Byggðarráð Svf. Skagafjarðar

Málið áður á dagskrá 906. fundar byggðarráðs þann 18. mars 2020. Lagt fram bréf dagsett 28. febrúar 2020 frá Olíudreifingu ehf. þar sem óskað er leyfis til þess að fjarlægja fasteignir í birgðastöð félagsins við Eyrarveg á Sauðárkróki, olíugeyma, dæluhús og geymsluhúsnæði, fasteignarnúmer 2131421, matshlutar 01 til 07, ásamt eldsneytislögnum stöðvarinnar sem eru ofanjarðar. Allt lagnakerfið frá bryggju inn í stöð verður tæmt af eldsneyti og lagnirnar hreinsaðar. Hörður Gunnarsson frkv.stj., Gestur Guðjónsson og Grétar Mar Steinarsson af hálfu Olíudreifingar ehf. og Einar Andri Gíslason byggingarfulltrúi og Rúnar Guðmundsson skipulagsfulltrúi, tóku þátt í fundinum undir þessum dagskrárlið í gegnum fjarfundabúnað.
Byggðarráð samþykkir að fela sveitarstjóra að vinna að málinu frekar og boðað verður til annars fundar eftir páska.

Málið síðast á dagskrá 908. fundar byggðarráðs þann 1. apríl 2020. Undir þessum dagskrárlið tóku fulltrúar starfshóps um framtíðarstarfsemi Sólgarðaskóla annars vegar og Íbúa- og átthagafélags Fljóta hins vegar, þátt í fundinum í gegnum fjarfundabúnað.
Byggðarráð samþykkiir að breyta fyrri ákvörðun um leigu á Sólgarðaskóla í skammtímaleigu og leigja húsnæðið ekki, heldur reyna að hraða eftir föngum breytingu á fasteigninni í hagkvæmt leiguhúsnæði. Jafnframt samþykkir byggðarráð að auglýsa eftir rekstraraðila að sundlauginni á Sólgörðum til langs tíma með þeim skilyrðum að sundlaugin verði opin almenningi með sambærilegum hætti og er í öðrum sundlaugum sveitarfélagsins.

Málið áður á dagskrá 907. fundar byggðarráðs þann 25. mars 2020. Sveitarfélagið Skagafjörður auglýsti til sölu fasteign á lóð númer 70 við Sauðárhlíð á Sauðárkróki, fasteignanr. F2132646, landnr. 144009. Um er að ræða hlöðu sem byggð var árið 1959, u.þ.b. 80 m2 og stendur á 2400 m2 lóð. Ráðstöfun lóðar er bundin því skilyrði að hefðbundinn lóðarleigusamningur verði gerður til allt að 25 ára, sem taki m.a. mið af skilmálum sem komu fram í auglýsingu, skilmálum á heimasíðu sveitarfélagsins og/eða leiða af hugmyndum bjóðanda, sbr. síðargreind greinargerð. Takmörkuð mannvirki verða leyfð á lóðinni, lægri en núverandi hlaða, sem hæfi umhverfinu, skv. nánari skipulagsskilmálum. Heimilt verður að rífa hlöðu ef þurfa þykir.
Tilboðsgjafar tóku þátt í fundinum í gegnum fjarfundabúnað í sitt hvoru lagi. Fyrst Kristinn T. Björgvinsson og Sigurpáll Aðalsteinsson og síðan fulltrúar Sauðárkróksbakarís ehf. og gagns ehf., Róbert Óttarsson og Magnús Freyr Gíslason.

Málið áður á dagskrá 902. fundar byggðarráðs þann 19. febrúar 2020.
Byggðarráð samþykkir að fasteignin verði ekki seld að svo stöddu.

Byggðarráð fjallaði um snjóalög og snjómokstur í sveitarfélaginu.
Byggðarráð samþykkir að fela sveitarstjóra að kanna þörf á auka snjómokstri í dreifbýli sveitarfélagsins, sambærilegt og gert var árið 2013 og í framhaldi senda erindi til Jöfnunarsjóðs sveitarfélaga vegna kostnaðar sem sveitarfélagið hefur lagt út frá desember 2019 til vors 2020.

Málið áður á dagskrá 904. fundar byggðarráðs þann 4. mars 2020 og var þá vísað til umsagnar félags- og tómstundanefndar og fræðslunefndar. Félags- og tómstundanefnd og fræðslunefnd bókuðu svo á fundum sínum þann 27. mars 2020: "[...]nefnd fagnar þessu erindi og beinir því til byggðarráðs að fela fjölskyldusviði að undirbúa þátttöku í verkefninu ásamt því að greina það ítarlega með tilliti til þess hvað nú þegar er verið að gera í sveitarfélaginu sem fellur vel að inntaki þess og hvar þarf að bæta úr. Greiningunni fylgi tillaga að úrbótum."
Byggðarráð tekur undir bókanir nefndanna og samþykkir að vísa erindinu til sveitarstjórnar.

Erindið rætt á fyrri fundum byggðarráðs.
Byggðarráð ræddi stöðu atvinnulífs í sveitarfélaginu og mögulegar aðgerðir.

Lagt fram til kynningar bréf Íþrótta- og Ólympíusambands Íslands til sveitarfélaga, dagsett 1. apríl 2020 varðandi íþróttahreyfinguna og COVID-19.

Lagður fram til kynningar tölvupóstur frá samgöngu- og sveitarstjórnarráðuneytinu/reikningsskila- og upplýsinganefnd, þar sem minnt er á yfirlýsingu frá ársreikningaskrá ríkisskattstjóra vegna áhrifa af COVID-19 frá 17. mars 2020, varðandi gerð ársreiknings fyrir árið 2019.

Lagður fram til kynningar tölvupóstur frá Sambandi íslenskra sveitarfélaga, dagsettur 3. apríl 2020, varðandi framlengingu heilbrigðisráðherra á samkomubanni til 4. maí 2020.