Byggðarráð Svf. Skagafjarðar

Lagt fram bréf frá hátíðarnefnd Jónsmessuhátíðar á Hofsósi 2013, þar sem óskað er eftir fjárstyrk að upphæð 430.000 kr. til að standa straum af kostnaði við hátíðina. Einnig er óskað eftir endurgjaldlausum afnotum af bifreið og áhaldahúsi á Hofsósi.
Byggðarráð samþykkir að veita 300.000 kr. styrk til hátíðarinnar auk afnota af bifreið og áhaldahúsi á Hofsósi. Kostnaðurinn verður tekinn af fjárhagslið 21890.

Lögð fram styrkbeiðni frá Frjálsíþróttasambandi Íslands, þar sem óskað er eftir styrk til kaupa á rafmagnstímatökutækjum o.fl. Heildarkostnaður við búnaðinn er áætlaður um 12 milljónir króna, tilbúinn til notkunar. Óskað er eftir að Sveitarfélagið Skagafjörður styrki verkefnið um 200.000 kr.
Byggðarráð samþykkir að óska eftir umsögn Ungmennasambands Skagafjarðar varðandi búnaðinn og erindið.

Lagt fram bréf frá Sambandi íslenskra sveitarfélaga varðandi námsferð til Skotlands 3.-5. september n.k., sem ætluð er fyrir sveitarstjórnarmenn, framkvæmdastjóra sveitarfélaga og stjórnendur á fjármála- og stjórnsýslusviðum þeirra.
Byggðarráð samþykkir að heimila sviðsstjóra stjórnsýslu- og fjármálsviðs að taka þátt í námsferðinni.

Byggðarráð samþykkir að heimila sveitarstjóra að taka skammtímalán, allt að 50.000.000 kr. hjá Íslenskum verðbréfum hf., ef þörf krefur.

Lögð fram umsókn frá Bílaklúbbi Skagafjarðar, um leyfi til að halda sandspyrnukeppni á Garðssandi, í landi Garðs.
Byggðarráð samþykkir erindið fyrir sitt leyti svo fremi að öll önnur tilskilin leyfi fáist frá hlutaðeigandi aðilum og öllum reglum verði framfylgt.

Lagt fram til kynningar bréf frá Jöfnunarsjóði sveitarfélaga varðandi framlög úr sjóðnum til eflingar tónlistarnámi og jöfnunar á aðstöðumun nemenda.