Atvinnu-, menningar- og kynningarnefnd Svf Skagafjarðar

Tekin fyrir styrkbeiðni vegna gerðar stuttmyndar sem er lokaverkefni nemanda við Kvikmyndaskóla Íslands. Nefndin getur því miður ekki orðið við erindinu en bendir á hina ýmsu menningarsjóði sem veita styrki til verkefna sem þessara.

Á setningu Sæluviku Skagfirðinga 2016 verða í fyrsta sinn veitt Samfélagsverðlaun Skagafjarðar. Verðlaunin verða veitt árlega þeim einstaklingi, fyrirtæki, stofnun eða félagasamtökum í Sveitarfélaginu Skagafirði sem þykja standa sig afburða vel í að efla skagfirskt samfélag.

Atvinnu-, menningar- og kynningarnefnd bárust fjölmargar og afar góðar tilnefningar til Samfélagsverðlauna Skagafjarðar. Nefndin samþykkir að veita Stefáni Pedersen verðlaunin að þessu sinni fyrir afar góð störf í þágu samfélagsins til áratuga.

Gunnsteinn Björnsson óskar bókað að hann taki ekki þátt í afgreiðslu þessa máls.

Tekið fyrir erindi frá Kvenfélaginu Framför í Skarðshreppi þar sem félagið lýsir yfir áhuga sínum á að taka við rekstri Félagsheimilisins Ljósheima en félagið er meðeigandi að húsinu.

Atvinnu-, menningar- og kynningarnefnd samþykkir að fá stjórn kvenfélagsins á næsta fund nefndarinnar.

Steinunn Rósa Guðmundsdóttir vék af fundi við afgreiðslu þessa máls.

Fjallað um tilboð í uppfærslu á stefnumótun í ferðaþjónustu í Skagafirði. Atvinnu-, menningar- og kynningarnefnd samþykkir að ganga til samninga við Thorp ehf. um vinnuna, í samstarfi við Félag ferðaþjónustunnar í Skagafirði sem mun leggja framlag til verksins.

Atvinnu-, menningar- og kynningarnefnd lýsir yfir vilja sínum til að taka þátt í verkefninu Arctic Circle Route sem byggir á að búa til heilsárssegul utan höfuðborgarsvæðisins, einskonar ferðamannaveg/Tourist route um norðurhluta landsins. Mun hann liggja um fyrirfram ákveðna staði á Norðurlandi og byggir á því sem þegar er til staðar auk þess að hvetja til frekari þróunar á þeirri leið. Verkefnið hefur þegar hlotið styrki til þróunar þess úr Uppbyggingarsjóði Norðurlands eystra.

Atvinnu-, menningar- og kynningarnefnd samþykkir að beina því til byggðarráðs að veita viðauka að upphæð kr. 2.000.000,- til málaflokks 13 til að Sveitarfélagið Skagafjörður geti tekið þátt í verkefninu Arctic Circle Route, í samvinnu við önnur sveitarfélög og ferðaþjónustusamtök á Norðurlandi.

Kynnt niðurstaða umsókna í verkefnið Ísland ljóstengt 2016. Niðurstaðan hvað Sveitarfélagið Skagafjörð varðar er að styrkur fékkst fyrir 45 tengingum að upphæð kr. 20.685.000,-