Sveitarstjórn Sveitarfélagins Skagafjarðar

Fundargerð 62. fundar fræðslunefndar lögð fram til afgreiðslu á 271. fundi sveitarstjórnar eins og einstök erindi bera með sér. Bjarki Tryggvason kynnti fundargerð. Gréta Sjöfn Guðmundsdóttir, Sigríður Svavarsdóttir, Bjarni Jónsson með leyfi varaforseta og Bjarki Tryggvason kvöddu sér hljóðs.

Stefán Vagn Stefánsson tók til máls og lagði fram eftirfarandi tillögu.

Sveitarstjórn samþykkir að skipuð verði þriggja manna ráðgjafanefnd sem fari yfir rekstur sveitarfélagsins og stofnanna þess og vinni tillögur með byggðaráði um leiðir til hagræðingar og sparnaðar. Sveitarstjóri og fjármálastjóri sveitarfélagsins starfi með nefndinni, en hún starfi með og heyri undir byggðaráð og geri því reglulega grein fyrir vinnu sinni. Skipunartími, vinnuskipulag og áfangaskipting verði nánar skilgreind í samráði við byggðaráð, sem hafi yfirumsjón með starfi nefndarinnar

Ráðgjafanefndin verði skipuð tveimur fulltrúum tilnefndum af meirihluta og einum af minnihluta sveitarstjórnar. Fulltrúar í ráðgjafanefndinni komi ekki úr röðum sveitarstjórnarfulltrúa eða af framboðslistum til sveitarstjórnar, en verði valdir með tilliti til þekkingar sinnar á rekstri og viðfangsefni ráðgjafanefndarinnar.

Miðað er við að ráðgjafanefndin geti í samráði við byggðaráð, leitað sér sérfræðiaðstoðar varðandi einstaka þætti verkefnisins og muni nýta sér eftir föngum aðgengi að þeirri sérfræði þekkingu sem er að finna hjá skrifstofu Sambands íslenskra sveitarfélaga.

Bjarni Jónsson, VG

Stefán Vagn Stefánsson, Framsóknarflokki

Þá kvöddu sér hljóðs Gréta Sjöfn Guðmundsdóttir, Bjarni Jónsson með leyfi varaforseta, loks Sigurjón Þórðarson sem lagði fram eftirfarandi bókun:

Sveitarstjórnarfulltrúi Frjálslyndra styður tillögu um skipan ráðgjafanefndar, um að fara yfir rekstur sveitarfélagsins í samráði við og undir yfirumsjón byggðaráðs.

Frjálslyndir átelja meirihlutann fyrir að hafa ekki fyrr, hafið umrædda vinnu við að fara gaumgæfilega yfir rekstur sveitarfélagsins. Augljóst hefur verið frá því að ný sveitarstjórn tók við völdum að talsvert hefur vantað upp á að endar nái saman í rekstri sveitarfélagsins. Tafir á hagræðingarvinnunni gera alla vinnu við fjárhagsáætlun næsta árs erfiðari og ómarkvissari. Frjálslyndir munu leggja sitt af mörkum til þess að skynsamar hagræðingar- og sparnaðartillögur fái brautargengi í sveitarstjórninni enda leggja Frjálslyndir áherslu á að sýnt verði aðhald í rekstri og komið verði í veg fyrir frekari skuldasöfnun og tryggja þar með

framtíðarmöguleika Sveitarfélagsins Skagafjarðar.

Stefán Vagn Stefánsson kvaddi sér hljóðs og lagði fram breytingartillögu við áður fram komna tillögu svohljóðandi.

"Sveitarstjórn samþykkir að skipuð verði þriggja manna ráðgjafanefnd sem fari yfir rekstur sveitarfélagsins og stofnanna þess og vinni tillögur með byggðaráði um leiðir til hagræðingar og sparnaðar. Sveitarstjóri og fjármálastjóri sveitarfélagsins starfi með nefndinni, en hún starfi með og heyri undir byggðaráð og geri því reglulega grein fyrir vinnu sinni. Skipunartími, vinnuskipulag og áfangaskipting verði nánar skilgreind í samráði við byggðaráð, sem hafi yfirumsjón með starfi nefndarinnar

Ráðgjafanefndin verði skipuð tveimur fulltrúum tilnefndum af meirihluta og einum af minnihluta sveitarstjórnar. Fulltrúar verði valdir með tilliti til þekkingar sinnar á rekstri og viðfangsefni ráðgjafanefndarinnar.

Miðað er við að ráðgjafanefndin geti í samráði við byggðaráð, leitað sér sérfræðiaðstoðar varðandi einstaka þætti verkefnisins og muni nýta sér eftir föngum aðgengi að þeirri sérfræði þekkingu sem er að finna hjá skrifstofu Sambands íslenskra sveitarfélaga."

Jón Magnússon kvaddi sér hljóðs þá Gréta Sjöfn Guðmundsdóttir sem lagði fram eftirfarandi tillögu.

"Ég legg til að tillögunni verði vísað til byggðarráðs til umfjöllunar samhliða tillögu sama efnis sem frestað var á fundi byggðarráðs 29. júlí og er óafgreidd.

Þá tóku til máls, Bjarni Jónsson með leyfi forseta, Viggó Jónsson, Jón Magnússon, Stefán Vagn Stefánsson

Forseti bar upp tillögu Grétu Sjafnar Guðmundsdóttur til samþykktar, var hún felld með 5 atkvæðum gegn 1.

Forseti bar upp breytingatillögu Stefáns Vagns og Bjarna Jónssonar,var hún samþykkt með 8 atkvæðum gegn einu.

Gréta Sjöfn Guðmundsdóttir óskar að gera grein fyrir atkvæði sínu.

Undirrituð harmar að meirihluti Vinstri grænna og Framsóknarflokks telji ekki aðkomu allra flokka mikilvæga í þessari vinnu. Samfylkingin er með áheyrnarfulltrúa í byggðarráði og hefur ekki ákvörðunarvald. Ráðgjafanefnd verður skipuð tveimur af meirihluta og einum af minnihluta, ekki jafnræði þar. Það liggur ekki fyrir kostnaðaráætlun eða vinnufyrirkomulag og verkskil. Ég legg því til að tillögunni verði vísað til byggðarráðs til yfirferðar og kostnaðarmats. Samfylkingin hefur fullan vilja til að taka þátt í þessari vinnu, en tillaga sú er hér er lögð fram gerir ekki ráð fyrir því. Ég mun því ekki samþykkja þessa tillögu.

Tilnefningu í kjördeild á Steinsstöðum var frestað á fundi sveitarstjórnar þann 21. september sl.

Forseti gerir tillögu um aðalmenn og varamenn þeirra í sömu röð:, Aðalmenn: Hólmfríður S. R Jónsdóttir, Sigþór Smári Borgarsson og Valgerður Inga Kjartansdóttir. Varamenn: Þórey Helgadóttir, Elín Helga Sigurjónsdóttir og Gunnar Valgarðsson. Samþykkt samhljóða.

Ragnar Gunnlaugsson, Hátúni, sem kjörin var varamaður í Varmahlíðarkjördeild á ekki lengur lögheimili í sveitarfélaginu, tilnefna þarf því nýjan varamann.

Forseti gerði tillögur um Valdimar Sigmarsson í hans stað.

Var það samþykkt samhljóða.

Sigurjón Þórðarson lagði fram eftirfarandi tillögu:

Sveitarstjórn Skagafjarðar furðar sig á því að heilbrigðsráðherra hafi ekki enn sinnt beiðni sveitarstjórnar frá 4. október sl. um fund þar sem útskýrðar verða vafasamar forsendur stórfellds og óvægins niðurskurðar á Heilbrigðisstofnuninni á Sauðárkróki sem heimamenn hafa m.a. byggt upp með óeigingjörnu sjálfboðliðastafi og fjárframlögum.

Sveitarstjórn fer fram á að ráðherra og 3. þingmaður Norðvestur kjördæmis geri rækilega grein fyrir hvernig réttlæta megi tillögur sem fela í sér að íbúum Sveitarfélagsins Skagafjarðar verði veitt svo þungt högg sem frumvarp til fjárlaga næsta árs ber með sér.

Sveitarstjórn Skagafjarðar krefst þess enn og aftur að 30% viðbótarniðurskurður á Heilbrigðisstofnunina á Sauðárkróki verði dregin til baka nú þegar.

Stefán Vagn Stefánsson, Jón Magnússon og Bjarni Jónsson með leyfi varaforseta, kvöddu sér hljóðs.

Forseti bar tillöguna undir atkvæði og var hún samþykkt með 8 atkvæðum. Gréta Sjöfn Guðmundsdóttir óskar bókað að hún sitji hjá og gerir grein fyrir atkvæði sínu með eftirfarandi bókun.

Ástæða þess að fundarboð sveitarstjórnar á að berast sveitarstjórnarfulltrúum tveimur sólarhringum fyrir sveitarstjórnarfundi er til þess að sveitarstjórnarfulltrúar geti kynnt sér mál og undirbúið sig fyrir fundi. Ég tel ekki rétt að vera með uppákomutillögur samþykktar með afbrigðum á sveitarstjórnarfundum.

Lagður fram árshlutareikningur fyrir sveitarsjóð og stofnanir hans, fyrir tímabilið 1. janúar ? 30. júní 2010. Fyrir fund sveitarstjórnar í dag, kynnti Kristján Jónasson, lögg. endurskoðandi hjá KPMG niðurstöður reikningsins og svaraði fyrirspurnum.

Niðurstaða árshlutareikningsins er eftirfarandi:

Rekstrartekjur A-hluta 1.306.165.584 kr., B-hluta 203.989.254 kr., samtals A+B 1.510.548.838 kr.

Rekstrargjöld A-hluta 1.376.270.502 kr., B-hluta 145.138.268 kr., samtals A+B 1.503.408.771 kr.

Fjármagnsliðir A-hluta neikvæðir um 72.980.494 kr. og B-hluta neikvæðir um 28.311.861 kr., samtals A+B neikvæðir um 101.292.355 kr.

Rekstrarniðurstaða A-hluta neikvæð um 143.085.411 kr., B-hluta jákvæð um 48.539.124 kr., samtals neikvæð um 94.546.287 kr.

Eigið fé A og B hluta samtals pr. 30.06. 2010 1.204.105.336 kr.,skuldbindingar 710.425.211 kr., langtímaskuldir 2.917.327.580 kr. og skammtímaskuldir 829.786.469 kr. Fjárfestingar á tímabilinu námu samtals 386.284.052 kr. og ný lántaka 153.497.489 kr.

Fundargerðir stjórnar Skagafjarðarveitna frá 15. og 28. september 2010 lagðar fram til kynningar á 271. fundi sveitarstjórnar.

Fundargerðir skólanefndar FNV frá 4. maí og 8. september 2010 september lagðar fram til kynningar á 271. fundi sveitastjórnar.

Fundargerð Menningarráðs Norðurlands vestra frá 20. október 2010 lögð fram til kynningar á 271. fundir sveitarstjórnar.

Fundargerð stjórnar Náttúrustofu Norðurlands vestra frá 9. júní 2010 lögð fram til kynningar á 271. fundi sveitarstjórnar.

Fundargerð stjórnar SSNV frá 12. október 2010 lögð fram til kynningar á 271. fundi sveitarstjórnar.

Fundargerðir stjórnar Sambands íslenskra sveitarfélaga frá 26. ágúst, 22. og 29. september 2010 lagðar fram til kynningar á 271. fundi sveitarstjórnar.