Umhverfis- og samgöngunefnd Svf Skagafjarðar

Dagana 6. til 11. júní sl. voru haldnir umhverfisdagar í Sveitarfélaginu Skagafirði þar sem íbúar á þéttbýlisstöðum í sveitarfélaginu voru hvattir til að fegra umhverfið með því að tína rusl í poka sem bornir voru út á hvert heimili.
Átakið hefur skilað takmörkuðum árangri og verður framkvæmd þess endurskoðuð fyrir næsta vor.

Lagt var fram erindi frá siglingasviði Vegagerðarinnar vegna nýrrar samgönguáætlunar 2018 til 2021.
Í erindinu er óskað eftir umsóknum frá sveitarfélögum um hafnarframkvæmdir og sjóvarnir.
Árið 2014 sótti sveitarfélagið Skagafjörður um framlög úr ríkissjóði vegna sex verkefna og komst eitt verkefni á samgönguáætlun, varnargarður við smábátahöfn og lauk framkvæmdum við garðinn á síðasta ári.
Sviðstjóra er falið að endurnýja umsókn frá árinu 2014 og bæta við dýpkun í Sauðárkrókshöfn og kanna möguleika á framlögum til sjóvarna við Kolkuós og Móskóga.

Lögð var fram til kynningar 395. fundargerð Hafnasambands Íslands.

Lagðar voru fram til kynningar tillögur frá Varmahlíðarstjórn að útsýnisskiltum á Reykjarhól við Varmahlíð. Um er að ræða þrjú "panorama" skilti með ljósmynd þar sem fjöll og helstu örnefni koma fram. Gert er ráð fyrir að skiltin séu staðsett ofan á heitavatnstanki Skagafjarðarveitna.
Veitunefnd hefur samþykkt uppsetningu umræddra skilta í samráði við Skagafjarðarveitur en erindið býður umsagnar skipulags- og bygginganefndar.

Lagt var fram erindi frá Soroptimistaklúbbi Skagafjarðar vegna framlengingar á samningi um umhverfisverðlaun.
Í júní 2013 var samþykkt að framlengja samning um umhverfisverðlaun við Soroptimistaklúbbinn um 3 ár og er sá samningur því útrunninn.
Umhverfis- og samgöngunefnd felur sviðstjóra að ganga frá nýjum 3ja ára samning við Soroptimista og að styrkupphæð hækki um 50 þúsund frá því sem verið hefur.

Unnið er að hönnun gámastöðvar við Varmahlíð og stefnt er á að bjóða framkvæmdina út í haust.