Fara í efni

Forvarnarteymi Sveitarfélagins Skagafjarðar

21.10.2021

Forvarnarteymi Sveitarfélagsins Skagafjarðar hittist 6. október s.l. en teymið hittist mánaðarlega yfir vetrarmánuðina. Forvarnarteymið vinnur eftir þeirri hugmyndafræði að það þurfi heilt þorp til að ala upp barn. Sú hugmyndafræði felur í sér mikilvægi þess að við sem samfélag látum okkur velferð barna og ungmenna varða og að enginn einn beri ábyrgð. Við berum öll ábyrgð. 

Í teyminu sitja:

Þorvaldur Gröndal frístundastjóri, fyrir hönd Sveitarfélagsins Skagafjarðar

Sigríður Inga Viggósdóttir, fyrir hönd frístundar, Árvistar og Húss Frítímans

Jón Sigurmundsson, fyrir hönd skólaþjónustu Sveitarfélagsins Skagafjarðar

Sirrý Sif Sigurlaugardóttir, fyrir hönd félagsþjónustu Sveitarfélagsins Skagafjarðar

Aðalbjörg Hallmundsdóttir, fyrir hönd FNV

Margrét Helga Hallsdóttir, fyrir hönd FNV

Jóhann Bjarnason, fyrir hönd Grunnskólans austan Vatna

Kristbjörg Kemp, fyrir hönd Árskóla

Helga Rós Sigfúsdóttir, fyrir hönd Varmahlíðarskóla

Eva Óskarsdóttir, tengiliður starfsmanna FNV við Nemendafélag FNV

Sr. Sigríður Gunnarsdóttir, fyrir hönd kirkjunnar

Auk þess á lögreglan sæti í teyminu.

 

Á fundinum var farið yfir stöðuna eins og hún blasir við teyminu eftir sumarið og hverjar áherslurnar fyrir veturinn skuli vera. Framundan eru t.a.m. fræðsla á vegum Samtakanna ´78 fyrir nemendur og starfsmenn grunnskólanna, Ernuland -  fræðsla um jákvæða líkamsímynd - verður með erindi í grunnskólunum í byrjun nóvember og FNV verður með fræðsludag 5. nóvember n.k.

Forvarnarteymið ræddi sérstaklega um áhyggjur sínar varðandi dvínandi hjálmanotkun meðal barna, hvort heldur sem er vegna rafknúinna farartækja eða  reiðhjóla. Jafnframt eru uppi áhyggjur af því hvernig börn beita rafmagnshlaupahjólum og vespum. Svo virðist sem kunnátta og færni margra barna til að stýra þessum farartækjum sé ábótavant. Forvarnarteymið biðlar því til foreldra að þeir ræði við börnin sín um mikilvægi þess að nota hjálma og að nota þessi farartæki á réttan hátt.

Íbúar geta og mega gjarnan koma með ábendingar um það sem betur má fara í forvörnum og eru hvattir til að vera vakandi yfir mikilvægi samstarfs í forvarnarmálum.

 

Fyrir hönd forvarnarteymis,

Þorvaldur Gröndal

frístundastjóri