Umhverfis- og samgöngunefnd Svf Skagafjarðar

Svavar Atli Birgisson, slökkviliðsstjóri Brunavarna Skagafjarðar, kom á fund nefndarinnar og kynnti hugmyndir að nýjum slökkvibíl. Nefndin samþykkir af sinni hálfu kröfulýsingu slökkviliðsstjóra að nýjum slökkvibíl.

Lögð var fram til kynningar skýrsla Samtaka iðnaðarins um ástand hafna.
Umhverfis- og samgöngunefnd Sveitarfélagsins Skagafjarðar þakkar greinargóða samantekt á stöðu íslenskra hafna og ítrekar mikilvægi þess að ríkissjóður tryggi aukið fjármagn í viðhald og nýframkvæmdir í höfnum landsins.

Lagðar voru fram til kynningar fundargerðir 397. og 398 fundar stjórnar Hafnasambands Íslands.

Lagt var fram til kynningar erindi frá Vegagerðinni til Hafnasambands Íslands varðandi hafnarkanta.

Lagður var fram til kynningar tölvupóstur frá heilbrigðisfulltrúa Norðurlands vestra varðandi valdheimildir Heilbrigðiseftirlits sveitarfélaga til að fjarlægja númerslausa bíla á einkalóðum. Einnig lagður fram úrskurður úrskurðarnefndar umhverfis- og auðlindamála, mál nr 65/2016.
Úrskurðurinn staðfestir heimildir heilbrigðiseftirlita til að fjarlægja númerslausa bíla af einkalóðum út frá þeirri forsendu einni að bíllinn sé lýti á umhverfinu.
Nefndin lýsir yfir ánægju með úrskurðinn sem skýrir valdheimildir heilbrigðisnefnda og leggur nefndin til að farið verði í samvinnu við heilbrigðiseftirlit Norðurlands vestra um eftirlit með númerslausum bílum á einkalóðum.

Lagðar voru fram tilkynningar Vegagerðarinnar um fyrirhugaða niðurfellingu vega af vegaskrá.
Þeir vegir í Sveitarfélaginu Skagafirði sem fyrirhugað er að fella af vegaskrá eru;
Hluti Laufskálavegar nr. 7790-01
Brekkuvegur nr. 7685-01
Húsabakkavegur nr. 7620-01
Krithólsgerðisvegur nr. 7500-01
Stekkjardalsvegur nr. 7637-01
Neðri Ásvegur 3 nr. 7796-01
Haganesvíkurvegur nr. 788-01

Umhverfis- og samgöngunefnd Sveitarfélagsins Skagafjarðar óskar eftir ítarlegri upplýsingum ásamt korti af vegum og veghlutum sem fyrirhugað er að leggja niður. Einnig mótmælir nefndin því að Haganesvíkurvegur nr 788-01 sé tekinn af vegaskrá þar sem íbúi er skráður með lögheimili á Efra-Haganesi.

Lagt var fram til kynningar erindi frá Umhverfisstofnun um upplýsingagjöf sveitarstjórna við útgáfu og endurskoðun svæðisáætlana um meðhöndlun úrgangs.

Lagt fram erindi frá íbúum Barmahlíðar 2, Skúla Bragasyni og Guðmundi Vilhelmssyni. Í erindinu kemur fram að íbúðarhús þeirra hafið notið útsýnis út á fjörðinn en geri það ekki lengur þar sem trjágróður í gilinu norðan við hús þeirra sé orðinn mjög hávaxin. Fara þeir þess á leit við sveitarstjórn að hæfilega verði grisjað þarna af þessum sökum.
Umhverfis- og samgöngunefnd þakkar erindið en bendir á að umrætt svæði sé hluti af skógrækt og útivistarsvæði íbúa sveitarfélagsins, ekki eru uppi áform um grisjun á þessu svæði að svo stöddu.

Lögð voru fyrir fundinn drög að sameiginlegri lögreglusamþykkt fyrir Norðurland vestra.
Umhverfis- og samgöngunefnd gerir ekki athugasemdir við drögin.