Atvinnu-, menningar- og kynningarnefnd

37. fundur 22. september 2016 kl. 16:00 - 18:30 að Sæmundargötu 7a
Nefndarmenn
  • Gunnsteinn Björnsson formaður
  • Viggó Jónsson varaform.
  • Hanna Þrúður Þórðardóttir ritari
  • Steinunn Rósa Guðmundsdóttir áheyrnarftr.
Starfsmenn
  • Sigfús Ingi Sigfússon verkefnastjóri
Fundargerð ritaði: Sigfús Ingi Sigfússon Verkefnastjóri
Dagskrá

1.Rekstur tjaldsvæðanna á Sauðárkróki, Hofsósi og í Varmahlíð 2016

1609233

Halldór Gunnlaugsson kom til fundar og kynnti rekstur tjaldsvæðanna á Sauðárkróki, Hofsósi og í Varmahlíð á árinu 2016.

2.Vegna ferðavagna og tjaldsvæðis í Varmahlíð

1609231

Tekið fyrir erindi frá Steinari Skarphéðinssyni sem varðar losunarstað fyrir ferðasalerni við tjaldsvæðið í Varmahlíð. Atvinnu-, menningar- og kynningarnefnd þakkar Steinari fyrir erindið og felur starfsmönnum nefndarinnar að hafa samráð um það við starfsmenn eignasjóðs með tilliti til fjárhagsáætlunar næsta árs.

3.Rekstur tjaldsvæðanna í Skagafirði

1609232

Samningur við núverandi rekstraraðila tjaldsvæðanna á Sauðárkróki, Hofsósi og í Varmahlíð rennur út 1. október nk. Atvinnu-, menningar- og kynningarnefnd felur starfsmönnum að auglýsa rekstur þeirra í samráði við starfsmenn eignasjóðs. Nefndin horfir til langtímaleigu, 5-10 ára og að hvað framtíðaruppbyggingu svæðanna varðar verði höfð í huga samkeppnissjónarmið gagnvart tjaldsvæðum í einkaeigu í héraðinu.

4.Auglýsing umsóknar um byggðakvóta 2016-2017

1609092

Tekið fyrir bréf frá atvinnuvega- og nýsköpunarráðuneytinu þar sem bæjar- og sveitarstjórnum er gefinn kostur á að sækja um byggðakvóta fyrir fiskveiðiárið 2016/2017 og skal umsókn send fyrir 10. október nk. Nefndin felur starfsmönnum hennar að senda inn umsókn fyrir hönd sveitarfélagsins.

5.Nordforsk 2016

1609019

Kynnt umsókn til Nordforsk, sem Sveitarfélagið Skagafjörður er samstarfsaðili að. Umsóknin snýr að auknu verðmæti sjávarfangs/landbúnaðarhráefna, líftækni o.fl. Sérstök áhersla yrði á Skagafjörð hvað Ísland varðar og er m.a. gert ráð fyrir að vinnustofa tilheyrandi verkefninu verði í Skagafirði. Fulltrúar sveitarfélagsins tækju einnig þátt í viðtölum, veittu tölfræðilegar og aðrar upplýsingar um íbúa og atvinnuþróun o.fl.

6.Vegna eignarhlutar í Bifröst

1607152

Tekið fyrir erindi frá Ungmennafélaginu Tindastóli þar sem óskað er eftir viðræðum við Sveitarfélagið Skagafjörð vegna eignarhluts félagsins í Félagsheimilinu Bifröst. Atvinnu-, menningar- og kynningarnefnd þakkar fyrir erindið og vísar erindinu til byggðarráðs sem jafnframt er stjórn eignasjóðs. Nefndin gerir ekki athugasemdir við það þótt Ungmennafélagið Tindastóll hverfi úr eigendahópi Félagsheimilisins Bifrastar.

7.Markaðs- og kynningarmál 2016

1609243

Rætt um markaðs- og kynningarmál Skagafjarðar. Atvinnu-, menningar- og kynningarnefnd hefur fengið tillögu að kjörorði og merki til notkunar í kynningarefni sveitarfélagsins, "Heimili norðursins - Home of the north". Kjörorðinu er ætlað að varpa ljósi á þann fjölbreytileika sem er að finna í skagfirsku samfélagi, t.d. "Skagafjörður - heimili íslenska hestsins, Skagafjörður - home of the Icelandic horse", o.s.frv. Merkinu er ekki ætlað að koma í stað byggðamerkis Sveitarfélagsins Skagafjarðar heldur yrði notað sem viðbót í markaðslegum tilgangi. Nefndin samþykkir notkun kjörorðsins og merkisins í markaðslegum tilgangi en felur starfsmönnum að útfæra nánar tillögur þess efnis og leggja fyrir nefndina.



Hanna Þrúður óskar bókað að merkið sé gott en kjörorðið sé mun sterkara á ensku en í íslenskri þýðingu orðsins og telur t.d. að staður næði betur markaðslegum árangri í íslenskri notkun kjörorðsins.

8.Ljósmyndasamkeppni 2016

1510062

Atvinnu-, menningar- og kynningarnefnd stóð fyrir ljósmynda- og myndbandasamkeppni fyrr á árinu. Fjölmargar myndir bárust og þakkar nefndin öllum þeim sem sendu inn efni. Nefndin samþykkir að tilnefna fulltrúa í sérstaka dómnefnd sem leggi niðurstöður sínar fyrir næsta fund nefndarinnar.

Fundi slitið - kl. 18:30.