Atvinnu- og ferðamálanefnd

82003. fundur 01. október 2003
ATVINNU- OG FERÐAMÁLANEFND SKAGAFJARÐAR
Fundur  – 01.10.2003.
 
Atvinnu- og ferðamálanefnd Skagafjarðar, fundur í Ráðhúsinu á Sauðárkróki, miðvikudaginn 1. október 2003, kl. 12:30.
 
Dagskrá:
1)      Drög að samningi við Markaðsskrifstofu Ferðamála á Norðurlandi lagður fram til kynningar.
2)      Gönguleiðakort af framsveitum Skagafjarðar
3)      Skýrsla Atvinnuþróunarfélags Norðurlands vestra um framtíðaruppbyggingu á Steinsstöðum
4)      Önnur mál.
 
AFGREIÐSLUR:
 
1)      Samningur við Markaðsskrifstofu ferðamála á Norðurlandi.
Drög að samningi við Markaðsstofu ferðamála á Norðurlandi lagður fram til kynningar.  Samningurinn er samhljóða samningi sem Akureyrarbær gerði nýlega við Markaðsstofuna.  Nefndin felur sviðsstjóra að fara nánar yfir orðalag samningsuppkastsins og leggja það fyrir næsta fund nefndarinnar.
 
2)      Gönguleiðakort af framsveitum Skagafjarðar
Sviðsstjóri lagði fram minnisblað þar sem hann leggur til að Sveitarfélagið Skagafjörður standi fyrir útgáfu á korti sem sýnir ferðaleiðir í framsveitum Skagafjarðar.
Sviðsstjóri leggur til að kortið afmarkist af Hofsjökli í suðri, Varmahlíð í norðri, Blöndulóni í vestri og Nýjabæjarfjalli í austri.  Hann leggur til að kortið verði í sama stíl og með svipuðum upplýsingum og kortin sem gefin voru út árið 2001 af Hring hf. Á kortinu skulu vera gönguleiðir, raftingleiðir, reiðhjólaleiðir og einnig reiðleiðir, verði því við komið.  Á bakhlið skulu vera leiðarlýsingar og upplýsingar um áhugaverða staði.
Nefndin felur sviðsstjóra að vinna að málinu og kanna m.a. möguleika á utanaðkomandi styrkjum til verkefnisins.
 
3)      Skýrsla Atvinnuþróunarfélags Norðurlands vestra um framtíðar-uppbyggingu á Steinsstöðum
Þorsteinn Broddason frá ANVEST lagði fram skýrslu sem hann hefur unnið um framtíðaruppbyggingu á Steinsstöðum eftir að skólahald þar var lagt niður.  Í skýrslunni eru settar fram nokkrar hugmyndir sem fram komu m.a. á fundum með íbúum svæðisins.  Skýrsluna má nálgast á heimasíðu Atvinnuþróunarfélagsins www.inv.is
Atvinnu- og ferðamálanefnd leggur áherslu á að á Steinsstöðum byggist upp heilsársstarfsemi.  Nefndin leggur til að kannaðir verði frekar möguleikar á því að koma upp heilsutengdri starfsemi á Steinsstöðum.
Ennfremur leggur nefndin áherslu á að unnið verði að frekari hugmyndum um aðgerðir til atvinnusköpunar.
 
4)      Önnur mál.
Atvinnu- og ferðamálanefnd fagnar þeirri ákvörðun Landssambands hestamannafélaga að ganga til samninga við Vindheimamela um að halda landsmót hestamanna 2006 þar.  Ljóst er að landsmót hafi mikla þýðingu fyrir hestamennsku og atvinnulíf í Skagafirði.
 
Fleira ekki gert og fundi slitið kl. 14:30.
Fundinn sátu Viðar Einarsson, Bjarni Jónsson, Þorsteinn Broddason og Áskell Heiðar Ásgeirsson, sem ritaði fundargerð.  Jón Garðarsson forfallaðist.
Fundargerð lesin upp og samþykkt.