Félags- og tómstundanefnd Svf. Skagafjarðar

Steinn Leó Sveinsson, sviðsstjóri veitu- og framkvæmdasviðs, kom á fundinn og fór yfir þær framkvæmdir sem áætlaðar eru og eru í gangi á verkefnasviði nefndarinnar.

Lagt fram erindi frá UMSS með ósk um hækkun á styrk til sambandsins vegna reksturs skrifstofu og húsaleigu. Nefndin samþykkir að verða við hækkun sem nemur vísitölu frá 1. janúar 2013 til dagsins í dag að upphæð 180.000 krónur. Nefndin samþykkir jafnframt að við endurskoðun á samningi við UMSS á næsta ári verði sérstaklega skoðað að leita leiða til að lækka húsnæðiskostnað, þ.m.t. að skoða hvort húsnæði í eigu sveitarfélagsins geti nýst sambandinu og aðilarfélögum þess til skrifstofuhalds.

Kynnt var staða á greiddum styrkjum vegna íþrótta- og tómstundaiðkunar barna á tekjulágum heimilum. Alls hefur sveitarfélagið greitt út 25 styrki að upphæð tæpar 770.000 krónur.

Til umræðu var minnisblað frístundastjóra um öryggismál sundlauganna og hvaða skyldum sundlaugaverðir gegna samkvæmt reglugerð. Nefndin samþykkir að leita leiða í samstarfi við skólana um að uppfylla reglugerð um viðeigandi mönnun á meðan á skólasundi stendur. Vonast er til að ekki þurfi að koma til lokana sundlauga á meðan á skólasundi stendur á þessari önn en komi til þess verði þær lokanir auglýstar tímanlega. Fyrir næsta skólaár verður leitað leiða með skólastjórnendum um úrlausn.

Lögð fram umsókn frá Kvennaathvarfinu um rekstrarstyrk fyrir árið 2021. Nefndin samþykkir styrkveitingu að fjárhæð kr. 75.000 af málaflokki 02890. Ýmsir styrkir og framlög.

Félagsmálaráðuneytið kynnir til samráðs mál nr. 39/2021. Frumvarp til laga um breytingar á barnaverndarlögum nr. 80/2002 (barnaverndarþjónusta, umdæmisráð barnaverndar, samþætting o.fl. Umsagnarfrestur er til og með 24.02.2021. Félagsmálastjóri stiklaði á stóru um þær breytingar sem frumvarpið hefur í för með sér.

Farið var yfir stöðu biðlista eftir dagforeldri á Sauðárkróki. Elsta barnið á biðlistanum er fætt í apríl 2020. Ráðgert er að félagsmálastjóri og fræðslustjóri fundi með leikskólastjóra og eina starfandi dagforeldrinu á Sauðárkróki. Ekki þykir ástæða til að auglýsa eftir dagforeldrum á þessum tímapunkti.

Í áætlun félagsmálaráðuneytisins er að taka í notkun sérstakt ,,mælaborð" sem metur velferð barna í víðu samhengi. Á síðastu misserum hefur mælaborðið verið nýtt í tilraunaskyni hjá einu sveitarfélagi en nú er áformað að taka það í notkun í öllum sveitarfélögum landsins.

Lagðar fram bókanir byggðarráðs og ungmennaráðs Sveitarfélagsins Skagafjarðar. Félags- og tómstundanefnd tekur undir bókanir beggja aðila.

Lagt fram til kynningar bréf dags. 2.mars 2021 frá Jafnréttisstofu varðandi áhrif nýrrar jafnréttislöggjafar á sveitarfélög. Jafnréttislöggjöfin tekur nú tilliti til mun fleiri þátta en kynja eins og áður var.