Félags- og tómstundanefnd Svf. Skagafjarðar

Lagt fram minnisblað um hjólabrettagarð á Sauðárkróki. Rætt um mögulega staðsetningu slíks garðs. Forsöðumanni frístunda- og íþróttamála falið að vinna málið áfram í samvinnu við sviðsstjóra veitu- og framkvæmdasviðs og leggja málið aftur fyrir nefndina sem fyrst.

Lögð fram tillaga að breyttum reglum um Hvatapeninga vegna íþrótta- og tómstundastarfs barna í Sveitarfélaginu Skagafirði. Verið er að laga reglurnar að upptöku nýs skráningakerfis í gegnum Nóra, sem tekið var upp um síðustu áramót. Nefndin samþykkir breytingarnar.

Rætt um opnunartíma sundlaugarinnar á Hofsósi n.k. sumar. Forstöðumanni frístunda- og íþróttamála falið að koma með tillögu á næsta fundi nefndarinnar.

Samþykkt að veita Guðrúnu Gunnsteinsdóttur leyfi til daggæslu 5 barna á heimili sínu, enda uppfyllir hún öll skilyrði skv. reglugerð.

Lögð fram drög að breyttum reglum um dagvistun barna á einkaheimilum. Breytingarnar fela í sér:

1) Hækkun niðurgreiðslna um 20%. Upphæð niðurgreiðslunnar fyrir börn foreldra sem eru giftir eða í sambúð var 244 kr. en verður nú 293 kr. fyrir hverja keypta klukkustund og fyrir börn foreldra sem eru einstæðir eða báðir í námi var upphæðin 307 kr. en verður nú 368 kr. fyrir hverja keypta klukkustund. Hámarksgreiðslur hækka samsvarandi um 20%.

2) Foreldrum sem ekki stendur til boða dagvistarpláss eða leikskólapláss geta sótt um foreldragreiðslur samsvarandi niðurgreiðslunum

3) Dagforeldrum eru tryggðar niðurgreiðslur sem svarar þremur börnum 3 X 64.922 kr. á mánuði í 11 mánuði á ári

Aðrar breytingar lúta að málskotsrétti o.fl.

Reglurnar gildi frá 1. mars 2017

Félags- og tómstundanefnd samþykkir tillögurnar með áorðnum breytingum og vísar málinu til byggðarráðs.

Fjallað um sex umsóknir, einni synjað, fimm samþykktar.

Lagt fram yfirlit um fjárhagsaðstoð 2016.