Sveitarstjórn samþykkir að hækka ekki gjaldskrár á árinu 2014

Á sveitarstjórnarfundi í dag var eftirfarandi tillaga samþykkt samhljóða.

Í ljósi viðsnúnings og jákvæðrar þróunar í rekstri sveitarfélagsins hefur meirihluti framsóknar og vinstri grænna í sveitarstjórn Sveitarfélagsins Skagafjarðar ákveðið að leggja til að ekki verði farið í gjaldskrárhækkanir fyrir árið 2014 er snúa aðallega að börnum, barnafólki og eldri borgurum.  Lagt er til að eftirfarandi gjaldskrár verði ekki hækkaðar frá fyrra ári þrátt fyrir verðlagshækkanir:

Leikskólagjöld   Skólamáltíðir í leik- og grunnskólum
Skóladagvist   Tónlistarnám
Hljóðfæraleiga   Aðgangseyrir í sundlaugar (áfram verður frítt í sund fyrir börn og eldri borgara með lögheimli i sveitarfélaginu)
Dagvist aldraðra   Heimaþjónusta
Tómstundastarf barna á vegum sveitarfélagsins    

 
Á kjörtímabilinu hefur verið ráðist í viðamiklar hagræðingaaðgerðir hjá sveitarfélaginu með samstilltu átaki sveitarstjórnar, starfsfólks sveitarfélagsins og íbúum þess.  Sá árangur sem náðst hefur er grunnurinn að því að hægt er að fara í fyrrgreindar aðgerðir.  Meirihluti framsóknar og vinstri grænna í sveitarstjórn Sveitarfélagsins Skagafjarðar telur að með þessum aðgerðum sé sveitarstjórn að leggja sitt lóð á vogarskálarnar til að stuðla að stöðugleika,  halda aftur af verðbólgu á komandi ári og að kaupmáttur íbúanna aukist í raun. Með samþykkt tillögunnar verða gjöld og álögur á fjölskyldufólk og eldri borgara áfram með því lægsta sem gerist á landsvísu.  Markmiðið er að tryggja að Skagafjörður sé og verði í fremstu röð sem ákjósanlegur búsetukostur.