Veitunefnd

8. fundur 28. ágúst 2014 kl. 15:00 - 16:00 að Borgarteigi 15, Sauðárkróki
Nefndarmenn
  • Gísli Sigurðsson formaður
  • Einar Eðvald Einarsson varaform.
  • Helgi Þór Thorarensen ritari
  • Úlfar Sveinsson áheyrnarftr.
Starfsmenn
  • Indriði Þór Einarsson Sviðsstjóri veitu- og framkvæmdasviðs
Fundargerð ritaði: Indriði Þór Einarsson sviðsstjóri veitu og framkvæmdasviðs
Dagskrá
Gunnar Björn Rögnvaldsson, verkefnastjóri, sat fundinn.

1.Neysluvatn úr Sauðá - lagfæring á vatnsbóli

1406281

Lögð var fram til kynningar kostnaðaráætlun vegna framkvæmda við að betrumbæta síun á neysluvatni úr Sauðá.
Kostnaðaráætlunin hljóðar upp á 4,3 milljónir. Veitunefnd leggur til að farið verði í framkvæmdina með haustinu og vísar erindinu til byggðaráðs.

2.Hitaveita í Fljótum 2015

1408141

Fjallað var um stöðu mála vegna hitaveitu í Fljótum. Óskað hefur verið eftir fundi með landeiganda jarðarinnar Langhúsa vegna nýtingar á jarðhita við Dælislaug. Einnig hefur verið haft samband við Þórólf Hafstað, sérfræðing hjá ÍSOR, vegna staðsetningar á nýrri borholu við Dælislaug. Stefnt er að borun og álagsprófun holunnar í haust.

3.Hrolleifsdalur - virkjun holu SK-32.

1408143

Farið var yfir stöðu mála vegna virkjunar á holu SK-32 í Hrolleifsdal. Verkið felst í því að koma niður dælu í holu sem boruð var árið 2012 með 10 tommu stálröri niður á 270,5 metra og dælan verður á 200 m dýpi. Einnig þarf að reisa dæluhús yfir holuna og tengja hana við núverandi stofnlögn. Virkjun á nýrri holu mun auka afhendingaröryggi á heitu vatni til notenda og nauðsynleg viðbót þegar horft er til stækkunar veitusvæðisins.
Búið er að steypa sökkla undir dæluhús og stefnt er á að setja dælu niður í lok september. Ef framkvæmdir ganga vel verður holan tilbúin til notkunar fyrir áramót.

4.Fjárhagsáætlun 2015 - Skagafjarðarveitur framkvæmdir

1408144

Lagt fram til kynningar minnisblað frá sviðsstjóra vegna stofnlagnar um túnahverfi. Síðastliðið ár hefur stofnlögnin bilað a.m.k. þrisvar sinnum og hefur þurft að loka fyrir heita vatnið í Hlíða- og Túnahverfi í nokkrar klukkustundir í hvert skipti þegar viðgerð stendur yfir. Lögnin sem um ræðir er 6 tommu lögn sem nær frá Ártúni og upp að dælustöð 2 neðan Sæmundarhlíðar, í allt um 350m.
Veitunefnd samþykkir að vísa endurnýjun stofnlagnarinnar til fjárhagsáætlunnar 2015 og að hönnun lagnar og kostnaðaráætlun verði unnin á þessu ári.

5.Beiðni um svör v/ hitaveitu í Hegranesi - íbúar 5 bæja

1405170

Lagt var fram til kynningar svarbréf til íbúa á vestanverðu Hegranesi þar sem lagt er til að boðar verði til fundar með íbúum á skrifstofu Skagafjarðarveitna. Fulltrúar veitunefndar, Skagafjarðarveitna og hönnuða munu sitja fundinn með íbúum. Sviðsstjóra falið að finna fundartíma í samráði við fulltrúa íbúa og boða skriflega til fundarins.

6.Lagning hitaveitu um austanverðan Skagafjörð

1407052

Lagt fram til kynningar bréf frá Rúnari Páli Hreinssyni til veitunefndar. Í bréfinu er óskað eftir að lagning hitaveitu um Deildardal verði tekin til skoðunar í samhengi við 5 ára framkvæmdaáætlun Skagafjarðarveitna og að kannaður verði vilji íbúa þar fyrir heitu vatni.
Sviðsstjóra falið að taka saman greinargerð og kostnaðarmat um þau svæði sem falla utan 5 ára áætlunnar.

7.Kynningarferð sveitarstjórnarfulltrúa um veitusvæði Skagafjarðarveitna- haust 2014

1408142

Lögð var fram til kynningar drög að dagskrá vegna kynningarferðar veitunefndar og sveitarstjórnar um veitusvæði Skagafjarðarveitna.

Fundi slitið - kl. 16:00.