Unglingalandsmót UMFÍ á Sauðárkróki um næstu helgi

Unglingalandsmót UMFÍ verður haldið á Sauðárkróki um næstu helgi. Keppt verður í 16 greinum á mótinu, þar af eru þrjár nýjar greinar, bogfimi, siglingar og tölvuleikir. Skráning á mótið er góð og má því búast við miklum fjölda gesta í fjörðinn. Keppni hefst á fimmtudag og verður  mótið formlega sett með viðhöfn á Sauðárkróksvelli föstudaginn 1. ágúst kl. 20:00. Fjölbreytt afþreyingardagskrá verður í boði fyrir alla gesti mótsins jafnt sem heimamenn. Hægt er að kynna sér bæði keppnisdagskrá og afþreytingardagskrá mótsins inni á heimasíðu UMFÍ www.umfi.is.

Landsmótsþorpið verður staðsett á Flæðunum við sundlaugina. Þar verða kvöldvökurnar í stóra tjaldinu, leiktæki, hæfileikasvið, þrautabraut, markaður og margt fleira. Stjórnstöð hefur nú formlega verið opnuð í Árskóla og hvetjum við áhugasama til að líta þar við. Þeir sem hafa áhuga á að aðstoða við framkvæmd mótsins er bent á stjórnstöð. Framkvæmdastjórn þiggur alla hjálp sem í boði er núna á lokasprettinum. 

Allir eru hvattir til að kynna sér dagskránna, taka þátt í viðburðinum og skemmta sér vel á Unglingalandsmóti á Sauðárkróki um Verslunarmannahelgina.