Byggðarráð Svf. Skagafjarðar

Styrkbeiðni frá stjórn Ungmenna- og íþróttafélaginu Smára þar sem óskað er eftir styrk til þess að félagið geti klárað gerð sparkvallar í Varmahlíð skv. samningi við sveitarfélagið þar um. Málið áður á dagskrá 499. fundar byggðarráðs.

Sveitarstjóri lagði fram tillögu um að fjármagn til að ljúka framkvæmdinni yrði tekið af framkvæmdaliðum sem gert er ráð fyrir í fjárhagsáætlun ársins 2009 og ekki verður farið í á árinu. Áætluð fjárhæð er kr. 3.000.000.

Byggðarráð samþykkir tillöguna.

Lagt fram bréf frá Nemendagörðum Skagafjarðar ses. þar sem félagið sækir um niðurfellingu á gatnagerðargjöldum vegna átta íbúða sem félagið áformar að byggja við Laugatún.

Byggðarráð hafnar erindinu.

Lagður fram tölvupóstur frá Guðmundi B. Eyþórssyni fjármálastjóra Háskólans á Hólum varðandi íbúðarhúsnæði í eigu sveitarfélagsins að Hólum. Spurt er um hvort möguleiki sé á þvi að sveitarfélagið bjóði núverandi leigjendum að kaupa húsnæðið sem þeir búa í.

Byggðarráð tekur jákvætt í erindið og felur sveitarstjóra og fjármálastjóra að vinna að framgangi málsins.

Lagt fram bréf frá hestamannafélögunum Léttfeta og Stíganda varðandi reiðveg milli Sauðárkróks og Varmahlíðar. Óskað er eftir styrk frá sveitarfélaginu í þetta verkefni árið 2010 að upphæð 1.500 þús.kr.

Páll Dagbjartsson óskar bókað: "Erindi þetta staðfestir þá skoðun mína að ástand reiðvegamála í Skagafirði er og hefur verið Skagfirðingum til vansa um langt skeið. Ég vakti athygli umhverfis- og samgöngunefndar á því fyrr á þessu ári að taka þyrfti heildstætt á þessu verkefni af hálfu sveitarfélagsins, gera áætlun til nokkurra ára um úrbætur og forgangsraða. Umhverfis- og samgöngunefnd hafnaði alfarið að aðhafast nokkuð varðandi reiðvegamál í héraði. Sú afgreiðsla var nefndinni og nefndarfulltrúum til skammar. Skipulags- og byggingarnefnd hefur einnig brugðist í því efni að taka með ábyrgum hætti á þessu verkefni við gerð Aðalskipulags fyrir Skagafjörð. Þetta eru mér mikil vonbrigði. Reiðleið milli Sauðárkróks og Varmahlíðar er vissulega bráðnauðsynlegt úrlausnarefni, en ég ítreka þá skoðun mína að gera þarf heildaráætlun um uppbyggingu reiðleiða í Skagafirði og forgangsraða þeim framkvæmdum."

Þórdís Friðbjörnsdóttir óskar bókað: "Ég mótmæli harðlega orðum Páls um vinnubrögð umhverfis- og samgöngunefndar í þessu máli og vísa til vinnu við aðalskipulag þar sem reiðvegamálin eru til meðhöndlunar."

Meirihluti byggðarráðs samþykkir að fela sveitarstjóra að afla frekari upplýsinga um verkefnið.

Páll Dagbjartsson óskar bókað að hann telji að verða eigi við erindinu og gera ráð fyrir fjármunum vegna þess í fjárhagsáætlun ársins 2010.

Lagt fram bréf frá sýslumanninum á Sauðárkróki þar sem óskað er umsagnar um umsókn Pálínu Skarphéðinsdóttur um rekstrarleyfi til að selja gistingu að Gili, 551 Sauðárkróki. Heimagisting, flokkur I.

Byggðarráð gerir ekki athugasemdir við umsóknina.

Lagt fram bréf frá sýslumanninum á Sauðárkróki þar sem óskað er umsagnar um umsókn Sigrúnar Aadnegard um endrunýjun rekstrarleyfis fyrir Félagsheimilið Ljósheima. Veitingastaður, flokkur I - samkomusalur, gististaður, flokkur III - svefnpokagisting.

Byggðarráð gerir ekki athugasemdir við umsóknina.

Lagt fram bréf frá Erni Þórarinssyni þar sem hann óskar eftir að fá Sólgarðaskóla í Fljótum á leigu vegna reksturs ferðaþjónustu á komandi sumri líkt og undanfarin ár. Einnig óskar hann eftir að taka svokallað skólastjórahús á Sólgörðum á leigu næsta sumar. Bréfritari tekur fram að honum sé kunnugt um ástand hússins.

Byggðarráð tekur jákvætt í erindið og felur skólastjóra Grunnskólans út að austan og starfsmanni eignasjóðs að ganga til samninga við Örn á svipuðum nótum og undanfarin ár.

Lagður fram tölvupóstur frá nefndasviði Alþingis þar sem óskað er umsagnar um frumvarp til laga um sveitarstjórnarlög (fjöldi sveitarstjórnarfulltrúa), 15. mál. Þess er óskað að umsögn berist fyrir 16. desember nk.

Byggðarráð Skagafjarðar leggst gegn samþykkt frumvarpsins.

Lagður fram til kynningar tölvupóstur frá nefndasviði Alþingis þar sem óskað er umsagnar um tillögu til þingsályktunar um náttúruverndaráætlun 2009-2013, 200. mál. Tillagan var send til umsagnar á 136. og 137. löggjafarþingi. Umsagnaraðilum er hér með gefinn kostur á að senda nýja umsögn eða láta fyrri umsögn gilda.

Lagt fram til kynningar bréf frá Sambandi íslenskra sveitarfélaga um tilfærslu á þjónustu við fatlaða frá ríki til sveitarfélaga 1. janúar 2011.

Lagt fram bréf frá sýslumannsembættinu á Sauðárkróki þar sem tilkynnt er um aðilaskipti á 9.176,7m2 úr landi Ytri-Hofdala, landnúmer 218175. Seljandi er Halldór Jónasson og kaupandi Kristján B. Jónasson.

Lagt fram bréf frá sýslumannsembættinu á Sauðárkróki þar sem tilkynnt er um aðilaskipti á jörðinni Kambi, landnúmer 146549. Seljandi er Guðrún Hjálmarsdóttir og kaupandi Guðrún Hjálmdís Hjálmarsdóttir.

Lagt fram bréf frá sýslumannsembættinu á Sauðárkróki þar sem tilkynnt er um aðilaskipti á jörðinni Ysta-Hóli, landnr. 146603. Seljendur eru Óskar Hjaltason, Ólöf Ásta Jónsdóttir, Þorbjörn Svanur Jónsson, Guðbjörg Jónsdóttir, Kristinn Herbert Jónsson, Jón Jökull Jónsson, Anna María Jónsdóttir og Ásgrímur Jónsson. Kaupandi er Magnús Pétursson.

Lagt fram til kynningar bréf frá Þjóðskrá þar sem minnt er á að skilafrestur vegna árlegrar íbúaskrár 1. desember er til 7. desember nk.

Sveitarstjóri kynnti byggðarráði að samkvæmt núverandi reglum Körfuknattleikssambands Íslands þá eiga kappleikir í efstu deild að fara fram á parketgólfum frá og með hausti 2010.

Lögð fram til kynningar drög að skýrslu um ástandsskoðun hreinsikerfa í sundlaugum sveitarfélagins.

Lagður fram tölvupóstur frá reikningsskila- og upplýsinganefnd, þar sem fram kemur samþykkt nefndarinnar um að sveitarfélög færi alla rekstrarleigusamninga vegna fasteigna í efnahagsreikning pr. 31.12. 2009.

Lagt fram til kynningar bréf frá heilbrigðisráðuneytinu þar sem kynnt er þjónusta á flugvöllum við sjúkraflug.