Byggðarráð Skagafjarðar

Skipulagsnefnd Skagafjarðar samþykkti samhljóða á 73. fundi nefndarinnar 9. maí sl. að leggja til við sveitarstjórn að auglýsa deiliskipulagstillögu fyrir "Sauðárkrókur Athafnarsvæði AT-403" í samræmi við 41. gr. skipulagslaga nr. 123/2010. Í þeirri tillögu er gert ráð fyrir 6 lóðum við Borgarbraut, nánar tiltekið númer 2, 4, 6, 8, 10 og 12.
Byggðarráð samþykkir samhljóða að auglýsa lóðirnar lausar til umsóknar með fyrirvara um staðfestingu sveitarstjórnar á endanlegu deiliskipulagi svæðisins. Dregið verður úr umsóknum verði fleiri en einn umsækjandi um lóð í samræmi við úthlutunarreglur sveitarfélagsins. Skipulagsfulltrúa er falið auglýsa lóðirnar í samræmi við úthlutunarreglur sveitarfélagsins að fenginni staðfestingu sveitarstjórnar.

Lögð fram tillaga frá Álfhildi Leifsdóttur fulltrúa VG og óháðra í byggðarráði svohljóðandi:

Byggðarráð Skagafjarðar samþykkir að komið verði á árlegri viðurkenningu til handa listamanni í Skagafirði sem hefur skarað fram úr í listsköpun sinni eða stuðlað að menningarstarfi í héraðinu.

Leitað verði eftir tilnefningum frá almenningi, félagasamtökum og stofnunum innan sveitarfélagsins, og Atvinnu-, menningar- og kynningarnefnd velji viðkomandi listamann hverju sinni úr innsendum tillögum. Viðurkenningin verði veitt við hátíðlega athöfn á þjóðhátíðardegi Íslendinga, 17. júní, ár hvert.

Með þessu er stuðlað að því að lyfta fram og heiðra listsköpun í héraðinu, styðja við menningarstarf og vekja athygli á fjölbreytileika og gæðum þeirrar lista sem eiga sér stað í Skagafirði.

Byggðarráð tekjur jákvætt í tillöguna og samþykkir samhljóða að vísa henni til umsagnar og frekari útfærslu í atvinnu-, menningar- og kynningarnefnd, m.a. hvað varðar skilgreiningu viðurkenningar til listamanna annars vegar og samfélagsverðlauna hins vegar og við hvaða tilefni viðurkenningin er afhent.

Lagður fram tölvupóstur frá Álfhildi Leifsdóttur dagsettur 8. maí 2025. Í tölvupóstinum ber Álfhildur upp fyrirspurn fyrir fund byggðarráðs, svohljóðandi:

VG og óháð óska eftir að fá upplýsingar um stöðu þeirrar vinnu sem bókað var um á fundi sveitarstjórnar Skagafjarðar 12. mars síðastliðinn sem varðar þau áform að kanna grundvöll þess, með auglýsingu, hvort áhugasamir aðilar hafi hug og getu til þess að sjá um rekstrarhald félagsheimilanna Ljósheima og í Rípurhreppi, áður en tekin verður ákvörðun um sölu þeirra.

Við óskum eftir svörum við eftirfarandi:

1. Hefur auglýsing þess efnis þegar verið birt, og ef svo er, hvenær og hvar?
2. Í upphaflegri bókun byggðaráðs eru áform um sölu á Ljósheimum, Félagsheimilisins í Rípurhreppi og Skagaseli. Ekki er rætt um Ljósheima í bókun meirihluta og Byggðalista á sveitarstjórnarfundi þann 12. mars. Hvaða áform eru með hlutverk Ljósheima fyrst þess er ekki getið í umræddri bókun?
3. Hver er tímarammi þess að þessi vinna ljúki áður en ákvörðun verður tekin um hugsanlega sölu?

Veitt eru eftirfarandi svör við fyrirspurninni:

1. Auglýsing eftir rekstraraðilum að félagsheimilinu Skagaseli og félagsheimili Rípurhrepps var birt á heimasíðu Skagafjarðar og í Sjónhorninu í morgun og hafa áhugasamir til mánaðarmóta að skila inn umsókn.

2. Ákveðið var á 79. fundi byggðarráðs þann 10. janúar 2024 að funda með hlutaðeigandi forsvarsmönnum félaga sem komið hafa að eignarhaldi eða rekstri félagsheimilanna Ljósheima, Skagasels og Félagsheimili Rípurhrepps, með hugsanlega sölu húsanna í huga. Á 82. fundi byggðarráðs þann 31. janúar 2024 var málið aftur á dagskrá og þá var samþykkt að óska eftir heimild menningar- og viðskiptaráðherra til að hefja söluferli félagsheimilanna þriggja í samræmi við lög um félagsheimili nr. 107/1970. Svar barst við því erindi frá ráðuneytinu 11. maí 2024, þar sem ekki voru gerðar athugasemdir við fyrirhugaða sölu. Á 100. fundi byggðarráðs samþykkti byggðarráð að bjóða upp á samtal við íbúa um fyrirhugaða sölu fyrrnefndra félagsheimila sem og gert var í hverju félagsheimilanna. Þar gafst íbúum kostur á að eiga samtal við fulltrúa byggðarráðs um áformin. Í kjölfar þeirra funda sköpuðust umræður um hvort skynsamlegt væri að bíða með áform um sölu Ljósheima þar til menningarhús á Sauðárkróki væri komið upp. Á þeim rökum byggði ákvörðun byggðarráðs á 135. fundi þess þegar ákveðið var að auglýsa eingöngu tvö félagsheimilanna til sölu, það eru félagsheimilið Skagasel og Félagsheimili Rípurhrepps. Á 137. fundi byggðarráðs var tekin ný ákvörðun þar sem ákveðið var að auglýsa fyrst eftir rekstraraðila að hvoru húsinu fyrir sig sem hefði áhuga á og getu til að taka við rekstri húsanna með þeim hætti að sveitarfélagið Skagafjörður beri engan kostnað af rekstri húsanna. Reynist enginn aðili áhugasamur um rekstur húsanna með þessum hætti verði félagsheimilin auglýst til sölu hæstbjóðenda. Að þessu frágengnu verður svo áfram unnið með íbúum og eigendum annarra félagsheimila að breyttri leiguleið eða sölu. Þess ber einnig að geta að byggðarráð samþykkti samhljóða að við sölu félagsheimila í Skagafirði skuli 10% af söluandvirði félagsheimilanna renna til Ungmennasambands Skagafjarðar (UMSS) og Sambands skagfirskra kvenna (SSK).

3. Umsóknarfrestur um rekstur félagsheimilisins Skagasels og Félagsheimili Rípurhrepps er til 1. júní næstkomandi. Eftir að umsóknarfresti lýkur liggur fyrir hvort áhugi sé fyrir því að taka við rekstri félagsheimilanna samkvæmt fyrirliggjandi skilmálum sem samþykktir voru á 137. fundi byggðarráðs þann 12. mars 2025.

Haraldur Sigfús Magnússon fyrir hönd Orku náttúrunnar ohf. óskar eftir leyfi sveitafélagsins Skagafjarðar til þess að fá að nýta þann styrk sem sveitafélagið fékk frá Loftlags- og orkusjóði í gegnum verkefnið "Orkuskipti 2024" til uppbyggingar hleðsluinnviða í Varmahlíð.

Orka náttúrunnar hefur ákveðið að fara í gríðarmikla fjárfestingu hleðsluinnviða í Varmahlíð og verkefnið fer senn að hefjast.

Verkefnið verður lyftistöng fyrir Varmahlíð og sem mun vera eftir sem áður vinsæl stoppustöð fyrir fólk á ferðalögum sem og nærsamfélagið.

Byggðarráð samþykkir samhljóða að verða við beiðni Orku náttúrunnar, um að nýta þann styrk sem sveitarfélagið fékk frá Loftslags- og orkusjóði, til uppbyggingar hleðsluinnviða í Varmahlíð.

Landsnet lagði fram til kynningar og umsagnar Kerfisáætlun 2025-2034 í samræmi við raforkulög. Landsnet leggur að þessu sinni fram þriggja ára framkvæmdaáætlun með kerfisáætlun. Kjarninn í kerfisáætlun er forgangsröðun framkvæmda til uppbyggingar flutningskerfisins. Í langtímaáætlun er kynnt hvaða framkvæmdir verði ráðist í á næstu 10 árum. Í framkvæmdaáætlun er greint nánar frá þeim framkvæmdum sem farið verður í á næstu þremur árum, hvaða valkostir hafi verið skoðaðir og hvað hafi ráðið vali. Einnig fylgir áætluninni umhverfismatsskýrsla.

Byggðarráð samþykkir samhljóða eftirfarandi umsögn:

Í fyrirliggjandi drögum að Kerfisáætlun Landsnets er fjallað um þau verkefni sem áformuð eru á árabilinu 2025-2034. Ljóst er að megin flutningslínur raforku til Skagafjarðar eru fulllestaðar og geta ekki borið meira rafmagn en þær gera í dag. Við þetta má bæta að Rangárvallalína sem liggur frá Varmahlíð til Akureyrar er elsti hluti byggðalínunnar á Íslandi, með tilheyrandi takmörkunum flutningsgetu, viðhaldsþörf og tapi á raforku. Byggðarráð fagnar því að gert sé ráð fyrir endurnýjun Rangárvallalínu með tilkomu Blöndulínu 3 og að ráð sé fyrir gert að framkvæmdir við þá línu hefjist á árinu 2026. Hið sama má segja um lagningu Holtavörðuheiðarlínu 1 og 3 en það er líka fagnaðarefni að ráð sé fyrir því gert að framkvæmdir við þær línur hefjist á árinu 2027. Byggðarráð harmar hins vegar að ekki sé gert ráð fyrir endurnýjun á Sauðárkrókslínu 1, sem er 66 kV loftlína sem var tekin í notkun árið 1954 og er því 71 árs gömul, en ástand hennar er ekki metið gott. Byggðarráð Skagafjarðar leggur því til að hún verði endurnýjuð hið fyrsta, að undangengnu mati á möguleikum þess að lagður verði 132 kV jarðstrengur í stað hennar við hlið Sauðárkrókslínu 2 eða með hringtengingu um Þverárfjall. Með aukningu á flutningsgetu rafstrengja til Sauðárkróks ásamt endurnýjun byggðalínunnar munu möguleikar héraðsins til orkuskipta og nýtingu endurnýjanlegrar raforku til fjölbreyttrar starfsemi aukast sem er mikilvægt fyrir alla framtíðar uppbyggingu í Skagafirði.