Skráning er hafin í átaksverkefnið V.I.T

Skráning er hafin í átaksverkefnið V.I.T. þar sem ungmenni fædd 2002 og 2003 geta skráð sig til vinnu í sumar. Verkefnið V.I.T. – Vinna, Íþróttir og Tómstundir verður starfandi sumarið 2020 frá 2. júní til 14. ágúst. Í verkefninu felst að fyrirtæki taki ungmenni fædd 2002 og/eða 2003 í þjálfun og vinnu í allt að 240 tíma á tímabilinu. Viðkomandi fyrirtæki er  skuldbundið til að hafa ungmenni í þjálfun og vinnu í að lágmarki 240 tíma yfir tímabilið.

Reglur og skilmálar verkefnisins:

  1. Umsækjandi þarf að sýna fram á að hann hafi sótt um önnur störf og fengið höfnun. Taka þarf fram nafn fyrirtækis og tengilið.
  2. Umsækjandi þarf að mæta í atvinnuviðtal hjá tengilið verkefnisins.
  3. Viðkomandi fyrirtæki er vinnuveitandi ungmennis og gerir við hann ráðningarsamning.
  4. Vinnuveitandi greiðir ungmenni laun eftir kjarasamningi sem um starf ungmennis gildir. Um önnur starfskjör t.d. neysluhlé o.fl. fer einnig eftir kjarasamningi.
  5. Vinnuveitandi skuldbindur sig til að þjálfa viðkomandi ungmenni til þeirrar vinnu sem þeim er ætlað að sinna.
  6. Ungmenni skulu mæta á réttum tíma, hlýða fyrirmælum, tilkynna um forföll sem vinnuveitandi tilkynnir jafnframt tengilið verkefnisins.
  7. Vinnuveitandi skráir niður tíma og kemur þeim til tengiliðar.
  8. Ef upp koma mál sem ekki verða leyst á vinnustað skal kalla til tengilið verkefnisins.
  9. Vinnuveitandi sendir sveitarfélaginu reikning í lok tímabils vegna verkefnisins. Afrit af útgefnum launaseðlum og ráðningarsamningi ungmennis á tímabilinu skulu fylgja reikningi. 

Tengiliður verkefnisins er Þorvaldur Gröndal, forstöðumaður Vinnuskóla Skagafjarðar og VITS, sími: 660-4639 eða í valdi@skagafjordur.is

Hægt er að sækja um í V.I.T hér.