Innritun árgangs 2020 í grunnskóla í Skagafirði

Innritun barna sem hefja skólagöngu í grunnskólum Skagafjarðar næstkomandi haust er hafin. Innritun fer fram í gegnum vefgáttina Ísland.is. Foreldrar barna fædd árið 2020 eru hvött til að innrita börn sín sem fyrst eða í síðasta lagi 15. maí nk.

Í Skagafirði eins og í öðrum sveitarfélögum eru ákveðin skólahverfi. Börn sækja skóla innan sinna skólahverfa og skipulag skólaaksturs tekur mið af þeim. 

Skólahverfin í Skagafirði eru skilgreind á eftirfarandi hátt:

Grunnskólinn austan Vatna:

• Vegamót sunnan Ásgeirsbrekku norður að mörkum Skagafjarðar og Fjallabyggðar.

Varmahlíðarskóli:

• Frá Birkihlíð
• Frá vegamótum sunnan við Ásgeirsbrekku að mörkum Skagafjarðar og Eyjafjarðar
• Byggð sunnan vegamóta þjóðvegar 1 og Skagafjarðarvegar, þ.m.t. Efribyggðarvegur, Dalspláss, Steinsstaðahverfi, Vesturdalur og Svartárdalur
• Frá mörkum Skagafjarðar og Húnabyggðar

Árskóli:

• Frá Gili
• Vegamót sunnan Ásgeirsbrekku vestur að Sauðárkróki
• Skagi frá mörkum Skagafjarðar og Skagabyggðar
• Reykjaströnd

Heimilt er að sækja um undanþágu fyrir skólasókn í öðru skólahverfi og um það gilda sérstakar reglur sem finna má hér á heimasíðu Skagafjarðar.