Félags- og tómstundanefnd Svf. Skagafjarðar

Lagðar fram 5 umsóknir um fjárhagsaðstoð í 4 málum, 1 umsókn um niðurgreiðslu dagvistar barns á einkaheimili og 2 umsóknir um húsaleigubætur. Sjá trúnaðarbók.

Lagður fram samningur við Júlíus Rúnar Þórðarson um akstur vegna heimsendingar matar til aldraðra og öryrkja árið 2011.

Um er að ræða endurnýjun samnings frá fyrra ári með verðbótum.

Samþykkt og vísað til byggðarráðs.

Félagsmálstjóri kynnir drög að umsögn sem er í vinnslu hjá SSNV - málefnum fatlaðra

Félags- og tómstundanefnd beinir þeim tilmælum til byggðarráðs að heimild verði veitt til að taka þátt í samstarfinu "vinnandi vegur" ef það gagnast þeim tveimur einstaklingum sem nú eru að missa bótarétt. Nefndin leggur áherslu á að nýtt verði þau samstarfsúrræði sem eru til staðar í sveitarfélaginu, einkum í tengslum við Virk - starfsendurhæfingu. Nefndin leggur jafnframt áherslu á að þau úrræði sem beitt verður í þessu átaksverkefni séu sniðin að þörfum og getu viðkomandi einstaklinga og aðstæðum hér heima fyrir.

Félagmálastjóra er falið að ræða við starfsmann Virk - Starfsendurhæfingar og undirbúa tillögur að því hvernig þessu samstarfi verður best háttað og hver þáttur sveitarfélagsins verður í því. Tillögur verði lagðar fyrir næsta fund nefndarinnar.

Félags og tómstundanefnd samþykkir framlögð drög að reglum um húsnæðismál fyrir sveitarfélagið. Nefndin beinir því til byggðaráðs að skoðað verði að setja hámark á almenna leigu samanber grein 4.

Frístundastjóri kynnir að með tilfærslu á vöktum sé hægt að hafa opið til kl. 21.00 á fimmtudögum í Sundlaugunum á Sauðárkróki og Varmahlíð án þess að til komi aukinn kostnaður. Íþróttahúsið í Varmahlíð lokar kl. 20.00 á miðvikudögum en þess í stað er laugin opin til kl. 21.00. Nefndin samþykkir þessar breytingar á áður auglýstum afgreiðslutíma íþróttamannvirkjanna.

Erindi Stúdentafélags Hólaskóla kynnt. Félagið óskar eftir að fá sérstakan afslátt fyrir félaga sína.

Sveitarfélagið Skagafjörður býður nú þegar ýmiskonar afláttarkjör fyrir gesti sundlauganna og hefur ekki boðið sérstakan afslátt fyrir sérstaka hópa aðra en börn að átján ára aldri, eldri borgar og öryrkja.

Nefndin hafnar því erindinu.

Forstöðumaður Háholts, meðferðarheimilis, óskar eftir að fá aðgang að sundlauginni í Varmahlíð eftir lokun hennar og til kl. 20.45, mánudaga til fimmtudaga. Komið verður til móts við þetta með breyttum afgreiðslutíma þannig að laugin verður opin til kl. 21.00 miðvikudags- og fimmtudagskvöld.

Nefndin þakkar þann dugnað og sjálfboðaliðsstarf íþróttahreyfingarinnar, sem hér felst í því að byggja og kosta aðstöðu fyrir blaðamenn á Sauðárkróksvelli. Áður hefur frjálsíþróttadeild Tindastóls byggt tímatökuskýli á vellinum og knattspyrnudeild Tindastóls áhorfendastúku í sjálfboðamennsku. Viðhald þeirra mannvirkja hefur ekki verið íþyngjandi fyrir sveitarsjóð. Starf sjálfboðaliða innan vébanda ungmenna-og íþróttahreyfingarinnar í Skagafirði verður seint fullþakkað.

Frístundastjóri kynnir erindið, þar sem ætlunin er að endurvekja Sjálfsbjörgu í Skagafirði með það að markmiði að bæta aðgengismál fatlaðra og auka fræðslu til félagsmanna. Félagið leitar eftir stuðningi um að fá aðstöðu í Húsi frítímans einu sinni í viku, 2 tíma í senn, endurgjaldslaust til að byrja með. Sigríður A. Jóhannsdóttir, forstöðukona Húss frítímans upplýsir nefndina um að starfsemin sé nú þegar búin að sprengja húsnæðið utan af sér og þörf fyrir stækkun orðin brýn.Nefndin felur forstöðukonu Húss frítímans að finna leið til að bjóða Sjálfsbjörg velkomna í húsið.

Æskulýðsráð Mennta- og menningarmálaráðuneytis boðar komu sína í sveitarfélagið 1. mars í þeim erindagjörðum að fá kynningu á hugmyndafræði Húss frítímans og því æskulýðs-íþrótta-tómstunda-og forvarnastarfi sem fram fer í Skagafirði. Fulltrúar Félags-og tómstundanefndar, Byggðaráðs og notenda hússins eru boðaðir til fundarins.

Fulltrúar Félags-og tómstundanefndar eru boðnir velkomnir, ásamt Frístundastjóra og umsjónarmanni íþróttamannvirkja á ársþing UMSS, þann 22.mars næstkomandi.

Unglingaráð körfuknattleiksdeildar Tindastóls, þakkar fyrir að góða aðstöðu og þjónustulund við mótahald fystu helgina í febrúar, þegar flytja þurfti mót frá Sauðárkróki til Varmahlíðar vegna Þorrablóts sem haldið var í íþróttahúsinu á Sauðárkróki.