Byggðarráð Skagafjarðar

930. fundur 16. september 2020 kl. 11:30 - 12:50 að Sæmundargötu 7a
Nefndarmenn
  • Gísli Sigurðsson formaður
  • Stefán Vagn Stefánsson varaform.
  • Ólafur Bjarni Haraldsson aðalm.
  • Álfhildur Leifsdóttir varam. áheyrnarftr.
Starfsmenn
  • Friðrik Margeir Friðriksson sviðsstjóri stjórnsýslu- og fjármálasviðs
  • Sigfús Ingi Sigfússon sveitarstjóri
Fundargerð ritaði: Margeir Friðriksson sviðsstjóri stjórnsýslu- og fjálmálasviðs
Dagskrá

1.Freyjugata Sauðárkróki - umsókn um lóð - Freyjugötureitur

1905113

Byggðarráð samþykkir að fresta málinu til næsta fundar.

2.Málefni bensínstöðvar N1 á Hofsósi

2002003

Byggðarráð samþykkir að fresta málinu til næsta fundar.

3.Starfshópur um aðgerðir til eflingar nýsköpunar í Skagafirði

2005008

Byggðarráð Sveitarfélagsins Skagafjarðar ákvað á fundi sínum þann 6. maí 2020 að skipa starfshóp um aðgerðir til eflingar nýsköpunar í Skagafirði. Starfshópurinn lagði fram skýrslu sína á fundi byggðarráðs þann 26. ágúst 2020.
Málið rætt og samþykkt að vinna frekar að þeim hugmyndum sem upp komu á fundinum.

4.Viðauki 7 við fjárhagsáætlun 2020

2008235

Lagður fram viðauki númer 7 við fjárhagsáætlun ársins 2020. Meginefni viðaukans er hækkun launakostnaðar vegna kjarasamningsbreytinga sem hafa orðið á árinu 2020 með nýjum kjarasamningum. Launahækkunin er áætluð 276 mkr. en upp í hana var til óráðstafaður launapottur sem gengur á móti að fjárhæð 136 mkr., þannig að hækkun launakostnaðar í viðaukanum er 140 mkr. Einnig er gerðar breytingar á tekjum um 49 mkr. og munar þar mest lækkun tekna í Byggðasafni Skagfirðinga í Glaumbæ út af Covid-19, 40 mkr. Lagt er til að þessum breytingum í rekstri verði mætt með nýrri lántöku að fjárhæð allt að 191.227 þús.kr. Einnig er í þessum viðauka leiðrétt upphafsstaða áætlunar efnahags til samræmis við ársreikning 2019.
Byggðarráð samþykkir framlagðan viðauka og vísar honum til afgeiðslu sveitarstjórnar.

5.Áskorun - Félag íslenskra handverksbrugghúsa

2009089

Lögð fram ódagsett áskorun frá stjórn Samtaka íslenskra handverksbrugghúsa til dómsmálaráðherra, alþingismanna og sveitarstjórnarfólks.
Samtök íslenskra handverksbrugghúsa skora á dómsmálaráðherra að leggja frumvarp um netverslun með áfengi fram á nýjan leik og tryggja íslenskum handverksbrugghúsum rétt til að selja gestum sínum vörur á staðnum. Íslensk handverksbrugghús eru nú á þriðja tug talsins. Þau tryggja um 200 manns störf í sinni heimabyggð og skila tugum milljóna í skatttekjur á ári. Brugghúsin framleiða vandaðar og eftirsóttar íslenskar vörur, draga til sín fjölda íslenskra og erlendra gesta og eru mikil lyftistöng fyrir lítil samfélög í nærumhverfi sínu, sem nokkur teljast til brothættra byggða. Samtökin skora því á ráðherra, alþingismenn og sveitarstjórnfólk að standa með íslenskum handverksbrugghúsum og standa þannig vörð um störf um land allt, vandaða íslenska framleiðslu og íslenskar skatttekjur.

6.Samráð; Frumvarp til laga um breytingu á lögum um stjórn fiskveiða (atvinnu- og byggðakvótar o.fl.)

2009063

Lagður fram tölvupóstur dagsettur 4. september 2020 þar sem atvinnuvega- og nýsköpunarráðuneytið kynnir til samráðs mál nr. 175/2020, "Frumvarp til laga um breytingu á lögum um stjórn fiskveiða (atvinnu- og byggðakvótar o.fl.)". Umsagnarfrestur er til og með 18.09.2020.

7.Samráð; Frumvarp til laga um breytingu á lögum um stjórn fiskveiða o.fl. (veiðistjórn grásleppu o.fl.))

2009067

Lagður fram tölvupóstur dagsettur 4. september 2020 þar sem atvinnuvega- og nýsköpunarráðuneytið kynnir til samráðs mál nr. 173/2020, "Frumvarp til laga um breytingu á lögum um stjórn fiskveiða o.fl. (veiðistjórn grásleppu o.fl.)).". Umsagnarfrestur er til og með 18.09.2020.
Byggðarráð samþykkir að fresta málinu til næsta fundar.

8.Samráð; Frumvarp til laga um breytingu á búvörulögum, nr. 99 1993, með síðari breytingum (endurskoðun samnings um starfsskilyrði framleiðenda garðyrkjuafurða).

2009068

Lagður fram tölvupóstur dagsettur 4. september 2020 þar sem atvinnuvega- og nýsköpunarráðuneytið kynnir til samráðs mál nr. 177/2020, "Frumvarp til laga um breytingu á búvörulögum, nr. 99/1993, með síðari breytingum (endurskoðun samnings um starfsskilyrði framleiðenda garðyrkjuafurða)." Umsagnarfrestur er til og með 18.09.2020.
Byggðarráð tekur jákvætt í frumvarpið.

9.Forsendur fjárhagsáætlana 2021-2024

2007021

Lagt fram til kynningar minnisblað dagsett 2. júlí 2020 frá Sambandi íslenskra sveitarfélaga varðandi forsendur fjárhagsáætlana 2021-2024.

10.Fjármálaráðstefna sveitarfélaga 2020

2009097

Lagður fram til kynningar tölvupóstur dagsettur 8. september 2020 frá Sambandi íslenskra sveitarfélaga þar sem tilkynnt er um að fjármálaráðstefna sveitarfélaga fari fram með breyttu sniði í ár. Dagana 1. og 2. október 2020 verður hún alfarið á netinu í tvo tíma hvorn dag. Í kjölfarið verða svo vikulegir fundir út október þar sem farið verður í sérstök málefni sem að tengjast fjármálum sveitarfélaga. Þeir fundir verða kynntir sérstaklega þegar nær dregur.

Fundi slitið - kl. 12:50.