Byggðarráð Skagafjarðar

808. fundur 21. desember 2017 kl. 09:00 - 12:23 að Sæmundargötu 7a
Nefndarmenn
  • Stefán Vagn Stefánsson formaður
  • Sigríður Svavarsdóttir varaform.
  • Gréta Sjöfn Guðmundsdóttir aðalm.
  • Bjarni Jónsson áheyrnarftr.
Starfsmenn
  • Friðrik Margeir Friðriksson sviðsstjóri stjórnsýslu- og fjármálasviðs
Fundargerð ritaði: Margeir Friðriksson sviðsstjóri stjórnsýslu- og fjármálasviðs
Dagskrá

1.Aðalgata 19 - Umsagnarbeiðni vegna rekstrarleyfis

1712170

Lagður fram tölvupóstur dagsettur 19. desember 2017 vegna mála 1712187 og 1712188 hjá embætti sýslumannsins á Norðurlandi vestra. Sigríður Magnúsdóttir sækir fyrir hönd Garðhús ehf., kt. 691298-4509, um annars vegar um leyfi til að reka gististað í flokki II og hins vegar krá í flokki III að Aðalgötu 19, 550 Sauðárkróki. Rekstri Microbar and bed er lokið í þessu húsnæði og við tekur Grand-Inn bar and bed.
Byggðarráð gerir ekki athugasemdir við umsóknina.

2.Umsagnarbeiðni frumvarp til laga um félagsþjónustu sveitarfélaga

1712160

Lagður fram tölvupóstur frá nefndasviði Alþingis, dagsettur 18. desember 2017. Óskað er umsagnar um frumvarp til laga um félagsþjónustu sveitarfélaga (samningur Sþ um réttindi fatlaðs fólks, stjórnsýsla og húsnæðismál), 27. mál. Óskað er eftir að umsögn berist eigi síðar en 15. janúar 2018.
Byggðarráð samþykkir að óska eftir umsögn félags- og tómstundanefndar.

3.Umsagnarbeiðni um frumvarp til laga um þjónustu við fatlað fólk með miklar stuðningsþarfir

1712159

Lagður fram tölvupóstur frá nefndasviði Alþingis, dagsettur 18. desember 2017 þar sem óskað er umsagnar um frumvarp til laga um þjónustu við fatlað fólk með miklar stuðningsþarfir, 26. mál. Óskað er eftir að umsagnir berist eigi síðar en 15. janúar 2018.
Byggðarráð samþykkir að óska eftir umsögn félags- og tómstundanefndar.

4.Birkimelur 8a - Tilboð

1712121

Málið áður á dagskrá 807. fundar byggðarráðs þann 14. desember 2017. Lagt fram gagntilboð frá Regínu Jóhannesdóttur í fasteignina Birkimel 8a, Varmahlíð.
Byggðarráð samþykkir að hafna gagntilboði Regínu.

5.Heilbrigðisstofnun Norðurlands og fjárlagafrumvarpið

1712175

Lögð fram fréttatilkynning frá Heilbrigðisstofnuninni á Norðurlandi vegna fjárlaga ársins 2018.
Byggðarráð Sveitarfélagsins Skagafjarðar lýsir yfir miklum vonbrigðum með nýútgefið fjárlagafrumvarp, en í þeim auknu fjárframlögum sem ætluð eru til að styrkja rekstur heilbrigðisþjónustu í landinu er litið framhjá Heilbrigðisstofnun Norðurlands. Því hvetur Byggðaráð stjórnvöld til að auka við fjárveitingar til Heilbrigðisstofnunar Norðurlands þannig að hægt verði að efla þjónustu stofnunarinnar m.a. við íbúa Skagafjarðar.
Heilbrigðisstofnun Norðurlands á Sauðárkróki gegnir lykilhlutverki í samfélagi okkar hér í Skagafirði og þá grunnstoð má ekki veikja umfram það sem orðið er á undaförnum árum. Það framlag sem stofnuninni er ætlað í þeim fjárlögum sem nú hafa verið birt endurspeglar ekki þau loforð sem gefin voru fyrir kosningar og í stefnuræðu forsætisráðherra um eflingu heilbrigðisstofnana á landsbyggðinni.
Mikilvægi góðrar heilbrigðisþjónustu verður seint metið að fullu en ljóst er að aðgengi að heilbrigðisþjónustu er ein af grunnstoðum hvers samfélags. Stjórnvöld á hverjum tíma verða að leitast við að aðgengi landsmanna að heilbrigðisþjónustu sé sem jafnast, óháð búsetu.

6.Fjölbrautaskóli Norðurlands vestra - fjárlög 2018

1712205

Byggðarráð Sveitarfélagsins Skagafjarðar brýnir stjórnvöld til að standa vel að baki Fjölbrautaskóla Norðurlands vestra með úthlutun fjármagns til reksturs skólans eins og fyrirheit voru gefin um. Boðuð stefna stjórnvalda um eflingu iðn- og verknáms, sem og eflingu framhaldsskóla á landsbyggðinni er ekki sýnileg í framkomnu fjárlagafrumvarpi fyrir árið 2018. Fjölbrautaskóli Norðurlands vestra er eini framhaldsskólinn í landshlutanum og er samfélaginu mikilvægur. Byggðarráð Sveitarfélagsins Skagafjarðar skorar því á stjórnvöld að auka fjárveitingar til skólans.

7.Aðalgata 21a og 21b - fyrirhuguð nýting fasteigna

1712182

Undir þessum dagskrárlið sitja fundinn sveitarstjórnarfulltrúarnir Sigríður Magnúsdóttir, Viggó Jónsson (nefndarmaður í atv.-, menn.- og kynn.nefnd), Þórdís Friðbjörnsdóttir og Gunnsteinn Björnsson (formaður atv.-, menn.- og kynn.nefndar), nefndarmenn í atvinnu-, menningar- og kynningarnefnd, Hanna Þrúður Þórðardóttir og Steinunn Rósa Guðmundsdóttir. Einnig sátu fundinn Indrði Þór Einarsson sviðsstjóri framkvæmda- og veitusviðs og verkefnastjórarnir Bryndís Lilja Hallsdóttir og Sigfús Ingi Sigfússon.
Til fundarins kom Ingvi Jökull Logason og kynnti áform um atvinnuuppbyggingu í húsnæði sveitarfélagsins að Aðalgötu 21. Byggðarráð samþykkir að halda áfram viðræðum við Ingva Jökul og verja allt að 2,5 m.kr. af þeim 80 m.kr. sem tilgreindar eru í fjárhagsáætlun vegna Aðalgötu 21 og 21a, til verkáætlunar innanhúss.

8.Ferðasmiðjan ehf. - aðalfundur 2017

1712127

Lagt fram til kynningar fundarboð um aðalfund Ferðasmiðjunnar ehf. vegna ársins 2016.

9.Fasteignirnar Hásæti 5a-5d

1311146

Málið áður á dagskrá 807. fundi byggðarráðs þann 14. desember 2017. Lagt fram til kynningar samþykki héraðsnefndar Húnavatns- og Skagafjarðarprófastdæmis á gagntilboði Sveitarfélagsins Skagafjarðar í eignarhlut prófastsdæmisins í fasteignunum við Hásæti 5a-5d á Sauðárkróki.

10.Fundagerðir 2017 - SSNV

1701003

Lögð fram til kynningar fundargerð stjórnarfundar SSNV frá 28. nóvember 2017.

Fundi slitið - kl. 12:23.