Fræðslunefnd

Sveitarstjóri bar upp eftirfarandi tillögu um kjör formanns, varaformanns og ritara fræðslunefndar: Lagt er til að Jóhanna Ey Harðardóttir fulltrúi L-lista verði kjörin formaður, Rósanna Valdimarsdóttir fulltrúi D-lista varaformaður og Elfa Björk Víðisdóttir fulltrúi M-lista ritari. Sigurlína Erla Magnúsdóttir fulltrúi B-lista situr fundina sem áheyrnarfulltrúi með málfrelsi og tillögurétt. Nefndin samþykkir tillöguna samhljóða.

Lögð voru fram drög að erindisbréfi fræðslunefndar. Nefndin samþykkir erindisbréfið samhljóða fyrir sitt leyti og vísar til afgreiðslu sveitarstjórnar.

Tillaga að skóladagatölum grunnskólanna í Skagafirði fyrir skólaárið 2026-2027 var lögð fram. Tillagan hefur fengið staðfestingu skólaráðanna skv. grunnskólalögum. Fræðslunefnd staðfestir skóladagatöl grunnskólanna samhljóða fyrir skólaárið 2026-2027.

Tillaga að skóladagatölum leikskólanna í Skagafirði fyrir skólaárið 2026-2027 var lögð fram. Tillagan hefur fengið staðfestingu foreldraráða skv. lögum um leikskóla. Ársalir óska eftir að nýta tvo starfsdaga til námsferðar í maí 2027 og óska jafnframt eftir því að bæta við starfsdegi vegna ferðarinnar eins og tíðkast hefur þegar leikskólar fara í námsferð. Fræðslunefnd staðfestir skóladagatöl leikskóla samhljóða fyrir skólaárið 2026-2027.

Lögð fram tillaga að fundartímum nefndarinnar fyrir haustönn 2026, sem eru eftirfarandi: 27. ágúst, 24. september, 29. október, 26. nóvember. Nefndin samþykkir tillöguna samhljóða með fyrirvara um breytingar.

Lagður fram tölvupóstur dags. 10. júní 2026 þar sem Mennta- og barnamálaráðuneytið kynnir til samráðs mál nr. 99/2026, „Drög að reglugerð um notkun síma og snjalltækja í grunnskóla“. Umsagnarfrestur er til og með 8. júlí 2026.