Á fundi sveitarstjórnar 22. febrúar sl. var samþykkt þriggja ára áætlun. Með henni fylgdi greinargerð um helstu mál sem unnið verður að á þessu þriggja ára tímabili. Ljóst er að þær miklu framkvæmdir sem meirihluti sveitarstjórnar ætlar sér að standa fyrir koma til með að hafa áhrif á áætlunina. Meirihlutinn vill vanda til verka og er því verið að skoða nokkrar leiðir varðandi fjármögnun.
Fyrsta verk okkar verður að byggja sex deilda leikskóla er taki við starfsemi Krílakots og Furukots. Fjárfrekasta verkefnið verður trúlega viðbygging Árskóla en reiknað er með að hafist verði handa við framkvæmdir á árinu 2008. Hér að neðan gefur að líta greinargerðina er fylgdi áætluninni en fjölmörg önnur mál eru á dagskrá meirihluta sveitarstjórnar en hér er getið.

Gunnar Bragi Sveinsson

- - - - - -
Helstu framkvæmdir á vegum sveitarfélagsins 2008 - 2010.
Mörg brýn verkefni bíða þess að komast í framkvæmd en því miður verður ekki unnt að framkvæma þau öll á yfirstandandi kjörtímabili. Ljóst er að bygging nýs leiksskóla á Sauðárkróki ásamt því að byggja við Árskóla verða fjárfrekustu verkefni kjörtímabilsins. Vonir standa til þess að framkvæmdir við nýjan leikskóla geti hafist á þessu ári og rekstrarlegra áhrifa gæti frá og með 2008.
Þá gerir meirihlutinn ráð fyrir að á árinu 2007 verði lokið við undirbúning og hönnun viðbyggingar við Árskóla þannig að framkvæmdir geti hafist snemma árs 2008. Þar sem ekki er ljóst hvaða leiðir verða farnar við fjármögnun þessara framkvæmda er ekki unnt að gera ráð fyrir áhrifum þeirra í fjárhagsáætlun áranna 2008 - 2010. Sú áætlun verður endurmetin um leið og fjármögnunarleiðin liggur fyrir.
Mörg önnur verkefni verður leitast við að fara í á kjörtímabilinu þau helstu er áhrif geta haft á fjárhagsáætlun 2008 - 2010 eru þessi:

- Menningarhúsið Miðgarður
- Gatnagerð
- Tjaldsvæði á Sauðárkróki
- Sorpförgun og vinnsla ásamt öðrum umhverfismálum
- Fráveitumál
- Hafnarmál á Hofsósi og Sauðárkróki
- Skipulagsmál þéttbýliskjarna
- Aðrar framkvæmdir í skólamálum en hér að framan greinir
- Hús frítímans
- Fegrun sveitarfélagsins
- Frekari uppbygging háskólanáms
- Atvinnumál
- Viðhald fasteigna

Ekki má gleyma því að aðstæður og verkefni geta breyst verulega á þessum tíma. Ef vonir um eflingu Hólastaðar og fólksfjölgun þar verða að veruleika má búast við að þar verði nauðsynlegt að bæta úr aðstöðu er varðar skólahald og aðra slíka þjónustu. Skoða verður möguleika sem skapast með hitaveitu á Hofsósi og nágrenni. Þá er gert ráð fyrir að tekin verði ákvörðun um framtíð sundlaugar Sauðárkróks.
Skipulega verður unnið að eflingu samfélagsins alls og reynt að mæta þörfum þéttbýlis og dreifbýlis eins og kostur er.