Víðimýri

Víðimýri var eitt af höfuðbólum Ásbirninga, sem var valdaættin í  Skagafirði á 13. öld. Þar bjó Kolbeinn Tumason um 1200. Guðmundur góði Arason var staðarprestur hjá honum áður en hann var vígður biskup á Hólum 1203. Kolbeinn og biskup áttu í deilum um stjórnarfar landsins sem lauk með falli Kolbeins í Víðinesbardaga 1208. Kolbeinn var eitt af höfuðskáldum þjóðarinnar á sinni tíð og samdi m.a. sálminn Heyr himnasmiður sem enn er sunginn. Kirkjan á Víðimýri, sem þar stendur, var byggð 1834 og er eitt glæsilegasta torfhús Íslands. Hún er friðuð og er í umsjón Þjóðminjasafns Íslands.

Núverandi kirkja á Víðimýri var reist 1834 af Jóni Samsonarsyni bónda og alþingismanni frá Keldudal í Hegranesi. Hún er að mestu smíðuð úr rekaviði, með torfþaki og torfveggjum. Spjaldþil eru í trégrind og reisifjöl í þekju. Flestar íslenskar kirkjur voru af þessari gerð fram eftir 19. öld. Kirkjan er enn sóknarkirkja. Árið 1934 keypti Þjóðminjasafnið kirkjuna og lét gera við hana. Í dag þykir hún gersemi og frábært sýnishorn af gamalli íslenskri byggingarhefð.  

 

Sturlungaslóð   |   sturlungaslod@sturlungaslod.is