Kakalaskáli

Árið 2012 opnaði Sigurður Hansen, Kakalaskála á Kringlumýri í Blönduhlíð. Kakalaskáli er hugsaður sem umhverfi fyrir sögumann sem segir frá atburðum á Sturlungaöld. Þar er boðið upp á sögustundir, Ásbirningablót og ýmislegt fleira.

Kringlumýri stendur undir snarbröttum Glóðafeyki. Skammt sunnan við bæinn er Haugsnes þar sem Haugsnesbardagi fór fram 1244. Ekki langt undan, norðan við bæinn, er Flugumýri þar sem fólk var brennt inni árið 1253, í lok brúðkaups sem átti að vera til að stilla friðinn milli stríðandi ættarvelda landsins.

Á grundunum norðvestur undan Haugsnesinu, á því svæði þar sem orrustan fór fram, hefur Sigurður Hansen komið upp útilistaverki, grjóther. Þar er stillt upp jafnmörgum grjótum, úr áreyrum Djúpadalsár sem nú rennur á milli Haugsnessins og Kringlumýrar, eins og þeim mönnunum sem tóku þátt í bardaganum (1320), þegar fylkingunum laust saman. Krossmark er á nokkrum steinum sem táknar þá sem féllu í bardaganum. Grjótherinn er í göngufæri frá afleggjaranum upp að Kringlumýri/Skriðu/Djúpadal og er merkt gönguleið að honum þaðan. Sömuleiðis er hægt að komast að grjóthernum ef genginn er slóð frá Syðstu-Grundarbæ, þar sem er skilti sem segir frá Haugsnesbardaga. Við þá sömu slóð er róðukrossinn sem Jón Adólf Steinólfsson, skurðlistamaður, gerði fyrir félaga á Sturlungaslóð. Til að minnast falls Brands Kolbeinssonar, síðasta ættarhöfðingja Ásbirninga en með honum hrundi veldi þeirra. 
 

Sturlungaslóð   |   sturlungaslod@sturlungaslod.is