Félags- og tómstundanefnd Svf. Skagafjarðar

Lagt fyrir eitt mál. Samþykkt.

Sviðsstjóri og félagsmálastjóri upplýstu um stöðu biðlista við leikskóla og dagforeldra vegna inntöku barna að sumarleyfum loknum. Svo virðist sem hægt verði að anna öllum umsóknum fyrir börn fædd 2019 og fyrr. Hins vegar er ljóst að strax um áramót mun myndast þörf fyrir börn fædd á árinu 2020. Félags- og tómstundanefnd felur sviðsstjóra og félagsmálastjóra að vakta stöðuna og auglýsa eftir dagforeldrum til starfa eftir því sem þörfin verður meiri.

Lögð fram beiðni Maríu Drafnar Guðnadóttur um endurnýjun leyfis vegna nýrra húsakynna, núverandi leyfi fyrir fimm börnum gildir í Laugartúni 15 n.h. á Sauárkróki. Fyrir liggja öll gögn sem reglugerð gerir ráð fyrir. Félags- og tómstundanefnd samþykkir endurnýjun leyfis í nýjum húsakynnum, Smáragrund 5 n.h. Sauðárkróki, samanber 14.gr.reglugerðar nr.907/2005. Leyfið gildir fyrir fimm börnum samtímis, að meðtöldum þeim börnum sem fyrir eru á heimilinu á dvalartíma daggæslubarnanna yngri en 6 ára. Þó skulu eigi vera á heimilinu fleiri en tvö börn undir eins árs aldri að jafnaði. Leyfið gildir tímabilið 18.05.2020-19.03.2022.

Lagðar fram til kynningar leiðbeiningar fyrir sveitarfélög varðandi akstursþjónustu fyrir fatlað fólk samkvæmt lögum nr. 40/1991 um félagsþjónustu sveitarfélaga. Félagsmálastjóra falið að halda utan um vinnu við gerð verklagsreglna innan Sveitarfélagsins Skagafjarðar, unnar útfrá þessum leiðbeiningum. Núverandi reglur um ferðaþjónustu fatlaðs fólks gilda áfram þar til endurskoðun hefur farið fram. Miðað er við að endurskoðun reglna eigi sér stað eigi síðar en sex mánuðum eftir útgáfu leiðbeininganna 22.apríl 2020.

Sviðsstjóri upplýsti um að Sveitarfélagið Skagafjörður hafi sótt um 22 sumarstörf fyrir námsmenn 18 ára og eldri sbr. minnisblað sem fylgir í gögnunum. Vinnumálastofnun úthlutaði sveitarfélaginu 9 störf og er nú unnið að skilgreiningum þeirra og starfslýsingum.

Lagt fram minnisblað frá frístundastjóra með upplýsingum um þróun launa í Vinnuskólanum. Félags- og tómstundanefnd samþykkir að hækka laun í Vinnuskóla um 2% á árinu 2020.

Frístundastjóri kynnti spurningakönnun sem lögð var fyrir nemendur 7.-10. bekkjar grunnskólanna í Skagafirði. Hann upplýsti jafnframt að umsóknum í Vinnuskóla hefði fjölgað nokkuð frá því í fyrra og taldi að þeim ætti eftir að fjölga enn meira. Ekki er þó útlit fyrir að alvarlegt ástand skapist hér vegna atvinnuleysis ungmenna. Félags- og tómstundanefnd óskar eftir því að frístundastjóri kanni atvinnuástandið meðal framhaldsskólanema.

Lagt fram ósk um styrk vegna íþrótta- og leikjanámskeiða barna í Fljótum líkt og gert hefur verið undanfarin ár. Félags- og tómstundanefnd samþykkir að veita 100.000 krónum til íþrótta- og leikjanámskeiða fyrir börn í Fljótum.

Lögð fram fundargerð 5. fundar Ungmennaráðs Sveitarfélagsins Skagafjarðar. Félags- og tómstundanefnd samþykkir að bjóða Ungmennaráði til fundar við sig á haustmánuðum.

Vísað til nefndarinnar frá byggðarráði þann 22. apríl s.l. Lagt fram erindi frá Æskulýðssambandi þjóðkirkjunnar þar sem falast er eftir styrk vegna landsmóts sambandsins sem ráðgert er að halda á Sauðárkróki í lok október n.k. Óskað er eftir styrk í formi gistingar í Árskóla, notkun á íþróttahúsi og aðgangi að sundlaug. Félags- og tómstundanefnd tekur jákvætt í erindið og felur sviðsstjóra að kanna hvort þessu verði við komið.