um útleigu íþróttahúsa Skagafjarðar til skemmtanahalds. Nefndin óskar aðilum undirbúningshóps góðs gengis og skemmtunar.

Fundargerð Ungmennaráðs frá 24. október s.l. lögð fram til kynningar. Fundargerðina má nálgast á heimasíðu Skagafjarðar undir aðrar nefndir.

Föstudaginn 23. janúar mun Samband íslenskra sveitarfélaga standa fyrir málþingi um stefnu í málefnum fatlaðs fólks til framtíðar. Markmið málþingsins er að skapa vettvang fyrir opið samtal um framtíðarsýn, stefnumótun og áskoranir í veitingu þjónustu við fatlað fólk. Sveitarstjóri og leiðtogi fatlaðs fólks og eldra fólks sækja málþingið.

Lögð fram til kynningar 3. fundargerð ráðsins frá 8.janúar sl. Fundargerðina má nálgast á heimasíðu Skagafjarðar undir aðrar nefndir.

Lögð fram til kynningar fundargerð nr. 42 frá 19. janúar 2026

Lagt fram eitt mál, fært í trúnaðarbók.