Port

Tillaga að deiliskipulagi, Hofsós, Miðsvæði milli Túngötu og Skólagötu, liggur frammi til kynningar frá 21. maí til og með 4. júlí 2025. Deiliskipulagið gefur heildstætt yfirbragð þar sem áhersla er lögð á vistlegt miðbæjarumhverfi. Horft er til þess að uppbygging á svæðinu styrki samfélagið og nýti innviði betur. Skipulagssvæðið er 1,3 ha að stærð og afmarkast af Suðurbraut að vestan, Skólagötu að norðan, Lindargötu að austan og Túngötu að sunnan. Innan svæðisins eru í dag þrjár byggingar, við Suðurbraut 9 er verslun og gistiheimili, við Skólagötu er aflögð bensínstöð og við Lindargötu er Félagsheimilið Höfðaborg.

Tillaga að deiliskipulagi fyrir, Sauðárkrókur athafnasvæði AT-403, liggur frammi til kynningar frá 21. maí til og með 4. júlí 2025. Skipulagssvæðið er innan skilgreindra þéttbýlismarka Sauðárkróks í Aðalskipulagi Skagafjarðar 2020-2035 og er innan athafnasvæðis þess nr. AT-403. Deiliskipulagssvæðið er 23,45 ha að stærð og skiptist í tvo meginhluta af Sauðárkróksbraut, þjóðvegi nr. 75. Annar hlutinn liggur norðvestan við þjóðveginn og sunnan við byggt atvinnusvæði sunnan við Strandveg. Svæðið vestan Sauðárkróksbrautar mun tengjast gatnakerfi Sauðárkróks um Borgargerði en svæðið austan Sauðárkróksbrautar um nýja safngötu.

Þann 9. maí 2025 samþykkti skipulagsnefnd Skagafjarðar að auglýsa tillögu að deiliskipulagi fyrir athafnasvæði nr. AT-403 í gildandi aðalskipulagi sveitarfélagsins. Í deiliskipulagstillögunni er gert ráð fyrir 6 nýjum lóðum við Borgarbraut. Þann 14. maí 2025 samþykktu byggðaráð og sveitarstjórn Skagafjarðar að auglýsa lóðir nr. 2, 4,6, 8, 10 og 12 við Borgarbraut lausar til umsóknar með fyrirvara um staðfestingu sveitarstjórnar á endanlegu deiliskipulagi. Meðfylgjandi myndkort sýnir auglýst lóðamörk, byggingarreiti og skipulagsskilmála. Afmörkun lóða, byggingarreita og skipulagsskilmálar geta tekið breytingum áður en deiliskipulag tekur gildi.

Hjá byggingarfulltrúa Skagafjarðar liggur fyrir byggingarleyfisumsókn, frá eiganda fjöleignahúss við Skógargötu 1 á Sauðárkróki, um leyfi til að gera breytingar á áður samþykktum aðaluppdráttum. Umbeðnar breytingar varða útlit hússins, kvistar teknir af, útliti vesturhliðar lítillega breytt og afstöðumynd uppfærð til samræmis við samþykkt deiliskipulag.  Áætlaður verktími er 18 mánuðir. Framkvæmdin er innan verndarsvæðis í byggð sem er norðurhluti gamla bæjarins á Sauðárkróki.

Ákveðið hefur verið að framlengja umhverfisdaga Skagafjarðar 2025 til og með 25. maí. Íbúar eru hvattir til að hlúa að umhverfinu og er takmarkið,snyrtilegra og fegurra umhverfi. Mikilvægt er að íbúar, fyrirtæki, býli og félagasamtök taki höndum saman, tíni rusl, komi bílhræjum, vélhræjum og öðrum hræjum í endurvinnslu. Snyrti til í og við lóðir sínar og lönd, og á nærliggjandi opnum svæðum. Jafnframt minnum við á að einstaklingar geta losað sig við úrgang gjaldfrjálst á móttökustöðvum sveitarfélagsins.

Íbúar við Víðihlíð á Sauðárkróki athugið. Vegna endurnýjunar á heimæð verða truflanir á rennsli í hitaveitu og á köflum alveg heitavatnslaust í dag. 

Næstu daga verða framkvæmdir á Túngötu á Sauðárkróki. Gatan verður malbikuð og verður einstefna um götuna á meðan. Vegfarendur eru beðnir um að sýna vinnuflokknum tillitssemi meðan á framkvæmdum stendur.

Skagafjörður auglýsir til leigu alls 38 ha beitarhólf í Efri-Flóa ofan Hofsóss. Ársleiga á hvern ha eru 12.000 kr. en hægt er að óska eftir hluta hólfsins til beitar, þó ekki minna en 10 ha. Leigutaki sér um að girða landið búfjárheldri girðingu. Frekari upplýsingar veitir Kári Gunnarsson s.659 3970. Umsóknarfrestur er til 5. júní og sækja skal um skriflega með tölvupósti á kari@skagafjordur.is

Sundlaugin í Varmahlíð verður lokuð frá og með mánudeginum 19. maí vegna viðhaldsvinnu. Opnun verði auglýst síðar.