Félags- og tómstundanefnd Svf. Skagafjarðar

Fundargerð Ungmennaráðs frá 22. nóvember 2017 lögð fram til kynningar. Félagsmálastjóra og forstöðumanni frístunda- og íþróttamála falið að skoða nánar framgang mála sem Ungmennaráðið ályktar um.

Drög að samningi við UMFÍ og UMSS vegna Landsmóts, sem haldið verður í Skagafirði í sumar, lögð fram til kynningar.

Upplýst var um tveggja vikna lokun Sundlaugar Sauðárkróks vegna framkvæmda. Vonast er til að ekki þurfi að koma til lengri lokana á vorönn, en trúlega mun þurfa að loka nokkru lengur í haust. Reynt verður af fremsta megni að koma til móts við gesti laugarinnar og haga öllum upplýsingum eins og best verður á kosið.

Félag eldri borgara í Skagafirði sækir um styrk vegna félagsstarfs síns að upphæð 300.000 krónur. Nefndin samþykkir að veita félaginu 280.000 króna styrk sem er hækkun um 30.000 krónur frá síðasta ári.

Lögð fram umsókn um styrk að upphæð 200.000 krónur til greiðslu húsaleigu fyrir starf eldri borgara á Löngumýri. Nefndin samþykkir að veita styrk að upphæð 100.000 krónur vegna þessa.

Lögð fram styrkbeiðni frá Saman hópnum vegna forvarnarstarfs. Nefndin telur sér ekki fært að veita styrk að þessu sinni en óskar hópnum alls góðs í sínum störfum.

Lögð fram styrkbeiðni frá Stígamótum vegna starfsemi samtakanna. Nefndin telur sér ekki fært að veita styrk að þessu sinni en óskar Stígamótum alls góðs í sínum störfum.

Lögð fram beiðni um styrk frá Aflinu á Akureyri. Nefndin samþykkir að styrkja Aflið um 100.000 krónur vegna starfsins og hvetur jafnframt til þess að samtökin heimsæki grunnskólana í Skagafirði með erindi um forvarnir í samræmi við kynningu Aflsins á starfseminni sem fram fór hér í Skagafirði s.l. haust.

Samtök um Kvennaathvarf sækja um rekstrarstyrk líkt og undanfarin ár. Nefndin telur sér ekki fært að verða við styrkbeiðninni að þessu sinni en óskar samtökunum alls góðs.

Kynnt var frumvarp til laga um félagsþjónustu sveitarfélaga sem bíður Alþingis að afgreiða. Byggðarráð sendi félags- og tómstundanefnd erindið með ósk um umsögn. Nefndin felur starfsmönnum nefndarinnar að rita umsögn á grundvelli þeirrar kynningar og umræðna sem fram fóru á fundinum og senda nefndarmönnum til staðfestingar áður en hún verður send byggðarráði.

Kynnt var frumvarp til laga um þjónustu við fatlað fólk með miklar stuðningsþarfir sem bíður Alþingis að afgreiða. Byggðarráð sendi félags- og tómstundanefnd erindið með ósk um umsögn. Nefndin felur starfsmönnum nefndarinnar að rita umsögn á grundvelli þeirrar kynningar og umræðna sem fram fóru á fundinum og senda nefndarmönnum til staðfestingar áður en hún verður send byggðarráði.