Byggðarráð Svf. Skagafjarðar

Lagt fram fundarboð um ársfund Starfsendurhæfingar Norðurlands vestra þann 9. maí 2011. Lagt er til að Ásta Björg Pálmadóttir verði fulltrúi sveitarfélagsins á ársfundinum.

Lögð fram umsókn frá Kiwanisklúbbnum Drangey um styrk til greiðslu fasteignaskatts árið 2011. Með umsókninni fylgja fullnægjandi gögn skv. reglugerð sveitarfélagsins þar að lútandi.

Byggðarráð samþykkir að styrkja klúbbinn um 30% af álögðum fasteignaskatti 2011.

Lagt fram bréf frá formanni félags- og tómstundanefnd varðandi fyrirliggjandi drög að jafnréttisáætlun sveitarfélagsins fyrir tímabilið 2011 - 2014. Óskað er eftir að ábendingar og athugasemdir, ef einhverjar eru, verði sendar til félags- og tómstundanefndar fyrir 20. maí nk. Byggðarráð óskar eftir að fá fulltrúa nefndarinnar og sviðsstjóra til að kynna verkefnið.

Lagður fram tölvupóstur frá nefndasviði Alþingis þar sem samgöngunefnd Alþingis sendir frumvarp til sveitarstjórnarlaga, 726. mál til umsagnar. Byggðarráð frestar afgreiðslu málsins til byggðarráðsfundar 12. maí 2011

Lagt fram bréf frá Sambandi íslenskra sveitarfélaga varðandi frumvarp að nýjum sveitarstjórnarlögum. Byggðarráð frestar afgreiðslu málsins til byggðarráðsfundar 12. maí 2011

Lagt fram til kynningar bréf frá Safnaráði til fjárlaganefndar Alþingis, frá 6. apríl 2011 varðandi ríkisfjárveitingar til safnastarfs. Leitað verður frekari gagna og umsagnar um málið.

Lagt fram til kynningar bréf frá Röddum, samtökum um vandaðan upplestur og framsögn, þar sem skorað er á sveitarfélögin að standa vörð um skólabókasöfn grunnskólanna og það mikilvæga starf sem þar fer fram.

Lagður fram tölvupóstur frá Sambandi íslenskra sveitarfélaga. Þar eru borin hvatningarorð frá afmælisnefnd Jóns Sigurðssonar um að sveitarfélög um land allt minnist afmælis Jóns Sigurðssonar forseta sérstaklega að þessu sinni og þess mikla starfs sem hann vann í þágu þjóðar sinnar. Þann 17. júní n.k. eru liðin 200 ár frá fæðingu Jóns Sigurðssonar forseta á Hrafnseyri við Arnarfjörð. Erindið fer til afgreiðslu menningar- og kynningarnefndar.