Hvað er í boði?

Félagar á Sturlungaslóð halda úti margvíslegri starfsemi árið um kring sem stendur öllum opið að taka þátt í.

  • Á hverju ári, jafnvel tvisvar hvert ár, í febrúar-mars og í nóvember, býðst fólki að taka þátt í samlestri þar sem valin er ákveðin saga úr Sturlungasögusafninu og lesið í 1,5 klst, vikulega, yfirleitt milli 10:30 og 12, á sunnudögum. Lesturinn er misoft í hvert sinn, frá 4-5 skiptum. Við lesum sögurnar og pælum í þeim, veltum fyrir okkur atburðarásinni og hvers vegna hún var, tengjum persónur og sögusvið og reynum að skilja og læra og hafa gaman af. Þetta hefur verið gert öll árin frá febrúar 2009 og þótt ýmsir hafi lesið sumar sögurnar oft og mörgum sinnum eru þær alltaf jafn spennandi. 
  • Þrisvar til fjórum sinnum á sumri er boðið upp á erindi um ýmis málefni tengd sögunni og fer eftir hvar erindið er haldið hver áherslan er. Erindin hafa verið vel sótt og á meðan svo er halda félagar á Sturlungaslóð áfram að bjóða upp á þau.
  • Á hverju sumri er farið í gönguferð um söguslóðir með leiðsögumanni sem gjörþekkir söguna og staðinn.
  • Þriðja laugardaginn í ágúst, hvert sumar, er haldinn sögudagur. Þá er ákveðinn sögustaður valinn, eða ákveðið efni, til umfjöllunar. Dagskrá sögudagsins er með hléum milli kl. 14 og 23. Deginum lýkur með Ásbirningablóti þar sem boðið er upp á mat eins og hann gæti hafa verið á miðöldum og boðin miðaldasögutengd skemmtiatriði af ýmsu tagi.
  • Félagar á Sturlungaslóð taka þátt í málþingum, fundum og ráðstefnum um hin ýmsu málefni sem snerta sögu okkar á Sturlungaöld og hægt er að panta erindi og gönguferðir hjá okkur, með góðum fyrirvara. Þá er hægt að fylla út fyrirspurnarformið (á yfirstikunni) eða hafa samband við sturlungaslod@sturlungaslod.is. 
 

Myndir frá sögudögum. T.v. er tekin 15. ágúst 2009, þegar róðukrossinn við Róðugrund var vígður. T.h. eru krásir á borðum á Ásbirningablóti í Kakalaskála árið 2012.

Sturlungaslóð   |   sturlungaslod@sturlungaslod.is