Fræðslunefnd Svf. Skagafjarðar

Skóladagatöl fyrir leikskóla Skagafjarðar fyrir skólaárið 2012-2013 lögð fram og samþykkt. Jafnframt var kynnt athugasemd sem barst frá formanni foreldraráðs við leikskólann Tröllaborg um lokun leikskólans vegna starfsdaga

Lögð fram umsókn frá leikskólastjóra Ársala um að ráða starfsmann í 50% starf vegna umönnunar barns með sértæka erfiðleika. Beiðninni hafnað að sinni þar sem enn liggur ekki fyrir hver þörfin verður.

Lögð fram beiðni frá leikskólastjóra Ársala um að fá að stytta opnunartíma eldra stigs kl. 16:30 í stað 17:15 á næsta skólaári. Eins og staðan er ósk um vistun fyrir 5 börn á þessu tímabili. Fræðslunefnd samþykkir erindið.

Formaður leggur til að ákvörðun verði frestað til næsta fundar. Samþykkt.

Lagt fram erindi frá leikskólastjóra Ársala um fjölgun bílastæða við yngra stig leikskólans. Fræðslunefnd óskar eftir því að tæknideild sveitarfélagsins taki málið til skoðunar.

Lagt fram erindi frá leikskólastjóra Ársala um minnkun lóðar við yngra stig leikskólans. Fræðslunefnd óskar eftir því að tæknideild sveitarfélagsins taki málið til skoðunar.

Lagt fram bréf frá foreldrafélagi leikskólans Birkilundar í Varmahlíð, þar sem fram koma áhyggjur af því að dýrmætt útileiksvæði leikskólabarna tapist við flutning leikskólans í húsnæði grunnskólans. Fræðslunefnd áréttar að teikningar af lóð liggja ekki fyrir en ítrekar að þarfir barnanna verði að sjálfsögðu hafðar í forgangi við hönnun og frágang lóðar sem og alls húsnæðis, verði tillaga um flutning samþykkt í Samstarfsnefnd.

Skóladagatöl fyrir grunnskóla Skagafjarðar fyrir skólaárið 2012-2013 lögð fram og samþykkt.

Tillögur um kennslumagn grunnskólanna lagðar fram og samþykktar.

Ársskýrslur grunnskólanna fyrir skólaárið 2011-2012 lagðar fram.

Sjálfsmatsskýrslur Árskóla og Varmahlíðarskóla lagðar fram til kynningar.

Formaður leggur til að ákvörðun verði frestað til næsta fundar. Samþykkt.

Selma Barðdal, uppeldis- og sálfræðiráðgjafi, kynnti verkefnið ,,Vinaliðar", en grunnskólum Skagafjarðar býðst að vera frumkvöðull að þessu verkefni á Íslandi. Um er að ræða norskt kerfi sem miðar að því að draga úr einelti í frímínútum með jákvæðum verkefnum sem snúa beint að nemendum sjálfum. Fræðsluþjónustan hefur hlotið tvo styrki að upphæð kr. 1400 þús. króna til að hrinda þessu verkefni í framkvæmd og jafnframt hefur fræðsluþjónustunni verið boðið að kynna verkefnið á Sprotaþingi menntamálaráðuneytsins í haust. Fræðslunefnd fagnar verkefninu og hvetur grunnskólana til þátttöku í því.

Skóladagatal Tónlistarskóla lagt fram og samþykkt.

Ársskýrsla Tónlistarskóla Skagafjarðar lögð fram.

Þann 16. maí s.l. var haldinn fundur með starfsmönnum Grunnskólans austan Vatna og leikskólastjóra Tröllaborgar, þar sem kynntar voru tillögur að breytingum á skólahaldi austan Vatna. Ekki vannst tími til að funda með starfsmönnum leikskólans og foreldrum beggja skólastiganna og er lagt til að fundir með þeim verði haldnir í lok ágúst. Jafnframt er lagt til að hagsmunaaðilum verði gefinn kostur á að koma með breytingatillögur eða nýjar tillögur að fyrirkomulagi skólahalds sem taki gildi skólaárið 2013-2014. Vegna faglegs undirbúnings að breytingum er lögð áhersla á að ákvörðun liggi fyrir ekki síðar en í lok október 2012.

Kynnt var erindi frá mennta- og menningarmálaráðuneytinu þar sem óskað er eftir umsögnum hagsmunaaðila um drög að námssviða- og námskrárgreinahluta nýrrar aðalnámskrár grunnskóla. Umsagnir má gefa á vefsvæði ráðuneytisins og þurfa þær að hafa borist fyrir 7. september.

Lagt fram erindi frá Sambandi íslenskra sveitarfélaga þar sem kynnt er staðan í viðræðum sambandsins og fulltrúa ríkisins um kostnaðarskiptingu vegna talþjálfunar grunnskólabarna.

Lagt fram erindi frá mennta- og menningarmálaráðuneytinu þar sem tilkynnt er að 8. nóvember ár hvert verði framvegis helgaður baráttunni gegn einelti.