Fræðslunefnd Svf. Skagafjarðar

Í ljósi aðstæðna sem fram koma í erindi Jóns, leggur fræðslunefnd til að samþykkt verði undanþága frá notkun merkinga á skólabíl. Samþykkt þessi er háð því að börnum sé keyrt heim að bæ og að þau fari ekki út úr bílnum þar sem umferð er.

Viðmið um kennslumagn grunnskólanna fyrir skólaárið 2014-2015 lagt fram. Fræðslunefnd gerir ekki athugasemdir við þessi viðmið.

Skóladagatöl grunnskólanna fyrir skólaárið 2014-2015 lögð fram. Fræðslunefnd gerir ekki athugasemdir við dagatölin.

Lögð fram drög að fjölskyldustefnu fyrir Sveitarfélagið Skagafjörð. Fræðslunefnd fagnar gerð fjölskyldustefnu og hvetur til að unnið verði að gerð mælikvarða á framgang stefnunnar.

Sviðsstjóri kynnti að Endurmenntunarsjóður grunnskóla hefði veitt sveitarfélaginu tvo styrki, annan vegna verkefnisins ,,Snjallir nemendur - notkun nýrrar tækni í námi og kennslu" og hinn vegna verkefnisins ,,Efling læsis og lesskilnings í grunnskólum Skagafjarðar", samtals að upphæð kr. 1.008.000.-

Lögð fram tillaga að tónlistarforskóla í grunnskólum Skagafjarðar. Tillagan gerir ráð fyrir að öll börn í 1. bekk skólaárið 2014-2015 fái tónlistarkennslu sem verði samþætt tónmenntakennslu grunnskólanna. Verkefnið er samstarfsverkefni tónlistarskólans og grunnskólanna. Fræðslunefnd fagnar tillögunni og samþykkir hana samhljóða.