Fjallkonuhátíð verður haldin í Skagafirði um helgina

Nú um helgina, dagana 7. og 8. september fer fram Fjallkonuhátíð í Skagafirði.

Á hátíðinni verður fjölbreytt dagskrá með áhugaverðum erindum um baðstofulíf og búningaþróun á 19 öld, þjóðbúningasýningu, þjóðbúningamessu, kynnisferð um sögustaði, heimsókn í Glaumbæ, myndatökum og söng. Að hátíðinni standa Þjóðbúningafélag Íslands, Pilsaþytur í Skagafirði og Annríki – Þjóðbúningar og skart. Þjóðbúningasýning verður opin í Miðgarði báða dagana á meðan á hátíðinni stendur og aðgangur ókeypis að sýningunni.

Fjallkonuhátíðin er tileinkuð þremur einstaklingum sem settu mark sitt á þróun íslenskra kvenbúninga á 19. öld. Sigurður „málari“ Guðmundsson, frá Hellulandi í Hegranesi var þjóðernisrómantíker sem unni fögru handverki. Undir áhrifum gömlu faldbúninganna fór Sigurður að leita heimilda um búninga og handverk. Hann skráði m.a. frásögn um einstakan faldbúning sem Guðrún Skúladóttir frá Ökrum saumaði og seldur var til Englands 1809. Í samstarfi við konur lagði hann til breytta útgáfu af faldbúningi, skautbúning, táknmynd íslensks þjóðernis. Samstarfskona Sigurðar í Skagafirði, Sigurlaug Gunnarsdóttir frá Ási í Hegranesi, saumaði skautbúning eftir fyrirmynd Sigurðar, þann elsta sem varðveist hefur. Fyrir áhuga Sigurðar og hvatningu þróuðust kvenbúningarnir inn í nýjan tíðaranda 19. aldar. Skautbúningurinn fékk hlutverk í sjálfstæðisbaráttu Íslendinga, þjóðbúningur borinn af stoltum konum sem Sigurður hvatti til dáða er hann sagði: „af yðar mynd er Ísland kallað „fjallkonan fríð“.

Dagskrá laugardagsins fer fram í Miðgarði, Varmahlíð og er öllum opin og ókeypis.

Dagskrá sunnudags hefst með messu að Hólum í Hjaltadal.
Eftir messu verður farin rútuferð um sögustaði í Skagafirði. Skráning í ferðina fer fram á pilsaþytur @gmail.com og kostar ferðin 4.000 krónur.