Hvers vegna er Sturlungaslóð í Skagafirði?

Margir staðir í Skagafirði tengjast sögusviði í Sturlungasögu á dramatískan hátt og margir Skagfirðingar velta sögunni fyrir sér við ótal tækifæri. Í upphafi þess tíma sem sagan fjallar um, á 13. öld, bjó fólk í Skagafirði yfirleitt við friðsemd og naut styrkrar stjórnar goðorðsmanna af ætt Ásbirninga. Valdamestur þeirra var skáldið Kolbeinn Tumason á Víðimýri.

Árið 2008, 800 árum eftir að skáldið féll, var hóað saman hóp sem kallar sig félaga Á Sturlungaslóð. Ásetningur hópsins var að skoða hvort og hvernig hægt væri að minnast þeirra dramatísku og afdrifaríku átaka sem áttu sér stað á Sturlungaöld í Skagafirði á þeim stöðum þar sem þeir gerðust og flétta þá sama á slóð sem fólk gæti farið á milli að eigin vild. Setja upp einskonar lifandi landakort sem tæki mið af sögunni. Ástæða þess að valið var að kenna slóðina við Sturlungaættina fremur en ætt Ásbirninga var sú að það voru yfirleitt Sturlungar sem fóru hamförum í Skagafirði. Ásbirningar reyndu að verjast en urðu undir. Slóð Sturlunga um Skagafjörð var blóði drifin og hræðileg upplifun þess samferðafólks sem þá var uppi. Þeir réðust inn í ríki Ásbirninganna með það að markmiði að ná Skagafirði á sitt vald. Margir þeir sem mest létu voru tengdir Ásbirningum blóð- og fjölskylduböndum. Frændur reyndust frændum verstir. 

Þrátt fyrir það hefur Sturlungaöld yfir sér sértakan ljóma og oft er vitnað til þeirra sem þá voru uppi og þess sem gerðist. Af því má enn læra margt.

Sturlungaslóð   |   sturlungaslod@sturlungaslod.is