Byggðarráð Svf. Skagafjarðar

Þór Hjaltalín minjavörður Norðurlands vestra kom á fund byggðarráðs til viðræðu um málefni minjavörslu.

Erindinu vísað til byggðarráðs af 285. fundi sveitarstjórnar, þar sem það var lagt fyrir til fyrri umræðu. Hrefna Gerður Björnsdóttir kom á fundinn og fór yfir fyrirliggjandi drög að siðareglum fyrir kjörna fulltrúa sveitarfélagsins.

Byggðarráð samþykkir fyrirliggjandi drög með áorðnum breytingum og vísar þeim til síðari umræðu í sveitarstjórn. Byggðarráð þakkar Hrefnu Gerði fyrir vel unnin störf við gerð reglnanna.

Í framhaldi af afgreiðslu 581. fundar byggðarráðs, þá mætti María Björk Ingvadóttir frístundastjóri á fundinn undir þessum dagskrárlið til að ræða styttingu á opnunartíma sundlauga í sveitarfélaginu og launamál á frístundasviði.

Lagt fram bréf frá Hönnu Dóru Björnsdóttur, ráðgjafa VIRK starfsendurhæfingarsjóðs hjá stéttarfélögunum á Norðurlandi vestra, þar sem hún óskar eftir auknu samstarfi við Sveitarfélagið Skagafjörð sem miðar að því að auka starfshæfni fólks á vinnumarkaði og styrkja þannig einstaklinga til þátttöku í atvinnulífinu og samfélaginu.

Byggðarráð samþykkir að bjóða Hönnu Dóru á næsta fund byggðarráðs til viðræðu um verkefnið.

Lagður fram tölvupóstur frá umhverfis- og samgöngunefnd Alþingis, þar sem óskað er umsagnar um frumvarp til laga um fjögurra ára samgönguáætlun 2011-2014, 392. mál.

Byggðarráð lýsir furðu á að Sveitarfélagsins Skagafjarðar sé hvergi getið í samgönguáætlun til lengri jafnt sem skemmri tíma. Fjöldi verkefna í samgöngumálum blasa við innan héraðsins og kallar byggðarráð eftir endurskoðun á fyrirliggjandi áætlun. Óskar byggðarráð eftir samráði við leiðréttingar á áætluninni.

Lagður fram tölvupóstur frá umhverfis- og samgöngunefnd Alþingis, þar sem óskað er umsagnar um frumvarp til laga um samgönguáætlun 2011-2022, 393. mál.

Byggðarráð lýsir furðu á að Sveitarfélagsins Skagafjarðar sé hvergi getið í samgönguáætlun til lengri jafnt sem skemmri tíma. Fjöldi verkefna í samgöngumálum blasa við innan héraðsins og kallar byggðarráð eftir endurskoðun á fyrirliggjandi áætlun. Óskar byggðarráð eftir samráði við leiðréttingar á áætluninni.

Lagður fram tölvupóstur frá atvinnuveganefnd Alþingis, þar sem óskað er umsagnar um frumvarp til laga um stjórn fiskveiða (þjóðareign á nytjastofnum og nýtingarréttur), 408. mál.

Byggðarráð ítrekar eftirfarandi bókun ráðsins um stjórn fiskveiða frá 563. fundi, 18. ágúst 2011 og var staðfest á 281. fundi sveitarstjórnar 23. ágúst 2011.

"Byggðarráð samþykkir svohljóðandi bókun: Mikilvægt er að kveðið sé á um það í lögum að nytjastofnar við Ísland séu í óskoraðri þjóðareign og að réttur sjávarbyggða og íbúa þeirra verði tryggður gagnvart nýtingu auðlindarinnar. Þá þarf að vera tryggt að atvinnugreininni sé búið nauðsynlegt rekstraröryggi ásamt því að gætt sé að hagkvæmnissjónarmiðum í þeirri umgjörð sem sjávarútvegi er búin af hálfu stjórnvalda. Byggðaráð Skagafjarðar leggur áherslu á að ekki verði gerðar neinar þær breytingar á lögum er varða sjávarútveg, sem er ein mikilvægasta atvinnugrein héraðsins, er orðið geti til að veikja stöðu byggðalagsins. Grundvallar markmið lagabreytinga þarf að vera að styrkja veiðar og vinnslu í sjávarbyggðum og auka búsetuöryggi á svæðum sem byggja afkomu sína að stóru leiti á sjávarútvegi."

Lagt fram erindi frá Sigurði Friðrikssyni um endurnýjun á rekstrarleyfi fyrir Bakkaflöt - Ferðaþjónustu sem er gististaður með aðstöðu þar sem hvers kyns veitingar í mat og drykk eru veittar, þ.m.t. áfengisveitingar. Gististaður - flokkur V.

Byggðarráð gerir ekki athugasemdir við endurnýjun rekstrarleyfisins.

Lagt fram til kynningar annars vegar afrit af bréfi dagsettu 21. nóvember 2011, frá Samtökum sveitarfélaga á Norðurlandi vestra til Jóhönnu Sigurðardóttur, forsætisráðherra, varðandi alvarlega stöðu á Norðurlandi vestra - ósk um samstarf um sértækar aðgerðir í landshlutanum. Hins vegar afrit af bréfi dagsettu 31. janúar 2012, frá Samtökum sveitarfélaga á Norðurlandi vestra til Jóhönnu Sigurðardóttur, forsætisráðherra, til ítrekunar á erindinu frá 21. nóvember 2011.

Byggðarráð samþykkir svohljóðandi bókun:

"Skorað er á forsætisráðherra og oddvita ríkisstjórnar Íslands að svara ákalli landshlutans og stjórnar Samtaka sveitarfélaga á Norðurlandi vestra um aðgerðir í atvinnu- og byggðamálum. Stjórn SSNV hefur undanfarna mánuði ítrekað óskað eftir fundi með forsætisráðherra án árangurs til að ræða mjög erfiða stöðu byggða á Norðurlandi vestra og leggja fram tillögur til lausna á þeim vanda. Ekki er hægt að una slíkum samskiptum á milli stjórnsýslustiga og ámælisvert að æðstu ráðmenn landsins skuli koma þannig fram við heilu landshlutana. Á skömmum tíma hafa verið flutt burtu eða lögð af 45 opinber störf í Skagafirði og í ljósi nýsamþykktra fjárlaga stefnir í að fyrir árslok hafi 65 stöðugildi horfið úr héraði á árunum 2008-2012. Ábyrgð stjórnvalda er því mikil eins og þær tölur sýna og hægt að tengja fólksfækkun beint við stjórnvaldsaðgerðir sem bitnað hafa á svæðinu. Við það bætist veruleg skerðing á fjárframlögum til verkefna og þjónustu á svæðinu umfram aðra landshluta. Ekki þolir neina bið að gripið verði til aðgerða til snúa þessari þróun við með samhentu átaki stjórnvalda og heimamanna."