Öldungaráð

Öldungaráð er skipað sjö fulltrúum. Þrír og þrír til vara eru tilnefndir af Félagi eldri borgara í Skagafirði. Þrír og þrír til vara eru tilnefndir af sveitarstjórn Skagafjarðar. Einn og einn til vara er tilnefndur af Heilbrigðisstofnun Norðurlands á Sauðárkróki. Aðalamenn frá FEBS eru Ingimar Jóhannsson, Gestur Þorsteinsson og Sigurjón Gestsson, til vara Ragna Jóhannsdóttir, Erna Geirsdóttir og Edda Haraldsdóttir. Aðalmenn frá sveitarstjórn eru Jóhanna Björnsdóttir, Merete Rabölle og Silvía Sif Halldórsdóttir, til vara Halldór Jón Sigurðsson, Sveinn Þ. Finster Úlfasson og Sigrún Eva Helgadóttir. Aðalmaður frá HSN er Selma Björt Magnúsdóttir, til vara Kristrún Snjólfsdóttir. Ráðið kýs sér sjálft formann og varaformann. Ingimar Jóhannsson kosinn formaður og Jóhanna Björnsdóttir kosin varaformaður.



Sveitarstjóri setti fund og bauð ráðsfólk velkomið til fyrsta fundar að loknum sveitarstjórnarkosningum. Stýrði lið eitt á dagskrá síðan tók nýkjörinn formaður við fundarstjórn.

Farið yfir Samþykktir fyrir öldungaráð sveitarfélagsins Skagafjarðar sem eru frá árinu 2022. Ráðið á að koma saman minnst fjórum sinnum á ári. Rætt um verkefni ráðsins og starfið framundan. Formaður lagði til breytingar á 2 gr. samþykktanna, í stað orðalagsins "Seta í öldungaráði er ólaunuð" komi orðalagið "Seta í öldungaráði er launuð" líkt og aðrar nefndir sveitarfélagsins. Tillagan samþykkt með sex atkvæðum. Vísað til félagsmála- og tómstundanefndar.

Lögð fram sex mál:

1. Stefna í málefnum eldri borgara. Formaður ræddi mikilvægi þess að sveitarfélagið mótaði sér stefnu í málefnum eldri borgara í Skagafirði. Vel var tekið í það, ákveðið að ræða það frekar á næsta fundi ráðsins.

2. Frístundastyrkur fyrir eldri borgara. Formaður ræddi mikilvægi þess að auka þátttöku eldri borgara í skipulagðri heilsueflingu, Skagafjörður er heilsueflandi sveitarfélag. Nefndin hvetur félagsmála- og tómstundanefnd að taka til umfjöllunar hvort skoða eigi að veita frístundastyrk til efnaminni eldri borgara.

3. Dagdvöl aldraðra. Samþykkt að óska eftir tölulegum upplýsingum um umsóknarferli, nýtingu plássa og biðlista.

4. Heimaþjónusta - stuðningsþjónusta. Samþykkt að óska eftir tölulegum upplýsingum um umsóknarferli og biðlista.

5. Matarsendingar í dreifbýli Skagafjarðar. Samþykkt að óska eftir upplýsingum um veitta þjónustu og biðlista.

6. íbúðir fyrir eldri borgara. Rætt hvort möguleiki á sé að unnin verði þarfagreining og gerð könnun á eftirspurn eldra fólks eftir blokkaríbúðum á Sauðárkróki með sameiginlegu þjónusturými og bílageymslu.